وسع للكشرى

السلام عليكم ورحمة الله وبركاته
انا النهاردة كتبت طريقة عمل الكشرى وذلك لسبابين وهما
اولا :لان فى بنات كتير متعرفوش
ثانيا:لانى من مصر وأصل الطبق ده منها



بصى يقى يا ستى
اولا : المقادير
1 كوب عدس
2 كوب ارز
شوية شعرية بكف ايدك
2 بصلة متوسطة(تقطع حلقات دائرية متوسطة الحجم)
1 كيس مكرونة (حسب اللى انت بتحبيه ممكن صغيرة خالص او متوسطة او اسباغيتى)
ملح وفلفل
5 او 6 ملاعق زيت
ديه مقادير الكشرى

مقادير الصلصة بقى
3 حبات طماطم متوسطة تعصر جيدا
1 بصلة متوسطة(مبشورة جيدا)
2 فص ثوم مدقوق
ملح وفلفل وشطة
3 ملاعق زيت
(ملحوظة : الطبخ كله بالزيت فقط)

الطريقة
اول حاجة بتسلقى المكرونة لوحدها عادى جدا فى ماء مغلى فيه شوية ملح وزيت صغيرين وتصفيها وتسبيها على جنب

بعد كده تجيبى حلة متوسطة الحجم وتضعى فيها 5 او 6 ملاعق زيت بس وتحطى حلقات البصل
وتقلبى كويس ولما يبقى لونها دهبى تصفيها من الزيت كويس وتشليها على ورق المطبخ

الزيت طبعا هيبقى سخن تجيبى الشعرية وتحطيها وتقلبيها وتشليها اول ما تحمر علطول لانها بتغمق بسرعة بس تحطيها فى طبق من غير ورق علشان متلزقش
(ملحوظة :كل اللى فات ده على نار متوسطة علشان ميتحرقش)

بعد كده تخفيفى النار ( يعنى توطى النار) وتجيبى 3 اكواب ماء وتحطيهم فى الحلة على الزيت بس براحة علشان الزيت سخن جدا طبعا وتحطى الملح والفلفل حسب رغبتك وتذوقى الماء علشان تضبطى الطعم وبعد كده تغطى الحلة كويس

بعد ما الماء يغلى تحطى العدس والارز ويكونوا مغسولين كويس جدا
وكمان تحطى الشعرية وتقلبى كويس ولو لقيتى الماء قليل عليهم حطى شوية كمان لغاية ما الخليط يتغطى وتغطي الحلة والحرارة تبقى متوسطة وكل شوية بصى عليه ولما الماء يتشرب خفيفى النار خالص (وطيها يعنى) وحطى عازل بين الحلة والنار(الشياطه) علشان تستوى على نار هادية من غير ما الكشرى يلزق
لمدة ربع ساعة وبعد كده خلاص يبقى جاهز


طريقة الصلصة
تجيبى حلة صغيرة وتحطى فيها 3 ملاعق زيت وتجيبى البصلة وتبشريها كويس وتحطيها على النار ولما تصفر تجيبى فصين الثوم المدقوقين وتحطيهم على البصل(ملحوظة: الثوم يبقى مدقوق فى الهون كويس مع شوية ملح وفلفل صغيرين لان الثوم اللى فى الهون احسن بكتير من اللى مفروم فى الطعم والفيدة ) وتقلبى لحد ما الخليط يبقى لونه احمر تروحى حطه الطماطم (المبشورة كويس) وتقلبى وبعدين تحطى ماء لنصف الحلة وبعدين تسبيها على نار متوسطة وتبصى عليها كل شوية مع التقليب ولما توصل للاخر(تتسبك يعنى)توطى خالص لمدة عشر دقائق وبعد كده تبقى جاهزه


طريقة التقديم
تحضرى طبق وتضعى فيه الاول الخليط المكون من ( العدس والارز و الشعرية)
وبعدين تحطى عليه شوية مكرونة (اقل طبعا من الارز والعدس)
وبعدين ترشى شوية بصل (من اللى حمرتيه فى الاول)
واخر طبقة الصلصة تحطى حسب الرغبة
وبالهنا والشفا
تم بحمد الله