قصة ولادتي بـ *لين وليان* نورالعين

السلام عليكم جميع ويسعد ايامكم يارب
سوووووووري ع التاخير بس الله العالم ان ماعندي وقت احك راسي :o
اول شي احب ادعي لكل حامل الله يسهل ولادتها يارب ..
والشي الثاني احب اشكر
اريج .. السيده سوسو .. زهور .. ملاذ الطير .. فيد باك .. نبعه الريحان .. وديما .. وسوري اذا نسيت احد
على اتصالاتهم ومسجاتهم وسؤالهم عني..
واحب اشكر كل وحده باركت لي..وسالت عني:o


[GRADE="00008B FF6347 008000 4B0082"]قصه ولادتي بدت يوم الخميس 20 مارس.[/GRADE]
كان عندي عيد ميلاد ولد حماي وبنت حماي وانا اصلا ماشريت لهم هدايا فقلت بعد صلاه العشاء بطلع تويز ار اس اشتري هدايا وفي نفس الوقت كنت متردده اطلع او لا لانه كان ماسكني الم رهيب في منطقه الحوض للركبه غير اني كنت احس ان مثانتي مليانه وكل خمس دقايق لازم دوره مياه - وانتو بكرامه-
المهم قررت اني اطلع وفي الطريق في السياره كان يجيني الم غير طبيعي كان يخليني انحني وراسي يصير عند ركبتي –طبعا لما ولدت علمت الدكتوره عنه وقالت لي كان هذا بداية الطلق - وغير هذا ماسكني الم من وركي فوق للركبه شريت هديه ورحت تعشيت وانا ماني قادره عندي الم في مثانتي وخواصري وماقدرت اتعشا فطلعت رحت الطوارئ وقالو ان نتيجه تحليل البول سليمه وماشيكو الطلق! .. وممرضتي وقتها كانت لبنانيه وكانت تقول لي: ماتدرين يا هاله متى تولدي ورديت عليها انه حددو لي موعد بعد عشر ايام وكانت تعد وتزيد: مابتعرفي ربنا شو بيعموول ويمكن بتولدي قبل..
المهم مشيت على الساعه وحده وكنت رايقه رغم الالم ورحت بيت اهل زوجي وسهرت للساعه 3 ..

المهم.. لما رجعن الشقه ماجاني نوم وكنت مرابطه في دوره المياه
اخر شي كان يوم الجمعه يوم 21 مارس –يوم عيد الأم - كانت الساعه 9 الصبح قمت بروح الحمام وانا قايمه من السرير حسيت بماي نزل مني
طبعا انا فكرت اني تبولت مكاني فرحت بسرعه الحمام بجيب فوطه وديتول امسح المكان شوي والا لسه ينزل مني شي دافي واجلس ربع ساعه افكر اروح لزوجي وشنو اقول له
المهم رحت له وصحيته وجلست على السرير وكان عندي الم خفيف.. قمت ويرجع يكب الماي.. واقعد اصيح مثل الاطفال..
قمت اخذت شاور بسرعه وركض ع المستشفى .. حطو لي تخطيط وطلع عندي طلق قوي .. وقتها كنت اصيح حطو لي شي عن الالم ..
جات الدكتوره وسوت لي فحص .. وانا خلاص في عالم ثاني .. والدكتوره قالت شي .. وزوجي يقول: هاااه؟؟
والا تقول الممرضه مبروك
واطالع ايش مبروك..قالت مفتوح 4 سانتي
طبعا انا للحين في صدمه .. قمت اصارخ اتصلوا لامي ولاخت زوجي يجوني.. وزوجي مسكين يتصل لهم!!
شوي الا تقول الالترا ساوند .. وتكشف الا بيبي مقعدي والثاني برجله.. وتطلع مع زوجي برا عشان اوراق التنويم!
المهم .. وقتها جات لي ممرضه عشان التخدير وقلت لها ابي نصفي وخلتني اوقع ع الورقه وشوي ترجع لي الدكتوره تعمل فحص الا تقول 7 سانتي!! وزوجي جواله مافيه ارسال ويجيبون لي ورقه العمليه اوقعها.. وطبعا من غير ما ادري بحالي مسكت القلم ووقعت .. وما اشوف الا ثلاث ممرضات وحده لبستني شرابات والثانيه تحط لي قسطره والثالثه فصختني ملابسي الداخليه وشالت ربطه شعري وطلعوني من الغرفه الى العمليات وانا اتلفت ابي زوجي ابي امي ابي اي احد
دخلوني غرفه العمليات واشوف الكل لابس اخضر وعليهم اقنعه مغطيه وجيههم ووقتها جاني انهيار واقعد اصيح من قلب تخيلت اني بموت وانا ماشفت اهلي!
المهم الطاقم قامو يسكتوني ويخلوني اضحك بس لاحياه لمن تنادي.. جاني حق التخدير وقلت له: انا ابي نصفي بس اذا خفت خدرني كامل الا يقول: هاله مافيه مجال اخدرك نصفي.. الرحم خلاص تقريبا فاتح كامل.. قمت تشهدت ويحطون لي اكسجين وانا اشيله لانه ريحته كحول واصارخ: ابي شي يخفف الالم.. والممرضه تقول: حبيبتي هذا يخفف الالم...
اللي اذكره انهم قالو لي: حطي رجلك اليمين على طاوله.. واليسار على طاوله . ايدك اليمين هنا .. واليسار هنا .. وحق التخدير سألني ايش اسمك؟ التفت وانا اقول له هاله وشفته يضربني ابره في الوريد في ايدي اليسار..

بعدها صحيت بزوجي يقول: هاله حبيبتي.. مبروك ولدتي .. وافتح واشوف دكتوره وانا اصيح يألم.. يألم .. وهي تقول لا تخافي بخيف الالم وبعطيك حبوب تخفف الالم ..واحط راسي ويرجعو يصحوني: هاله ولدتي. واطالع اشوف امي وابوي واختي يقولو لي الحمدلله ع السلامه .. وزوجي ماسكني.. واخت زوجي حاطه ايدها على راسي وتقرا علي..وانا بعدني مو مستوعبه .. واذكر وقتها كان حر وسمعت زوجي يقول خلاص شيلوه .. واذكر انه هوز دفايه تحت البطانيه..طلعوني وودوني غرفتي وانا لسه ماني قادره وميته عطش .. وكل شوي اصيح : حلقي يألمني.. ابي ماي .. وزوجي كاسر خاطري وامي وابوي واختي .. واقفين يطالعوني
جابو لي البنات حطوهم على صدري وطالعتهم وانا ماني مستوعبه .. لسه ماصحيت كويس من التخدير.
وانا لسه مو مستوعبه الموضوع!!
بعدها ودوني غرفتي وظليت بين الصاحيه والنايمه .. لليل تقريبا وكانت العالم تجي لي وانا بين البين..
بعد العمليه ب 6 ساعات جابو لي اكل وقوموني امشي.. طبعا لما جيت اقوم حسيت بالموت.. العمليه كانت تألم بس تأقلمت ع الوضع عشان لين وليان..

وكاهم القمورات في حضني الحين.. عمرهم 45 يوم :)
يسلمون عليكم جميع ويدعون لكم وانا ادعي لكل حامل تقوم بالسلامه وتفرح بشوفه قرة عينها ..:)