حيّا الله عرايسنا الحلوين...
هذي الكيكة، تقدم دافية، و مع كوب كوفي مممممم يا سلاااام :)
أنا سويت نص المقادير، لكن بكتب لكم المقدار كامل...
بسم الله نبدأ...
نجهز صينية كيك مستطيلة أو مربعة، و ندهنها بالزبدة، و نحمي الفرن على حرارة 325 فهرنهايت=160 مئوية...
مقادير الكيكة:
125غ = إصبع و ربع زبدة بحرارة الغرفة
نص كوب سكر
بيضتين
كوب طحين
1 و نص ملعقة صغيرة بيكنج باودر
1 ملعقة كبيرة حليب بارد
3-4 تفاحات (يفضل إستخدام التفاح الأخضر)، مقشر و مقطع شرايح رقيقة... (قطعوا التفاح قبل ما تصفونه عالكيكة على طول، عشان ما يصير لونه بني)...
نص كوب مربى مشمش، ندفيه شوي عالنار
أول شي نخلط الزبدة مع السكر...
بعدين نضيف عليهم البيض و نخلط لحد ما يمتزجون مع بعض...
في الأخير، ننخل الطحين و البيكنج باودر على مقدار البيض...
خليط الكيك بيكون عندنا ثقيل شوي، مو سائل مثل الخليط العادي، فنحطه بصينية الفرن اللي جهزناها، و نساوي الوجه...
نجيب بعدين شرايح التفاح و نصفها على الوجه، و ندهنها في الأخير بمربى المشمش اللي دفيناه...
ندخلها الفرن لمدة 40 دقيقة... و هذا شكلها لما طلعناها...
نخليها 10 دقايق قبل ما نقطعها، و في هالوقت نجهز صوص التوفي...
نص كوب سكر بني
نص كوب كريمة خفق
50غ = نص إصبع زبدة
نرفع المقادير في قدر صغير على نار متوسطة...
نحرك المقادير بدون ما نغليها، لحد ما يذوب السكر، بعدين نزيد الحرارة، و أول ما تغلي نرجع نخففها مرة ثانية... و نخليها تغلي بهدوء لمدة 3 دقايق، أو لحد ما يثقل الصوص...
نقطع الكيك و نوزعه في صحون، بعدين نصب عليه الصوص على طول... و هذا شكله...
و هذي صورة عن قرب...
أتمنى إنكم تجربونها، لأن طعمها رائع... و بالعافية عليكم (f)
