اذا ملكتي كلمي زوجك 00واذا ماكلمتي الله يعينك

مساء الخير

/اليوم بتكلم عن موضوع حساااااااااااس جدا كالعاده الله يكتب لي الاجر بس

شوفوا ياحلوين انا لما ملكت على زوجي ماكان عندنا وقت طويل عشان اعرفه واتعرف عليه وافصفصه واشخله واطلع اللي فوقه وتحته كانت المده بس شهر واحد
مع ان احنا كنا نكلم بعض ونطلع تقريبا كل اسبوع لكن والله يابنات اني ماقدرت اعرف عنه الاشياء اللي عرفتها بعد الزواج
مع اني حريصه كل الحرص على اني اعرف هذي الاشياء لكن المده كانت قصيره

بقولكم قصه بنت خالتي البنت هذي مسكينه الله يعوضها بس تملكت على ولد خالتها ويصير ولد عمها بنفس الوقت وكانوا عايشين مع بعض طول حياتهم وحتى كانوا يتشابهون بالشكل كانهم اخوان وكلنا كنا نقول انهم بيعيشون مع بعض احلا عيشه لانهم يعرفون بعض من هم صغار لكن البنت هذي لما تملكت وصار زوجها بالحلال رفضت تكلمه من باب التغلي والدلع وعشان يشتاق لها ويحبها اكثر وكلنا قلنا لها كلميه بس للاسف كانت تتغلي وتدلع وهو بنفسه يدق عليها وماترد المشكله انها قبل الملكه كانت تجلس معاه وياكلون سوا ويسولوفون ويكلمون بعض بين فتره وفتره لكن من ملكت عليه رفضت تكلمه والنتيجه 00000000000تزوجت وقعدت معاه 10 ايام فقط ورجعت بيت اهلها وتطلقت منه ليه ؟؟ تقول عصبي ودمه حار وبخيل ويحب ينام ويكلم بنات طيب وينك عن هذي الاشياء قبل الدخله كانت فتره ملكتهم وخطوبتهم 4شهور ليش ماعرفتي ذ الاشياء قبل لوانها كانت تكلمه وتدق عليه كان تشوف انتظار تعرف انه يكلم لوانها تسولف معاه وتتناقش معاه كانت عرفت انه بخيل وعصبي والخ

القصه الثانيه قصه صديقتي بعد الملكه كلمت زوجها وكانوا يسولفون عن اشياء تافهه مثل وين رحت اليوم وش شريتي ؟؟ وين بنحط زواجنا ؟؟ وين بنسافر؟؟ ولماتزوجت اكتشفت في صباحيه زواجها مسكينه انه يدخن والبنت مسكينه عندها حساسيه فضيعه وتنكتم من الدخان والبخور ومسكينه انصدمت وتقول لو عرفت قبل دخلتي انه يدخن كان والله ما اتزوج لكن للاسف ماعرفت الا صباحيه زواجها وخلاص ماتقدر تسوي شي لانها لو تطلقت او زعلت وراحت لهلها كان حطوا العيب منها والمصيبه التانيه انه ما اثث البيت شقتها فاضيه والطامه الكبرى لما صحى من النوم صباحيه العرس اخذ بعضه وراح لأمه ويقول فيها سرطان وتاخذ كيماوي ولازم اقعد عندها طول اليوم مسكينه تقول دايما كنت اشوف امه وخواته ولادريت ان امه مريضه يعني تخيلوا يابنات
كذب عليها وغشها وراح وخلاها بعد طيب هي لوانها كانت تسأله وتروح تشيك على شقتها وتشوف بيتها قبل الدخله كان ماصار اللي صار

يابنات صحيح التوفيق من الله واللي كاتبه ربي بيصير لكن انتوا لاتعطون الرجال مجال انه يخدعكم ويغشكم انتبهوا
انا اكتشفت في زوجي عيوب لوكنت عارفتها قبل الدخله كان حطيت النقط على الحروف وعرفت اتصرف معاه ما اقولكم اني بتركه لكن بيكون عندي استعداد نفسي وبكون عارفه العيوب هذي وبتقبلها وبغيرها لكن كذا خبط لزق لاوالله
بتقولون كل الناس فيهم عيوب ومحد كامل بقولكم صحيح بس بعض الناس عيوبهم تغطي على حسناتهم بعض الناس عندهم عيوب لاتطاق ولاتحتمل
بس البنت اللي تكلم زوجها وتقعد تسولف وتدلع وتتكلم كلام حب وغرام واذا طاح الفاس في الراس جات تبكي وتتبكبك تتحمل نتيجه غلطها يختي لااااااااااااحقه على الحب والغرام حبيه ودلعيه وتدلعي وسوي اللي تبين اذا رحتي في بيته بعد الدخله لكن قبل كذا تعرفي على شخصيته تعرفي عليه

