بموت وتعبانة حالي مايصرف انصحوني

خ

خرزة زرقة

عروس رائعة

11-07-2008 | 01:25 AM

هلا خواتي انا وايد وايد تعبانة وخاليفة على عمري وعلى اللي في بطني

انا الحين بنهاية الثامن وبموت من الضغط اللي تحت وانا اراجع بالكورنيش والمشكلة ارجع البلاد واقعد عند اهلي لانه ماعندي سكن في بوظبي واخاف اربي في خورفكان ومستشفى مالهم لوث ومشاكل وايد

وخايفة يصير شي واولد فالبلاد لكن مب هاي المشكلة يوم رحت عندهم الطوارئ احتشرت الدكتورة اونه ليش يايه اتعالج قلت لها وين عيل اروح

قالت روحي اتعالجي في بوظبي قلت ليش انا عندي ملف بالخور بس ماكنت اراجع عندي بس كم مرة اذا يصير شي اروح لهم وعادي

وصار بيني وبينهم نقاش حاد وعصبية المهم خايفة اربي عندهم ويبهدلوني لانه الواحد مايضمن موعد الولادة

المهم انا حاسة بضغط كبير تحت ونسبة الافرازات قوية وعندي التهاب بعد

المشكلة الكورنيش اروح المواعيد بس ريلي يقول بنقعد بفندق طول الفترة الشهر التاسع بس بيزات يباله الفندق

حرام ريلي متوهق وايد.................والحين ابي اعرف هاي الاعراض اللي احسها عاديه والا توحي بقرب الولادة لانه يمكن يمكن تصير عندي ولادجة مبكرة بسبب الاسهال الزفت

وخايفة اطوف موعد الولادة وجي بنخسر قعدتنا وبيزاتنا بالفندق

خبروني هل الولادة الثانية للحامل مرات اتصير باول التاسع والا عادي اتم لموعدها

.

..★شـــااانيل★..

مشرفة سابقة

11-07-2008 | 04:05 PM

خرزه حبيبتي
انا تابعت كل مواضيعك الي منزلتيهم ورديت عليج
ولاحظت انك وايد متشائمه
ليش حبوبه
شيلي ها الافكار من راسك
وهوني على عمرتج
وقري قران وتعوذي من الشيطان
ولا تعصبين نفسك مو زين لتج او للجنين
سمعيني عدل000000000000
قعدي مع زوجك وقوليله ياخد اجازه اخر اسبوعين من التاسع وخذو شقه مفروشه وجلسو فيها مع بعض يمكن نفسيتك نهدى شوي
اما بالنسبه للافرازات اذا كانت مصاحبه بدم فهذي علامات ولاده
ومو شرط الحمال الثاني تولدين ببدايه التاسع انا في ولادتي الثانيه طوفت على شهري
الله يهون عليتج

ا

ام خلييفه

عروس مبدعة

12-07-2008 | 11:56 AM

الله يكون في عونج والله الوحده ما تعرف متى ساعة الولاده...بس انتي حسيتي بشي مش طبيعي طلعي من خورفكان...مثل نزول دم واو نزول الماي الم قوي ... يلين توصليين بوظبي انشالله بتربيين نفس اليوم...
الله يقومج بالسلامه...

a

angel eyes

مشرفة سابقة

12-07-2008 | 05:50 PM

غاليتي خرزه

ليش جيه انتي دايما متشائمه وكل مواضيعج مضايجه فيها و شاله هموم الدنيا على راسج؟؟ الحمل فتره حلوه من حياه الحرمه..مب فتره تشاؤم و ضيج وهم...صح الوحده تواجهها مشاكل و عقبال في الحمل..بس لازم تستحملين و تتفائلين ان الله بيسر لج امورج...احس منكده على ريلج و عالياهل اللي في بطنج...سامحيني حبيبتي بس احسج مكبره الواضيع...و احمدي ربج على كل حال ترا فيه ناس يتمنون الحمل و يتمنون يحسون بلذته و مب محصلين...

