ساعدوني ادري اني السبب بس احتاجكم بسرعه ..؟؟

بليز ساعدوني حمود صاير لا يطاق الكل يعصب عليه من حركاته لي صدق صدق يطلع الواحد من طورة ..
تخيلوا كل شي يفره ولا يهتم إذا هالشي يعور ولا ثقيل ولا ممكن إن يأذي احد ... وأحس لا إراديا يسوي هالشي لأني اهدده إني بعطية دوا مر وصدق أعطيه ويصيح يقولي ما بسوي آخر مرة وعقب ثواني يرد يسوي يفر إلي في يديه ويقولي ما بسوي كأنه ناسي .. ولا يوم نحطله الأكل لالالالالازم ينثره ويخيس كل مكان .. المشكلة ما شاء الله عليه ما يخاف من احد..

المشكلة أنا بقولكم أنا نحن من يوم هو صغير نعصب عليه ونضربه وخاصتا أبوه عصبي وبسرعة يضرب .. وأهل زوجي واايد كانوا يعصبون عليه عشان يروه عمتي إلي من سن حمود ... فأحس إن تولد عنده نوع من الصراع أحس إن يحس الكل ما يحبونه يحاول يننرفز الكل بحيث إن ينط ويضرب إلي يعرفهم أو ما يعرفهم من اليهال وإذا الكبار كلموه يطلع لسانه ولا يتفل ..

ادري إني غلطانه من البداية وأحيانا ايلس بيني وبين نفسي أقول ما يضربه من اليوم ورابح لأنه نحن وصلناه لهاي المرحلة استحمله نص نهار وأحاول افهمه إن إلي قاعد يسويه غلط واشرحله ويوم يرد يسوي الحركة مرة ثانيه افقد أعصابي واضربه ولا أعطيه دوا المر ولا اعصب عليه ..

قالولي السنة إلي طافت دخليه الحضانة خفت عليه من نشت الصبح قلت خليه يتهنى في نومته لاحق على نشت الصبح ، الحين كمل 3 سنوات قلت بدخله المدرسة وديته دبي الدولية قالتلي نحن نقبل بس يفضل من ال4 سنوات لأنه الياهل إذا دخلتيه قبل يتعب ويكون بطئ فالكتابة وكل ما يكبر مستواه الدراسي يقل.. والسنه اليايه سنه بيكوون وايد مناسب للدراسة لا بيكون متاخر ولا مجدم .. طلعت من هاي المدرسة سرت مدرسة ديره الدولية قالولي نقبله من 4 سنوات كيجي 1 يعني السنة الياي .. رحت مدرسة دبي الوطنية قالتلي نقبله يوم سالت عن الدراسة قالتلي نعطيه عربي دين رياضيات تربية وطنيه حسيت وايد على طفل كبداية يأخذ كل هاي المواد .. فالنهاية وديته مدرسة الاتحاد الخاصة في الممزر قالولي نقبله بري كيجي إلي هي قبل الكيجي بس لأني سرت وايد متأخر ووقفوا التسجيل ... مب عارفه شو أسوي في هالولد ...

زوجي قال ودية الحضانة .. درنا على الحضانات :

@ حضانة منتوسوري الخليج: يعلمونهم مهارات يهيئونهم على مسكت القلم بطريقه غير مباشرة يعني يمرنوهم يمسكون الأشياء بحيث أنهم يعتمدون على أصابعهم .. منهج منسوري واغلب اليهال من الشعب الحبيب (اللبنانيين) ومنهجهم بريطاني

@ حضانة شارع الحجر الأصفر: موجودة في جمعية القرهود المدرسين كلهم هنود بس عيال الأجانب ما شاء الله عيال الأجانب الشقر محتلينها وما حصلت مكان واصلا ما كنت بدخله لأنه كلهم هنود من الإدارة والمدرسين والريحه .. لكن كل إلي اعرفهم دخلوا عيالهم مدحوها..

@ الحضانة الأماراتيه البريطانية : وأخيرا استقريت على هاي المدرسة مع إن زحمه بس شو أسوي وبعد يعتمدون على المهارات وما عندهم إلا الانجليزي يعني ما يعلمون لا عربي ولا دين ولا شي


نصحوني كيف أتصرف ويا حمود عشان أغير من طبعه وأخليه إنسان مسالم وحنون خاصتا على أخته إلي راقدة ولا قاعدة مأكلنها ضربه ولا فلعه ..

والي دخلوا عيالهم المدارس من أي سن بديتوا ....؟؟؟

والي عيالهم صغار ما وصلوا لهاي المرحلة من أي سن بدخلونهم ..؟؟