تعال يافلان انت وش هدفك من الحياه ؟؟ وش طموحك ؟؟ ليه فكرت في الزواج؟؟
اذا قالك والله اهلي يبون يزوجوني اعرفي ان الولد فلتان وصايع واهله زوجوه عشان يعقل من وجهه نظرهم مايدرون انهم يعذبون بنت الناس معاه واذا قالك ماعندي طموح ولا هدف اعرفي انه انسان بس ياكل وينام المفروض يقول والله انا هدفي من الزواج اعف نفسي ابي اجيب لي عيال يشيلن اسمي واربيهم تربيه صالحه ينفعوني وينفعون مجتمعهم هذا تمام

بعدين اسأليه
يافلان الله يسعدك قولي برنامجك اليومي ؟؟ كيف تقضي الويك اند ؟؟ وين تروح بالأجازه ؟؟
اذا قالك اصحى من النوم واصلي واطلع الدوام معناها انه يصلي الفجر متأخر واذا قاك الويك اند اطلع مع اخوياي واسهر معهم اعرفي انه بعد الزواج بينساك ويسهر في الاستراحات ويتبطح فيها واذا قالك انا كل اجازه اسافر مع اصحابي ثقي تمام انه بيتركك انتي وعيالك وبيسافر مع اخوياه وماخفي كان اعظم
اما اذا قالك انه يسافر مع اهله معناها لك نصيب من السفره لكن اذا له خوات بيغثونك في السفر واذا قالك الويك اند اقعد مع اهلي واخلص لهم اغراض بعدين اطلع مع اصحابي معناها انه مظم وقته
اسأليه حبيبتي العروس وش رايك بالبنات اللي يلبسون عبايات مخصره ويتبرجون ؟؟ شرايك في الشباب اللي يلبسون بناطيل نازله وباينه ملابسهم الداخليه ؟؟ قولي له شرايك بالشباب اللي يحفون حواجبهم ؟؟ شرايك بالشباب اللي يلبسون سلاسل ؟؟
كذا حبيبتي بتعرفين هو من اي نوع
اسأليه عن بيتكم ؟؟ عن عش الزوجيه ؟؟ كم غرفه بيتنا يافلان ؟؟ طيب الله يسعدك وشلون غرفه النوم ؟؟ طيب يافلان الله لايهينك ترا بجي ارتب اغراضي قولي له يوريك عقد الاجار لان فيه بنات مساكين انضحك عليهم استاجر لها شقه مده شهر وبعدين رجعها عن اهلها او عند اهله وفي بعضهم يكون زواجه تحدي او يبي يقهر وحده والله من جد كذا صار مع بنت عمتي تزوجت واحد طلع متزوجها يبي يقهر بنت عمه لانه يحبها وتزوجت غيره ويوم قهرها طلق بنت الناس
وفي وحده انا اعرفها تزوجت ولد عمها ووعدها انه بيسكن مع اهله بس شهرين وبعدين بيطلعون ولما جاء بعد شهرين يبي يطلع وقفت له امه وقالت تبي تطلع اطلع بس تصرف على بيت ابوك كأنك ساكن معنا ومسكينه رجعت تسكن مع اهل زوجها طول عمرها لان زوجها ماعنده مقدره يصرف على بيتين والمشكله ان له اخوان موضفين وله ابو عايش سليم معافي وعنده راتب لكن الحسد والغيره والبنت مسكينه تقعد عن زوجها بعبايتها لان اخوانه ملي البيت

