اليوم حبيت أقدم لكم طبق مميز ومبتكر من إختراعي كنت أبغي أسوي معكرونة بشاميل بس قلت خلني أغير شوي وأبتكر شي مختلف عن المعتاد فقمت وجبت كل المكونات اللي أحبها وجمعتها في هالطبق اللي سميته بوتيتو باستا
الكمية تكفي 6 أشخاص
المقادير:
1/2 باكيت معكرونية أي نوع تحبين
حشوة اللحم:
لحمة مفرومة
بصلة صغيره
ملعقتين معجون طماطم
مكعب ماجي
بهارات: ملح وفلفل أسود وبزار مخلوط أو أي بهارات تحبين تضيفينها على اللحمة
مقادير البطاطا المهروسة:
2 بطاطس مسلوق
كوب صغير حليب
ملعقة زبده سايحة
للصلصة:
2 ملعقة أكل طحين
فنجان زيت أو زبده
كوب حليب
ملعقتين جبن سائل
رشة ملح إذا الجبن ماكان مالح
نبدي بسم الله الرحمن الرحيم
الطريقة:
نسلق المعكرونية مع شوية زيت ونصفيها ونتركها على جنب
حشوة اللحم: في مقلاة نحط شوية زيت مع البصل المقطع صغار ونحركة شويه بعدين نضيف اللحم المفروم ليما ينشف الماي منه، وبعدين نحط عليه معجون الطماطم ومكعب الماجي والبهارات ونحركة زين ونخليه على جنب
البطاطا المهروسة: بعد ما سلقناها نقشرها ونحط عليها الحليب والزبده ونهرسها زين ليما تصير عندنا عجينه ناعمه وطريه ونتركها على جنب ممكن تستخدمين المضرب الكهربائي
الصلصة: على النار نحط الزيت أو الزبده والطحين ونحركة بس تكون النار هاديه عشان ما ينحرق الطحين وبعدين نحط عليه الحليب مع التحريك المستمر وعقبها نحط الجبن السائل وممكن تستخدمين الجبن المبشور أي نوع تحبين وبعد ما تنخلط المكونات زين مع بعض نطفي النار عنها
الحين نجيب البايركس أو صينية الفرن الطبقة الأولى بتكون المعكرونية مخلوطة بملعقة من الصلصة عشان التماسك والطبقة الثانية اللحمة المفرومة والطبقة الثالثة البطاطا المهروسة والطبقة الرابعة الصلصة وبعدين ندخلها الفرن نولع تحت ونخليه لمدة 20 دقيقة وبعدين نطفيه ونولع فوق لمدة 5 دقايق أو ليما تتحمر الطبقة العلوية.
وهذا شكلها بعد ما إستوت يمييييييي طعمها خباااااااااال والكل حبها جربوها وإدعولي
وبالهناء والشفاء
