لسان حماتك

:COLOR="DarkOrchid"]بنات صباح الخير وحشتونى .. انا انهاردة عايزة أشرككم معايا فى موضوع مهم ممكن نكون كلنا بنتعرض له طبعا المتزوجات :wink: لسان حماتك :tongue:
الحماة بالذات دايما حاطة زوجة ابنها فى بالها وتغير منها وتتعامل وكأنها ضرتها وخطفت منها ابنها ولأنى على دراية شوية بالنفسيات دى عرفت ازاى أروض حماتى فى الأول ولكن دهاء الحموات غلبنى ..
تعملوا أيه لما حماتك تقولك عينى عينك فىوشك أنا أبنى ماشى تمام زى ما رسمت له قلت له أوعى مراتك تعرف مرتبك أد ايه أو دخلك كام بالظبط وخليك تقيل معاها فى كل حاجة أوعى تتلهف عليها ولا تكون مدلوق عليها فى مشاعرك وعواطفك خليك تقيل حتى فى غرفة النوم كله بحساب وأوعى الموضوع ده تعطيه لها بكثرة ( المعاشرة يعنى ) خليها مرة مرتين فى الشهر كويس أوى وأوعى تصرف عليها بهبل حتى فى طلبات البيت لازم كله بحساب .. وأوعى ..وأوعى ..الخ شوية نصايح كافية تخرب أى بيت من أول يوم جواز .........صح ؟!! تتصرفوا ازاى لو سمعتوا كده


تعملوا أيه لما تكونوا بتعاملوا حماتكم زى أمكم ومهتمين بيها وتراعوا ربنا فيها وتدخلى عليها بالهدايا علشان ما تقول دى مقصرة أو ما عندها ذوق ودائما تسألى عليها يوميا وما تقصرى فى حق الزيارات بل وتشجعى ابنها على السؤال عنها وعلى زيارتها ولا تتذمرى اذا كان فى الأسبوع يخليكى تباتى عندها معاه يومين كل أسبوع بأى حجة طبعا دى أوامرها الخفية وانت عارفة ومطنشة

تعملى أيه بأه لو انت بتتعاملى معاها كده وبتعملى كل ده ارضاءا لربك ثم زوجك وبعد كده تعرف أن لسان حماتك شغال طالع نازل يحكى عنك وعن كل صغيرة أو كبيرة عرفتها بطريق الصدفة عنك وعن حياتك مع زوجك وطبعا لسان حماتك الجميل ده مش بيتكلم ألا بكل خير ودعوات ايه !!!!!!! أمام زوجك طبعا وتلاقى معاملة يحسدك عليها زوجك من أمه
ويا دوب تديرى ظهرك لها وتأخذ هى بنتها أو جارتها وينطلق لسانها بكل الانتقادات والكذب والافتراءات واذا جه وقت ما فيش حاجة عارفة تمسكها عليكى تتكلم عن الحمل وازاى انك عاملة لهم فضيحة انك ما حملتيش لغاية دلوقتى مع انك متجوزة من 9 شهور . هااااااااااا تعملوا ايه ؟؟؟؟؟

تعملى ايه ؟ لو جوزك بطل صلاة وبعد ما كلمتيه كتير وما فيش فايدة وبرضه مصر على عدم الصلاة وروحتى طلبتى من حماتك بحنيه كده يا ماما كلميه انت لك دلال عليه ده فرض ربنا ما يضيعوش انا خايفة عليه علشان ربنا يكرمنا ويبعد عننا أى حاجة وحشة وانت كلامك طبعا يا ماما لازم يسمعه هو له غيرك انت الخير والبركة وفجأة يصدمك ردها ولسانها !!!!!!!!!:eek: سيبيه أنا ولادى مش بيحبوا حد يزن عليهم خليه براحته هو لوحده هتلاقيه بيصلى كده مش مهم دلوقتى بعدين

تعملى ايه ؟؟؟؟؟؟؟ وحاجات تانية كتيرة ينطلق بها لسان الحمواااااااااااااااات أنا مش هطول عليكم بس ياللا عرفونى هتعملوا ايه أو بمعنى أصح بتعملوا أيه مع لسان حمواتكم
بتقاوموا السان ده ازاى زى ما أنا بعمل بالمعاملة الكويسة بس لازم يكون فيه رد وقت اللزوم وبذوق برضه واحترام ولا بتردوا بايه ؟؟؟؟؟؟؟؟؟ ياللا يا بناااااااااااااااات مستنية ردكم [/COLOR]