انتي اصلا وين ساكنه؟؟؟؟؟ واهلج وين ساكنين؟؟؟؟؟؟واذا ربيتي ما بتحتاجين اهلج؟؟؟؟ وولدج وين بتخلينه؟؟؟؟

يوم تسيرين موعدج الياي في بوظبي اسألي الدكتوره عن وضعج واذا بتربين قريب ولا لا...ترا ينعرف حسب اذا متوسعه واذا البيبي راسه نازل تحت ولا لا..وعموما اكيد عندج موعد كل اسبوع في التاسع فبتسيرين اسبوعيا و بيقولون لج عن وضعج...اذا قالولج في توسع والبيبي راسه في الحوض وحسيتي بالام الطلق( مب الام الثجل) اكيد بتميزينهم لانه مب اول طفل لج...هاييج الساعه احجزولكم فندق او شقه مفروشه...وحتى اذااااااااااا يتج الالام فجأه...على طووووول صكوا درب لين بوظبي..يبالكم اظن 3 ساعات..وما اظن بتربين من بدايه الطلق لين عقب 3 ساعات...خصوصا اذا الماي ما نزل...بس اذا نزل الماي و حسيتي خلاص بتربين..مالج مفر...وربج كاتبلج هالشي..سيري مستشفى الخور...

الامور تنحل بالهداوه و بالتفكير ..لا تشيلين نفسج هموم اكبر ممن حجمها...واللي كاتبنه ربج بيستوي

ع

عيون بوظبي

مشرفة سابقة

13-07-2008 | 12:08 AM

كلام انجل عين العقل حبيبتي ..

استانسي بهالفترة ... ترا بقولج الافرازات لازم بتكون زيادة .. وبتزيد بعد شي طبيعي

واذا عندج التهاب المفروض الدكتورة اتعرف .. ولج علاج .. او انه شي بسيط وما يأثر ...

والثقل طبيعي .. والضغط على تحت طبيعي وايد .. بالعكس هالشي يطمنج انه الراس نازل يعني افرحي .. :)

وحبيبتي متى ما تيج الولادة مب لازم اتربين في مستشفى الخور ..

يعني انتي ولادة لو سرتي مستشفى في دبي او الشارجه ماظني ما بيستقبلونج عادي انتي حالة طارئة ..

وفي شي ثاني .. مرة كتبتي مادري شو لقوا فيج وانتي في السابع وكتبتي انج رايحة المستشفى وبينزلون الياهل او بيولدونج من وقت .. شو صار وقتها وشو كان فيج ؟

بس في الاول والاخير حبيبتي استعدي للولادة وافرحي ترا الي تمرين به طبيعي .. اللهم المكان والمواعيد ازمة وان شالله تلاقين لها حل

خ

خرزة زرقة

عروس رائعة

13-07-2008 | 10:51 PM

الله يهديكم انا طلبتكم عون صرتوا علي فرعون حشا مب قادرة اشكي همي اوكيك بقول كلامكم عين العقل لكن انا الحمدلله مب متشائمة بس يوم اكتب في النت اشرح لكم حالي وانا اقرا يوميا قران واصلي وملتزمة بقيام الليل والحمدلله احمد ربي على كل شي

والحمل مب دوم يونس الوحدة انا الحمل عندي مرض حتى الدكتورة قالت لي جي لانه مناعتي ضعيفة يمكن انتوا صحتكم تمام واتحسون عمركم بالحمال عاديات انا حتى الصابون مااقدر استخدمه

بس المشكلة ماالومكم انتوا مااتعرفون الحالة ووين ريلي يحصل شقة مفروشة هالحلول اكيد بنفكر فيها بس فيه ظروف مااقدر اقولها لكم طبعا ربي العالم بالحال

ورحت امس وشيكت طلع راس الجنين فوق ورجليه تحت والثقل الدكتورة قالت من الرحم نازل وقالتلي الولادة مب شرط تكون اول التاسع

والافرازات سببها التهاب حاد بالبووووووووووووووول

والتهاب في الرحم

فهمتوا انتوا فسرتوا شي وانا افسر شي بس صج محد يدري بالحال

وعلى فكرة انا مب منكدة على ريلي ..............ريلي حاسس فيني وبحالي ولله الحمد

بس كلمة حق تنقال حاسة اني مب قادرة اكتب اي شي اعبر عنه الا وحصلت رد ....؟؟؟؟؟؟؟؟؟؟؟؟؟؟؟؟

