جبت لكم اليوم أكلة أسبانية و هي الباييلا... هذي الأكلة سريعة و خفيفة و مغذية بنفس الوقت... مكوناتها الأساسية تشكيلة من اللحوم المختلفة... يعني تقدرون تستخدمون الدجاج و الربيان و فيليه السمك و المحار كلهم مع بعض...
لكن الحين استخدمت بس الدجاج...
هذي الكمية تكفي شخصين...
بسم الله نبدأ...
2 ملعقة كبيرة زيت زيتون
بصلة صغيرة مفرومة فرم ناعم
2 فص ثوم مفروم
نرفع هذي المقادير عالنار و نحركهم لحد ما يذبل البصل...
3 فيليه صدور دجاج مقطعة شرايح رفيعة
ربع ملعقة صغير كزبرة ناشفة
ربع ملعقة صغيرة كمون
ربع ملعقة صغيرة كركم
ربع ملعقة صغير زعفران
فلفل أحمر (إختياري)
نضيف الدجاج و البهارات للبصل، ونقلب على نار هادية لحد ما يستوي الدجاج و يتشرب البهارات...
جزرة متوسطة مقطعة مكعبات صغيرة
فلفل بارد أخضر و أحمر (أنا ما كان عندي الأحمر)
فاصوليا خضراء مقطعة قطع صغيرة (إختياري)
نضيفهم للدجاج و نقلب لمدة دقيقتين...
كوب رز مغسول و منقوع
كوبين ماء
مكعب ماجي
2 ورق غار
ملح
حبة طماط صغيرة مفرومة فرم ناعم
نصفي الرز و نضيفه لخلطة الدجاج مع الماء والماجي و ورق الغار و نملح حسب الذوق...
نخلي المقادير تغلي مع بعض لحد ما يتبخر الماء و يتشربه الرز، بس ما نخليه ينشف تماماً... (يعني لما نميل القدر بنشوف فيه شوية مرق)... هنا نضيف الطماط و نحركة عشان يختلط مع الرز....
نطفي النار و نغطي القدر و نخليه لمدة 10 دقايق...بعدين بيكون جاهز للأكل...
و هذا شكله عند التقديم...
هالأكله جداً لذيذة و خفيفة و تصلح للطواريء...
يا رب تعجبكم و عليكم بألف عافية (f)