من حقي او لا ؟؟؟

سلام عليكم يا بنات المنتدى بغيت اخذ رايكم في موضوع يمكن انا ابالغ او لا ........

انا زوجة لطفلين وزوجى من النوع اللي يطلع كثير ويسهر بس انا تعودت على هالعيشة علشان خاطر عيالي وعشان ما اخليهم من غير والد ، انزين زوجى صج هو من النوع اللي يسهر يعنى اشوفه باليوم يمكن ساعة او ساعتين اوكى تعودت بس هو حنون وطيب مشكلتى يا بنات صار لي كم سنة ما سافرت معاه هو دوم بالسنة يسافر مع اصدقائه وانا كل سنة يوعدنى ان بيسفرنى وما يصير نصيب المهم هو مواعدنى ان هالصيفية ان الله كتب يسفرنى مع عيالي .......... وانا قلت انشالله راح نكون لوحدنا.


المشكلة ان امه تنط معانا هى عندها 5 اولاد وزوج صايرة اذا احد من اولادها اذا بيسافر مع زوجته تنط معاهم .. وانا بصراحة ابي اكون لوحدى مع زوجى وعيالي لأن انا بالديرة ما اشوفه وانا طبيعتى عادية بالكلام معاه بس هي ما ترضى اكلمه بأي طريقه الا بإحترام يعنى انا من النوع ساعات اصرخ او اتجادل معاه هى ما ترضى ... من فترة اتفقنا ان نسافر انا وزوجى وحماي وزوحته الى دبي 3 ايام نطت معانا وتقديدنا بها طبعا هى من النوع اللي تلسع بالكلام طيبة لكنها حية بنفس الوقت ..

سئوال هل من حقي اسافر بروحى مع زوجى اغير جو واستانس معاه ، او اقبل بالأمر واسافر معاهم وانغث...... هى قايلة ان اى ولد من عيالي بيسافر مع زوجته انا بسافر معاهم..... انزين الحين اشلون اسافر من غير ما تدرى وانا طبعى احترمها وعمرى ما جادلتها على شي علما انها تغثنى بكل جلسة اجلسها معاها بس انا اخذها على قد عقلها.... حتى حماي وده يسافر مع زوجته بس ما يتجرأ لأنها بتنط وبيزيد الصرف فقال لزوجته بس انا بسافر مع اصدقائي وهي ميته من القهر ، يعنى معقولة الحين احنا محكوم علينا ان ما نسافر الا معاها ، وطبعا ازواجنا يخافون من لسانها فيخبرونها اذا بيسافرون معانا او لا ...... انا قلت اذا هى قالت بتسافر معانا اجلس بديرتى ولا اسافر اضيع اجازتى في نكد وصياح ....

هل انا ابالغ او ايش.......
انا كم مرة اقول لزوجى انا ابي اسافر لوحدى معاك من غير اخوك وزوجته ومن غير امك وابوك... بس هو ما بيقدر ان ما يخبرهم لأن بيصير زعل كبير........ وبيقولون انت ما تبينا.......

وهم من النوع اللي الواحد يستحملهم ساعة بالاسبوع مو شهر .......