شخبار عرايسنا الحلوين؟ عساكم دوم بخيرإن شاء الله...
الله يسلمكم، الأسبوع اللي فات كنت أتفرج على Giada De Laurentiis على فتافيت... و كانت تسوي صينية الكوسا بالجبن... و خطواتها سهلة كثير و شكلها كان يشهي...
طبعاً أنا ركضت عالمطبخ و طبقتها... طلعت أكثر من راااائعة... و من كثر ما حبيتها ثاني يوم جربتها بالبطاطس، بس سويت فيها تغيير بسيط...
و ثالث يوم سويتها و جمعت الكوسا و البطاطس مع بعض... و الطعم ما زاال راااائع... أنصحكم تجربونها...
نبدأ فيها بسم الله...
أنا مقاديري اللي استخدمتها هنا كثيرة لأني سويت صينيتين... و انتوا سووا الكمية اللي تحتاجونها....
4 ملاعق كبيرة زيت
3 بصلات كبيرة مقطعة شرايح رفيعة
3 فصوص ثوم مقطعة شرايح رفيعة
خمس حبات بطاطس كبيرة مقطعة شرايح رفيعة
نص كوب ماء
نرفع البصل و الثوم مع الزيت في قدر كبير، أو مقلى عميق و نقلبهم على نار هادية لحد ما يذبل البصل و يصير لونه شفاف...
اللي ما يحب البصل يقدر يستغني عن هذي الخطوة...أنا أضفتها من عندي عشان تعطي نكهة...
بعدين نضيف عليهم البطاطس و الماء، و نقلبهم مع بعض...
نخفف الحرارة و نغطي القدر... نتركهم عالنار لحد ما ينتشرب البطاطس الماء، و نقبلهم من وقت لوقت...
طبعاً كل ما قلت كمية البطاطس، نقلل كمية الماء...استخدمنا الماء هنا عشان نطبخ البطاطس نص سوا... تقريباً بياخذ ربع ساعة... بعدين نخليها تبرد شوي...
نجيب الحين:
7 حبات كوسا كبيرة مقطعة شرايح طولية رفيعة
ملح – فلفل أسود
جوزة الطيب (إختياري)
كريمة خفق
2 كوب جبن تشيدر مبشور
1 كوب جبن بارميزان مبشور
2 كوب جبن موزاريللا
2 كوب بقسماط
2 ملعقة كبيرة زبدة لينة
نبدأ الحين عملية التجميع :)
في صينية بايركس عميقة مدهونة... نصف طبقة بطاطس، و نورزع فوقها البصل و نرشها بالملح و الفلفل الأسود و جوزة الطيب...
بعدين نصف فوقهم طبقة من شرايح الكوسا، و نرشها الملح و الفلفل الأسود و جوزة الطيب...
نجيب الحين الكريمة... مقدار الكريمة نقيسه بالعين، نصبها بشكل خطوط خفيفة فوق الكوسا، بس مو نغرقها...
بعدين نرش فوقها نص كمية الأجبان (التشيدر، و البارميزان، الموزاريللا)
و في الأخير نرش نص كمية البقسماط...
نرجع نكرر نفس الخطوات مرة ثانية... بطاطس، بصل، بهار، كوسا، بهار، كريمة... بعدين نضيف باقي كمية الجبن و البقسماط... في الأخير ناخذ الزبدة و نوزعها على الوجه... اللي يبي يخفف الدسم، يستغني عن الزبدة...
ندخلها الفرن في الرف الأوسط، بحرارة 350 و لمدة 45 دقيقة... قبل ما تطلعونها من الفرن بطرف سكين حادة تأكدوا إن الخضار استوت تماماً... إذا تحمر الوجه و الخضار ما استوت، غطوا الوجه بورق ألمنيوم لحد ما تستوي...
و هذا شكلها بعد ما طلعتها من الفرن...
و بعد ما تطلعونها من الفرن خلوها لمدة 10 دقايق قبل ما تقطعوها عشان تتماسك...
و هذا شكلها النهائي...
(f)و ألف عافية و صحة على قلوبكم (f)