قولي له يافلان الله يوفقك تكفى ورني عقد بيتنا بيقولك ليش منتى مصدقه قولي لامصدقتك بس ودي اشوف عقد البيت اللي بيجمعني فيك ابي اشوف عقد اعشه اللي بتجمعني بسيد الرجال ومن هالكلام الحلو تمسكني تمسكني وسوي نفسك ضعيفه عنده لكن اذا جاء على حساب كرامتك واحترامك وسمعتك كشري عن انيابك و وريه وجهك الثاني
يابنات ياحبيباتي ياخواتي انا لما ملكت ماكان عندي اللي استشيره واخذ رايه ماكان لي احد اكبر مني كل خواتي صغار ولما كلمت زوجي كانت المده بسيطه ماقدرت اعرف الا بعض الاشياء لكن لما تزوجت اكتشفت انه عصبي جدا جدا واذا رحنا لسوق او مطعم لازم لازم لازم يتهاوش مع الموضفين والعاملين ليه ؟ لانه يبي المثاليه في كل شي لو انا كنت عارفه اشي هذا قبل الدخله ما اقولكم برفض الزواج لكن بصير عارفه العيب هذا وبحاول اغيره مثلا ارجوك يافلان لاتتهاوش مع احد وانا معاك ركبني السياره بعدين ارجع تهاوش مع الناس وبكذا ماراح يمديه يوصلني السياره الا زال غضبه مثال ثاني اهله ثم اهله ثم اهله

اكتشفت بلاوي فيهم لوكنت عارفتها قبل الدخله كان ماسكنت معهم ولا عاشرتهم كان اروح اسلم وبس بعدين اكتشفت ان جماعتهم كلهم مقاطعينهم حتى عماتهم وخالاتهم مقاطعينهم وابو زوجي حى عزا امه ماراح له استغفر الله من قسوه القلب لوكنت عارفه الشي هذا قبل الدخله كان غسلت يدي منهم والشي الأدهى والأمر انهم يعبدون الريال يموتون بالفلوس يعني الواحد فيهم مستعد يركع لك اعوذوا بالله بس عشان تعطيه ريال واحد

ارجوكم يابنات انتبهوا لحياتكم خلو الحب والغرام بعدين لاااااااااحقين عليه اذا كلمتيه سولفي واضحكي بس ركزي على الامور المهمه مثل الصلاه والصوم و ركزي على علاقاته بالناس اذا هو شراني اذا هو طيب اذا هو اتكالي عديم المسئوليه كل هذي الامور انتي لازم تعرفينها

طبعا اذا قلتي له يافلان انت تصلي اكيد بيقول ايه نعم اكيد اصلي عشان كذا لاتوجهين له السؤال بطريقه مباشره جيبي السؤال بطريقه ثانيه مثلا اتصلي عليه يوم الجمعه الظهر قولي له كيف حالك ؟؟ وينك ؟؟ وش سويت اليوم ؟؟ اذا قالك ابد كنت نايم او توي صاحي او كنت اتغدى قولي له ليش اجل ماصلت في المسجد ؟؟؟
كذا بتعرفين اذا كان حريص على الصلاه ولا الصلاه ااااااااااااااااااخر همه
ترا الصلاه مهمه يابنات اقم صلاتك تنعم بحياتك صدقوني ماراح تتوفقون بشي ولاحتى برزقكم اذا زوجك مايصلي

شوفوا ياحلوين صديقتي متملكه من سنه ولانها كانت تكلمه وحريصه على حياتهم اكتشفت انه استغفر الله منحرف يعني يمارس الجنس مع الرجال والحمد لله تطلقت منه قبل الدخله وتزوجت واحد وجابت تؤام واللحين مبسوطه وخطيبها السابق مسجون

الله لايبلانا يابنات الوحده اذا انخطبت تستخير مره وحده وخلاص لا استخيري لين يتم الزواج
الصحابه اول كانوا يستخيرون في الشي مده شهرين او اكثر بعد
ماخاااااااااااااااااب من استشار ولا ندم من استخار والعكس صحيح

البعض منكم بتقول والله اهلي مايرضون اني اكلم زوجي بعد الملكه بقولكم من حقهم يخافون من المصخره اللي صايره في ذا الوقت البنت تملك وتحمل قبل دخلتها

