أجمل لحظة في حياة أي بنت هي لحظة الإعلان عن ميعاد فرحها وخطوبتها، وأكيد أي بنت بتكون فرحانة جدا وهي بتقدّم دعوة الفرح لأصدقائها وأقاربها...
وطبعا كلنا عارفين كروت الدعوة الكرتون المنتشرة بأشكالها الجميلة وتصميماتها الكثيرة لكن الجديد اللي معايا النهارده واللي قررت اقدمه في الموضوع ده إنى اقدم كارت دعوة الفرح باستايل جديد جدا جدا..
لماذا خامة الستان بالذات؟
كل الناس متعوّدة على شكل الكارت الكرتون، فالجديد تقديم حاجة جديدة جداً ومختلفة وأهم حاجة التجديد فيها هي "الخامة" و أقرب شيء للفرح هو "الستان" وأكثر لون مستخدم في كروت الفرح الستان هو "الأوف وايت" أو "الروز"..
أما التصميم الخارجي فالعروسة بتختار وتقترح التصميم ويتم تجميلة في الآخر ويمكن تجميلة بالإكسسوار والورود، وممكن وضع وردة أو شريطة و(الدرابية) على الحرف عشان الشيكولاتة
لماذا لايكون الستان الأبيض؟
إن اللون الأبيض في الستان بالذات لازم يكون غالي جداً وإلا هيظهر شكله مش حلو ويقلل من قيمته.
ولماذا الدانتيل بشكل ثابت مع كل ستان؟
الدانتيل أنسب حاجة لشياكة الستان، وهو أهم حاجة تميز قطعة الستان والناس بتعرف بسرعة الدانتيل الغالي من الرخيص.
أما الستان في مصر فأسعاره معروفة ومناسبة، وبجانب الدانتيل يتم عمل البرودريه وهو نوع من أنواع التطريز اليدوي، وأصبح له ماكينة خاصة وعبارة عن خيوط وألوان ورسومات متداخلة مع بعضها، وفي صورة ثانية يتم الاستغناء عن الدانتيل ووضع الدراي فلاور ودرابيه ذهبي.
وهل يوجد صعوبة في كتابة محتويات الكارت على القماش الستان؟
طبعا فيه صعوبة؛ لأن مش أي قماش يقبل ويناسب كتابة "السلك سكرين" لأن فيه قماش كان رائع لكن خامته لا تقبل كتابة "السلك سكرين"؛ لأنه ممكن يظهر مش شيك أو يشرب اللون، وبالتالي يفقد شكله، ولأن التصميم بيكون "هاند ميد" فمن اللازم الاعتناء بالتفاصيل
إيه هو السلك سكرين؟
هو نوع من أنواع الطباعة اليدوية الخاصة بالأقمشة ومن أدق أنواع الطباعة القديمة وتعطي قيمة ورُقيّ.
وإيه نوعية الخطوط التي تمشي مع القماش الستان؟
تترك الحرية للعروسة؛ لأن فيه بنات بتفهم يعني إيه "هاند ميد" يعني فيه مثلا بنت تقول عاوزة الكلام يتكتب على يد خطاط وده بيكون غالي شوية وبياخد وقت، وفيه بنت تقول عاوزة خط زي الرقعة أو النسخ وأحيانا فيه بنات تجيب خط معين يتم تنفيذة أما "السلك سكرين" بالذات عاوز خطوط شيك عشان يظهر جمال الكارت..
معنى كده إن العروسة بتهتم بالكارت الستان زي اهتمامها بالكوشة والماكياج؟
العروسة تعتبر الكارت هو عنوان للفرح كله؛ فمن خلال الكارت نعرف ذوق العريس والعروسة ومستواهم الاجتماعي وشكل الفرح هيكون عامل إزاي ومن أصول الإيتيكيت والذوق إننا ندعو الناس على الفرح عن طريق الكارت وخصوصا المعازيم الـVIP، وعلى فكرة فيه ناس ما بتروحش الفرح إلا لو أخذت الكارت من العروسين.
يعني لازم العروسة تسلّم الكارت بنفسها وتسلمه للمعازيم قبل الفرح؟
الفرحة هي التي تجعل العريس والعروسة يقدموا الكارت بأنفسهم وبيكونوا حريصين على كده ولكن ممكن الأم أو الأب يرسلوا الكارت إلى الشخصيات الـVIP ويسلم قبل الفرح بحوالي 17 أو 18 يوم.
هل فيه صعوبة في توصيل الكارت الستان عن طريق البريد؟
في حالة إرساله بالبريد يتم عمل غلاف كرتون شيك عشان يوصل في البريد أما في حالة تسليمه باليدفيتم عمل كارت صغير جدا على طرف الستان يكتب عليه فلان وحرمه وفلان وحرمه.
وإيه اللي يميز الكارت الستان عن الكارتون؟
إن الكارت الستان بيعيش ويستمر مدة أطول ولا يتعرض للبلل ولا يوضع في الأدراج وممكن الكارت المفرش الموجود في الصورة مثلاً يتعمل له (فريم) والعروسة تضعه في الصالون أو غرفة المعيشة والأشكال التانية ممكن توضع على تابلوه أو تستخدميه كإكسسوار أو ديكور في المنزل.
وطريقة تنظيفه ازاي؟
ممكن نحميه بوضعه في الظرف الخاص به وهو عبارة عن تول أو ستان أو أورجانزا وممكن نجيب فوطة بيضاء ونضع عليها شامبو أو أي مواد تنظيف ونمسح قطعة الستان بالدانتيل كلها بالإضافة إلى أن "السلك سكرين" عمره ما يختفي أو يبهت أو يغير لونه.
استايل الكروت في الدول العربية والأوربية؟
بالنسبة لأوربا مثلا يوجد عرب عايشين في لندن ومصريين عايشين في كندا و الدول الأوربية بتعشق وتنبهر بـ "الهاند ميد"، وكل الكروت في أوربا عبارة عن "كارتون" ولكن غاية في الدقة والشياكة، وعندهم عادة حلوة جدا إنهم يكونوا حريصين إن الأب والأم يدعوا المعازيم يعني يكتبوا السفير الفلاني وحرمه والدكتور فلان وحرمه يدعوان....
على عكس الدول العربية الكروت عندهم من أساسيات الفرح والأم هي التي تدعو الناس يعني يكتبوا السيدة فلانة والسيدة فلانة تدعوان ............... ولا يكتب اسم الأب هذه عادات وتقاليد عندهم ويهتموا ويفتخروا بكل شيء مبتكر وغير مألوف.
