لمتى نظل ندلع الولد باسمه !! موضوع للنقاش

ماما حسون موضوعك حلوو .. !

انا عندي اولاد اختي كنا دايما نناديهم باسماء دلعهم !

الحين لما كمل ولد اختي 9 سنوات خلاص شفناه ماشاء الله كبر و كأنه رجال تركنا .. بس الثاني الصغير اسمه عبد الله ، عمره 6 سنوات .. للحين الكل يناديه عبود ، لانه مميز هالطفل و بعد صايرة عبود احلى .. ! و ما اعتقد بتتغير لانه اخوي الكبير للحيم امي و خالاتي يسمونه عبود و هو صار ابو خخخخ !

بالنهاية .. مافي عمر محدد يلزم الوالدين في التخلي عن دلع الاسماء !

[GRADE="00008B FF6347 008000 4B0082"]موضوع حلووو ماما حسوون
بس بالنسبه اليي ماادري الى اي عمر بظل اسمي اولادي باسماء الدلع لان امي وابويي لحين ينادوني بأسم الدلع وخواني التوم بعد كان ابويي مايسميهم الا كتاكيت والحين هم بصف اول اعدادي واسمهم لحين مو جود كتاكييت وعمتى((ام زوجي)) بعد لحين تدلع اولادهاا ولو انهم بعد متزوجين وعندهم اولاد وزوجي من ضمنهم وعن نفسي ماادري لمتى بظل اسمي قسووم((عسوول)) وامووور((سكر))
وسموحه على الاطاله [/GRADE]

حلو الموضوع اني عندي بنت بس مو دائما اناديها باسماء الدلع يعني اناديها نور عادي غالبا وحتى ابوها لان احنا نادرا ما نناديها باسمها اني اناديها كل ماما وابوها اذا يكلمها يقول لها بابا. بس احس ما بتغير بظل على طول جذيه

اما اذا ولد احس انه من يدخل المدرسة لازم نعود لساننا على نطق اسمه الصحيح رغم ان احنا ولد اخويي اول حفيد في البيت الحين هو في صف ثاني اعدادي وللحين نناديه حمود اصلا ما نعرفه الا حمود.

اي والله صدقتين خيوووو

احنا عندنا في عائلتنا جدي

مو قصدنا ان ندلع الاسم بس من الصغر نتعود

عندي ولد خاله الحين في توجيهي واحنا للحين نسميه عبود مو عبدالله

لان تعودنا اناديه جدي

مو قصدنا انه ندلعه ولاشي

كأني أحس انش مكبرة الموضوع ام حسوووون

عادي شفيه اسم الدلع

انا عادي عبادي اسميه عبود عبادي عبدالله

واعتقد لين يكبر جذي.. يعتمد على الوضع

وحتى لو دلعناهم للكبر شفيهااا مويقولون الاولاد يظلون صغار في عيون اهاليهم حتى لو كبروا هههه

يعني ما اشوف فيه مشكلة ليش ما ندلعهم

يعني انا لحد الحين امي تدلعني و تدلع اخوي اللي اكبر مني و عنده بنية

انا ما اتوقع بيوم راح انادي ولدي باسمه الا اذا كنت معصبة

و ما اشوف انه اسم الدلع يزيد من دلع الولد لا عادي

شكرا لك ام حسون على الموضوع الحلو هههه

موضوع حلو نتناقش فيه

احس ان الواحد على التعود

اني عن نفسي من حالي صرت اعدل اسم ولدي حسن احسه كبر خلاص

ومؤمل اصلا انطق اسمه مثل ماهو بدون تدليع

راح أوقف تدليع أسماء عيالي لحد مايوقفوا أهلي تدليع أسمي بالأول

لحد يومكم هذا يدلوعوني بأسم مختلف تماما عن أسمي الحقيقي !!!


وما أعتقد راح يوقفوا هالأسم هذا علي حتى لو عجزت وأستويت عجووووزه !!!!

حلوووووو الموضوع ماما حسوون عجبني..

غيري اسمج بالمرة بعد سويه ماما حسين هههههههههه


عن نفسي متعودة ادلع اخواني الصغار واولاد اخواني الصغار وبالتاكيد اولادي.. ( بس حزة الغضب يطلع الاسم صحيح هههههه غصباً )
اتذكر كذا مرة بيت عمي يلفتون نظري انهم ما يحبون عيال ولدهم يكبرون وهم يتدلعون.. فحقرتهم ورديت عليهم بكل نزارة ولادي وكيفي.. عيل اذا ما دلعناهم بهالعمرمتى ندلعهم؟
خل يون بيت اهلي يشوفون اخوي الصغير الحين عمره 19 سنة وللحين ندلعه ونعطيه القاب ههههه

اشكر تفاعلكم في الموضوع والحمدلله انه عجبكم :o


والبنات اللي قالوا اني مكبرة الموضوع ما وصلت لهالدرجة وهي كلها قناعات ووجهات نظر في النهاية :D
يعني بالنسبة لأسامي البنات انا من البداية ومن العنوان حتى قلت اسامي الاولاد لاني مقتنعة ان البنت لو وصلت 100 سنة عادي لو دلعوا اسمها :wink:
بس الولد اظن في مرحلة ما من عمره لازم نتوقف عن استخدام اسامي الدلع لهم :) يعني انا ممكن ادلع ولدي بطرق ثانية مثل اهتمامي فيه او حتى ان اناديه بحبيبي وعمري لكن ان اسميه " حسون " وهو في طولي اشوفها مو حلوة (n) احس حسين احلى و ( ابو علي ) احلى واحلى بعد :cool:

طبعا في اسماء ما نقصد ندلعها انما نكون تعودنا عليها وهذا عادي ،، انا اتكلم عن تدليع الاسم بالقصد ..