من حقهم يخافون عليكم ياما بنات تملكوا وكلموا رجالهم وطلعوا معهم وصار اللي صار اخر شي طلقها قبل يوم العرس او الدخله لانها اكتشف انها خفيفه يابنات الثقل صنعه
الرجال يحبون الحرمه الثقيله الرزينه مواللي على طول تخق وتسعبل
انتبهوا خليك ثقل واذا كلمتيه وحاول يجيب لك سيره من هينا ولا من هينا ولا من عند السره وتحت على طول صديه وقولي له لوسمحت مااحب اتكلم في الامور هذي اذا صرنا في بيتنا سمعني كلام على كيفك لكن اللحين بدري علينا تونا بيقولك انتي منتي رومنسيه وانا اذا ما تكلمت معك انتي يزوجتي اروح لمين ؟؟ اروح للحرام ؟؟؟ انتبهي لا تتأثرين قولي له والله اذا صرنا في عش الزوجيه سوا اللي تبي لكن اللحين وانا في بيت ابوي لا ولوسمحت قفل الموضوع لاتخليني اندم اني كلمتك

واذا جاك البيت اثقلي اثقلي وسحبي فيه خليه يالله بالموت يمسك ايدك عشان يغليك اكثر ويشتاق للزواج ويخلص اموره بسرعه فهمتوا ماتعرفون المثل اللي يقول ((يتمنعن وهن راغبات ))خلاص اثقلي عليه بدلع مو بدفاشه واذا صار يتكلم دايم طالعي في عيونه لانه بيبان اذا كان يكذب من عيونه
وبعدين اسأليه عن الالوان اللي يحبها قولي يافلان وش رايك ؟؟ وش تحب من الالوان ؟؟ الفاتح او الغامق ؟؟ وش يعجبك اكثر الفساتين والا البناطيل ؟؟
لا تصيرون مثلي يوم جهزت وخلصت وتعبت نفسي بالماركات ومصممات الازياء ما اعجبه شي حتى صبغه شعري اللي كلن يسألني عنها وين ما اروح الناس ينجنون عليها ما اعجبت زوجي وقالي اصبغي شعرك اسود وانا تعبانه على شعري ولا اعجبه والملابس ماعجبته ولما خليته يختار لي جاب لي بلوزه الله لايوريكم تسد النفس لو اشوفها بريال ما اخذتها لخدامتنا لكن زوجي بينجن عليها وش اسوي لبستها عشانه واللي تقولك ماعليك من الرجال اذا قالك هذا موب حلو عانديه لا يابنات اذا عاندتي انتي بتخسرين بالعكس اذا كان زوجك عندك اللبسي الملابس اللي تعجبه حتى لوكانت مو حلوه وتعطري من عطره اللي يحب حتى لوانه ما يعجبك ولا هو ماركه واذا رحتى لصديقاتك واهلك اللبسي اللي يعجبك ترا الحرمه هي اللي تفهم يالماركات بعض الرجال ما يدرون
واذا طلعتي معه السوق ولا المطعم اللبسي واكشخي عشان ينشغل فيك ولا يطالع في غيرك واقصد باللبس والشياكه ان تكون عبايتك نظيفه ومكويه ويكون نقابك نظيف واللبسي ساعه حلوه وشوي خواتم وشنطه حلوه وافهموا زين انا ما اقصد بالتزين التبرج والعطورات الفايحه لا ارجوكم يابنات بدون عطورات حرام ترا لكن اقصد ان العبايه ما تكون مبقعه والنقاب فيه لطخه بيضاء ولا تكوني لابسه شبشب وحالتك حاله مفجوعه بس تبغين تشترين ترا السوق مو طاير زوجك اللي بيطير منك اذا اهملتي شكلك حاولي تمشين جنبه وتمسكين يده وتاخذين رايه بالملابس شرايك ياغناتي اخذ هذي البلوزه ولا اخذ هذا الحزام شرايك الصندل هذا يناسب مع شنطتي حتى لو ماعطاك وجه معليش مع الاستمرار بيتعدل انتبهوا ياحريم الوحده بس من تنزل السوق وهي فاغره وفاتحه فمها يختي انتبهي لزوجك لايطير منك اعوذوا بالله صايره اسواقنا كنها مراقص من التبرج والسفور وقله الحياء وذا شفتي وحده تطالع في زوجك عطيها نظره تخليها تظيع علومها اقعدي ناظريها لين تنزل عينها عشان تدري انك فاهمتها ترا البنات اللي في الاسواق ماتتجراء على الرجال الا اذا حرمته وراه مثل الخروف وحالتها حاله لكن اذا شافتك مهتمه بنفسك وبعبايتك ومظهرك الخارجي انتي وزوجك بتقول لاو الله هذي شكلها مهتمه بزوجها وماليه عينه وبتصرف نظر اللحين حتى الخدامات يغازلون والله والله ان فيه بنت صغيره يمكن عمرها 13 سنه وقاعده تغازل زوجي انتبهوا انتبهوا ياحريم انتبهوا
انا عن نفسي اذا بطلع مع زوجي اكشخ واللبس واهتم بشكلي وبشنطتي وساعتي وغيرها وتشوفون زوجي ينشغل فيني مسكين مايقدر يطالع في احد لانه يقعد يطالع فيني وفي الناس يشوف لااحد يطالع فيني لكن اذا رحت مع خواتي لاوالله عبايتي عاديه ولابسه جزمه رياضه وشكلي عادي جدا لاني لحالي ما معي زوج اخاف عليه من البنات اللي ماعندهم احد يربيهم

