موضوع شيبني .. مشكلة حيرتني ..

سلام يا بنات ويا عروسات ,,

انا عندي موضوع تعبت من التفكير فيه مو لاقية له اسباب ولا حلول ,, قلت اقولكم عنه يمكن تلقون لي حل او مخرج لهالموضوع ..

الموضوع بأختصار انه ابوي وخطيبي علاقتهم مو تمام ,, مو قصدي بينهم مشاكل ,, بس مادري ليش احس ابوي مايحب خطيبي صحيح اذا يجي خطيبي البيت ويقعد معانا ويسولف وجدي بس ابوي يقعد طول الوقت ساكت ولا يتكلم معاه واذا هو حاول يفاتحهم موضوع يبي يسولف وياه ابوي يكون جاااااف وايد معاه يعني يادوب يرد عليه بكلمة كلمتين ..

وخطيبي بدى يلاحظ هالشي بس مايقولي بس انا اعرف من نظراته ومن غير مايتكلم شنو فيه واذا يضايق ..

المشكلة انه ابوي مو مع الكل جدي لا انا احسه مع ناس وناس يعني انا عندي بعد اختين وحدة متزوجة ووحدة مخطوبة اذا يجون رجالهم البيت اشوف ابوي شلون يضحك ويسولف معاهم ويمزح وغيره واذا مع خطيبي لالا ..

واذا صادف وكان خطيبي موجود ينحرج خطيبي ويتضايق لانه يلاحظ انه ماحد مفيسه وانه الكل يتكلم ويسولف مع ازواج خواتي الثانين ..

للعلم انه خطيبي حبوووب وطييييييييب والله وحلووو ..

مادري ليش ابوي جدي معااه ,, مادري ليش مايعالمه زين معنى هو خطيبي يحاول انه يكسبه ويتقرب منه بس مافيه فايدة ..

في المقابل انا لما اروح بيتهم اشوف شلون معاملة ابوه وامه وخواته لي والله والله فرق السما والارض .. شقد يحبوني وشقد يعاملوني زيين ومدلعيني وكل شي .. حتى لدرجة انه قمت احس عمي افضل من ابووي واحس انه اهل خطيبي عوضوني عن كل شي ناقصني من دلع ومن حنان من هلي ..

بس المشكلة انه في خطيبي الحين قام يخاف يجي بيتنا يقول اخاف اروح وانحرج ماحد يفيسني و لا احد يعطيني وجه ..

شنوو اسوووي ؟؟ شورو علي يا بنات .. انا قلت بترك الموضوع وبطنش وقلت لخطيبي نفس الكلام قلت له طنش ولا تهتم عليك مني انا بس والي يحبك ويهتم لك ويسأل عنك انت اهتم له واسأل عنه والي ما يسأل عنك ولا فيسك لا تفيسه ..