معاناتي مع إزالة الشعر- أتمنى مساعدتج لي يابنت عذاري

مرحبا يا بنات

صار لي فترة طويلة وانا اتصفح هالمنتدى وما تتصورون اشكثر استفدت من المواضيع اللي فيه،احسن انه الموقع متكامل ويحتوي على كل شي تحتاج له البنت من نصائح وارشادات وطرق المحافظة على الجمال بشكل عام ،وهو منتدى ناجح بكل ما في الكلمة من معنى وهذا إن دل فإنما يدل على ان في إدارة متميزة وراء هذا النجاح ، انا تقريبا متواجدة يوميا في هالموقع اقرا اليديد واستفيد من تجارب الكل، في البداية كنت ادخل الموقع واقرا المواضيع كزائرة فقط من غير ما يكون لي اي مشاركة ، بس من فترة قريبة قررت اني اشترك واكون عضوة في هالمنتدى عشان افيد واستفيد في نفس الوقت وبصراحة هذا اول موضوع لي واتمنى من الكل انه يساعدني وبالذات بنت عذاري ، وانا متأكدة بأنكم ما راح تخذلوني لاني من خلال مروري اليومي على كل المواضيع حسيت فيكم روح الرغبة في المساعدة وبصراحه عندي مشكلة شخصية اعاني منها من زمان ومب قادرة اتخلص منها او ألاقي لها حل فقلت اطرحها عليكم يمكن تقدرون تساعدوني وانا أتمنى انكم تساعدوني وخصوصا انتي يا بنت عذاري

مشكلتي هي اني يوم اسوي حلاوة ،جسمي يتحسس وتبدا الحبوب تظهر مع حكة شديدة وشي ارف ويكون المنظر الله لا يوريكم، هي الحبوب ما تظهر من أول يوم بالعكس أول اسبوعين يكون كل شي اوكي يعني جسم نام وصافي من غير أي حساسية، بس بعد اسبوعين ومع بداية ظهور الشعر تبدأ معاناتي: حبوب و التهابات واحمرار وحكة فظيعه ، فكرت اني اغير الحلاوة واستخدم اشيا ثانية المكينة مثلا بس نفس النتيجة جسم ناعم لمدة اسبوعين ومعاناة مع الحبوب والاحمرار والحكة لمدة شهرين او ثلاث، جربت كل الطرق: الكريمات والموس النسائي بس ماشي فايدة، دايما تتكر نفس المعاناة (أول اسبوعين جسم ناعم وصافي وبعدها تبدأ تظهر الحبوب وتستمر الحبوب فترة طويلة يعني مرات شهرين وأكثر لين تختفي تماما ويرجع جسمي مثل ما كان)

طبعا لانه الحكة تكون فظيعه كنت اروح دايما لدكتور الجلدية وكان يعطيني كريمات تخفف الحكة بس، ولما كنت اساله عن علاج لها الحالة كان يقولي انه انا جسمي حساس وما يستحمل هالاشياء، والأفضل اني ما اشل شعر نهائيا،بس انا ما استحمل اني ما اتنظف :(. انا قريت كذا موضوع في هالمنتدى او منتدى ثاني وحسيت انه الحالات مشابهه لحالتي وانه في كريمات تنباع في الصيدليه عشان هالشي بس انا ما احب استخدم اي شي إلا لما اسأل مجرب (والمثل يقول إسأل مجرب ولا تسأل طبيب).وانا حابة أسألكم لاني سألت طبيب وما فادني :(

اتمنى انكم تعطوني من وقتكم دقايق بس تقرون موضوعي وتردون علي واللي عندها نفس مشكلتي وانشالله ما يكون في حد، أو سمعت بها وعندها حل تدخل علي وما تبخل بردها.

أسفة عالإطالة وبأنتظار ردودكم

تحياتي