ف

فرروحه عروس

عروس فضية

13-07-2008 | 11:07 PM

حبيبتي انا وقت الولاده نزلت مني افرازات لونها اصفر
ريحتها مو حلوه
بس انتي ممكن حاله تانيه
الله يسهل لك

خ

خرزة زرقة

عروس رائعة

13-07-2008 | 11:11 PM

بسم الله علي انا مافيني اعراض ولادة اشفيكم

بعدني ثاني يوم من اللتاسع

u

um lina

عروس مشرقة

13-07-2008 | 11:41 PM

ياحياتي ليش زعلتي احكي وفضفضي

وإذا ع الضغط هذا أنا لسى بالخامس وربي ضغط فضيييييييييييع اسفل بطني

والبيبي لسى تحت تخيلي قربت ادخل السادس ومو راضي يطلع فوق

والالتهابات حبيبتي

احكي لك معاناتي انا بالحملين السابقه

كانت تجيني التهابات وربي تذبحني

ينزل وانت بكرامه بالنهايه دم

ويصيروا الدكاتره يخوفوني يقولوا احتمال تولدي مبكر

لاومره طلعوني من المستشفى على مسئوليتي

والله والله مااولد غير بوقتي واحس كمان اني اتعدى وقتي

بس برضوه ياحلوه دام دخلتي التاسع ممكن تولدي باي وقت

ا

ام نبراسي

عروس فضية

14-07-2008 | 05:31 PM

ربي يسهل عليج ويقومج بالسلامه انتي والبيبي

ر

ريم81

عروس ماسية

14-07-2008 | 11:01 PM

الله يقومك بالسلامه

احيانا الحامل نفسيتها تتعب لما تحتار و ما تعرف تختار

اختي

بصراحه ما انصحك تولدي بمكان لا فيه حد من اهلك و تقعدي بفندق

اختي الولاده ولاده اولدي بين اهلك و بعدين ارجعي بيتك معززة مكرمه

اختي السفر وقت الطلق مخاطره كبيره

يعني لو صار شي على الطريق مين المسؤول

انا عارفه انك حابه تولدي بالكورنيش

بس إذا هو مو باليد خلاص انسيه

فكري باللي في يدك و تقدري عليه

ن

نوووسهUAE

عروس ماسية

15-07-2008 | 03:10 AM

الله يسهل عليج

انا اختي ماكانت تراجع في مستشفى الخووور ابد وملفها فاضي

يوم الولادة الدكتورة عصبت عليهااااا لانهم مايعرفون عن حالتها وشو طبيعة حملها

بس الحمدلله تيسرت الامور
بس اشوي النيرسات تعاملهم دفش

خ

خرزة زرقة

عروس رائعة

24-07-2008 | 10:39 PM

خلاص بولد بالخور احسن والكورنيش اصلا صاير ارف ومب مرتاحه لاسلوبهم والدكاترة طبعهم ارف بعده بالخور الدكاترة اهلنا يعرفونهم

صج محد يامن على حد ربنا يستر

ب

بحرينية أصل

عروس ماسية

24-07-2008 | 10:44 PM

عيون بوظبي;6606392:
كلام انجل عين العقل حبيبتي ..

استانسي بهالفترة ... ترا بقولج الافرازات لازم بتكون زيادة .. وبتزيد بعد شي طبيعي

واذا عندج التهاب المفروض الدكتورة اتعرف .. ولج علاج .. او انه شي بسيط وما يأثر ...

والثقل طبيعي .. والضغط على تحت طبيعي وايد .. بالعكس هالشي يطمنج انه الراس نازل يعني افرحي .. :)

وحبيبتي متى ما تيج الولادة مب لازم اتربين في مستشفى الخور ..

يعني انتي ولادة لو سرتي مستشفى في دبي او الشارجه ماظني ما بيستقبلونج عادي انتي حالة طارئة ..

وفي شي ثاني .. مرة كتبتي مادري شو لقوا فيج وانتي في السابع وكتبتي انج رايحة المستشفى وبينزلون الياهل او بيولدونج من وقت .. شو صار وقتها وشو كان فيج ؟

بس في الاول والاخير حبيبتي استعدي للولادة وافرحي ترا الي تمرين به طبيعي .. اللهم المكان والمواعيد ازمة وان شالله تلاقين لها حل

انجل كلامها صحيح وعين العقل (y)