واشوف ان الرجل يحب انه ينادى باسمه ويفضل طبعا كنيته واكيد ما يحب وهو كبير ان امه او اهله ينادونه بتدليع اسمه وانا لاني وقتها احب ولدي واحترم رغبته فراح اناديه باسمه :)

وبصراحه اكثر احس شي مقرف ان يكون في رجل يدلعون اسمه واكيد اذا ُسأل عن رغبته بيقول نادوني باسمي بدون تدليع .. وانا اشوفها اذا غيرت اسم رجل من اسمه الى اسم الدلع مثل حسون وحمود وعبود وعزوز وووو .............. كأني استصغره بينما اذا ناديت رجل بأبو فلان راح يفتخر ويستانس بهالمسمى (y)

وحتى المثال اللي ذكرته عن خالتي ولدها دوم يقول لها انا كبرت الحين خلاص ناديني فلان لكنها تقول له ما اعرف خلاص تعود لساني على هالاسم <<< يعني الولد مو عاجبه ان امه تدلع اسمه للحين ..

والحمدلله ولدي رغم انه صغير لكن ما يحب نناديه حسون ودوم يقول انا اسمي حسين فلان الفلاني ويحب نناديه بكنيته " ابو علي " :) وانا قاعده احاول من الحين اعود لساني على لفظ اسمه الصحيح لكن ارد اقول بعده صغير (a)

فكان من البداية سؤالي في الموضوع

وخبرونا حسب وجهة نظركم الى عمر نظل ندلع الولد باسمه ؟؟

لاني كنت حابة اعرف الى عمر يكون عادي لو ظليت ادلع اسم ولدي !!


وفي النهاية انا اشوف ان في طرق كثيييييييييييرة ممكن ادلع بها اولادي وما يقتصر التدليع على اسمه فقط :)

موضوع حليو ماما حسون

اني ادلع ولدي صدوقي ولا فكرت انه كبر لاني لحين اشوفه صغيرر وهو قريب بيكمل 4سنوات لكن ما اناديه باسمه الا نادرا

وما بغير اسم الدلع الا لين يكبر واشوفه ان مضايق بغيرر وبناديه باسمه او بكنية له واكيد اذا كبر باسم كنية احلى خاصة قدام الناس لانة يكبره ويدل على الاحترام والتقدير اليه

واني اعتقد بعمر عيالنا عادي اسم الدلع وحتى بمرحلة الابتدائي يعتبر صغيرر

الا في حالة حسون الحين مسوي روحه رجال ويبي اسم حسين بدل حسون ويمكن تعود من الروضة بعد

ماادري انا الحين ولدي صغير واسميه خلووودي

وحتى اخوي الحين بصف ثالث ابتدائي وللحين اناديه باسم الدلع ماني قادره اناديه بسمه واحس انه عاادي مو متضايق

اممم حلو الموضوع اناصراحه تعودت ادلع بنوتي باسمها زهاري زهور بس صج وقت ما اكون معصبه يطلع اسمها هههه ما ادري ليش عموما حلو الام ادلع ولدها وبنتها ويناسب تدليع اسم البنوته اكثر من الصبي لانه ممكن البنوته يدلعوها حتى بعد متكبر بس الصبي بعد مايكبر مب حلو شكبره تسمونه حمود وعبود:tongue:

احنا عندنا ابن عمي اللي هو اخو زوجي وعم ابني اسمه محمد وهو الان في الجامعة و عمره 24 سنه والى الان نناديه ((حماده)) ... ما قد سمعت يوم احد في العايلة يناديه غير ((حمادة)) .. وهو عادي حتى بعض الاحيان قدام اصحابه ولا في الشارع نناديه حمادة .. خلاص يعني مشا عليه ((حمادة)) اكثر من محمد ... وحتى ننسى ان اسمه محمد وعادي وحتى بكره لما يتزوج يجيب عيال بايكون اسمه ((حمادة)) ..

اناابني اصلا ما ناديه غير ((ويسوووووووو)) .. واسامي كثير بس كمان وقت التعصيب ويطلع وسام حاف .. وحتى لو صار رجال كبير بشنبات حاناديه ((ويسووووو)) ..

اسم الدلع هذا مالوش علاقة اذا كان بنت او ولد .. واسم الدلع ما بأثر على رجولة الولد مهما حصل .. هي فقط تعبير من الام عن مدى حبها لطفلها ومن حقها ... احصري فقط على التربية السليمة والصحيه والدينية وهيء الجو في البيت لهذا النوع من التربية .. ودلعيه زي ما تريدي

بالنسبه لي عادي مافي سن معين لان اخوي في صف سادس وللحين ندلعه علاوي