قالوا لفرعون ايش فرعنك قال ماقيت احد يحوشني والمال السايب يعلم السرقه

لاتلومين البنات وتقولين هم يغازلون زوجي لا لومي نفسك انتي اللي خليتيه يروح منك

واما اذا كان لزوجك خوات منكدين عليك عيشتك مثلي فأنتبهي هينا لازم تشغلين مخك
لا تنهارين وتقعدين تشتمين وتكبرين الموضوع لالا امسكي نفسك وتمالكي اعصابك ومالك الا الحيله ويكفيك كلمه ان كيدهن عظيم احتالي على زوجك ولا تقولين ما ابيهم معي بصريح العباره لا جيبيها بطريقه ثانيه مثلا والله انبسطت اليوم بس لوكنا لحالنا كان احسن ولما يركبون معاك لا تسكتين وتطنقرين لالا بالعكس اضحكي مع زوجك وسولفي ووشوشيه في اذنه واضحكوا وذكريه باشياء سويتوها امس قبل تنامون وذكريه بمواقف مضحكه بينك وبينه
ونكدي عليهم بطريقه ثانيه انو مثلا يافلان انت واحشني وانا مره مشتاقه لك تكفى خلنا نرجع البيت مافيني صبر وشوشي له في اذنه انت اموت فيك انت سيد الرجال شوفي الاماكن اللي ما يحبونها وروحي لها لان فيه بعض من خوات الزوج ماتنعطى وجه والله والله ان بنت خالتي تزوجت ومن صباحيه العرس واخت زوجها معهم طول شهر العسل هذي مب عيشه مافيها شي اذا الوحده تطلع مع زوجها لحالهم هذي حياتهم ومره في الاسبوع تطلع مع خواته وامه لكن مو كل يوم
صديقتي كانت بتروح عمره واخت زوجها كانت عليها الدوره ومن الغيره والحقد كذبت وقالت ان الدوره خلصت وراحت معهم واعتمرت وهي فيها الدوره يعني تدخل الحرم وتصلي وتعتمر وهي عليها الدوره بس من الغيره ماتبيها تروح لحالها الله لايبلانا

يابنات انتبهوا على حياتكم تكفون الوحده بعد الزواج وبعد الدخله تجي تبكي وتشتكي بيت سلفتي اكبر من بيتي طيب وينك عن ذي الاشياء قبل الدخله ولا لااهيه في الحب والغرام

وينك ايام الخطوبه والملكه ماجيتي تشوفين البيت وترتبين اغراضك توك تعرفين اللحين ان بيت سلفتك اكبر من بيتك والله شي

شوفوا بقولكم حاجه اخيره زوجي يموت في الاغاني الله يهديه بس وانا اكره الاغاني والزواجات ما احبها ولله الحمد واللحين زوجي لو نقعد بيتنا فاضي مافيه كسره خبزه وهو معاه 10 ريال يروح يشتري فيها شريط ونموت من الجوع احنا هذي من عيوبه اللي لاتطاق الله يهديه بس

واخر شي اقولكم

اثقلوا الثقل صنعه وادعوا الله يوفقكم ويسخر لكم ازواجك واتركوا الغراميات لبعد لزواج لاحقين عليها لاتصيرون مثل بينت جيرانا تكلم خطيبها وتتفق معاه على امور الزواج حتى فستانها والبشت حقه مصممينها نفس اللون والتطريز والبطاقات جايبينها من لبنات والحلويات من بارس وزواجها كان تحفه وقعدت معاه 3 ايام وتطلقت الله لايبلانا ليش ؟؟؟؟ تهاوشوا على سالفه تافهه جدا اسأل الله السلامه

واللهم بلغت اللهم فأشهد