ليلة ملجتي (سفرة + توزيعات + ديكور)

O

Oriana

تاجرة

03-04-2008 | 01:17 PM

السلام عليكم ورحمة الله وبركاته...

قبل ما أبدأ.. ما أحلل أي وحدة تنقل موضوعي وتنسبه لنفسها.. واللي بتنقل حلال عليها لكن بشرط تذكر اسمي Oriana لأن يوم القيامة احنا محاسبين وهالموضوع تعبانة عليه واللي تاخذه من غير إذن ما أسامحها وبتكون خصمي يوم القيامة

متعودين عليي أي شي أسويه أعرضه لكم هني

ويوم جهزنا لصديقاتي.. كنتون أول ناس تشوف شغلنا...

وهالمرة الشغل غير لأنه يخصني!

براويكم بالتدريج ويمكن على عدة مواضيع مشوار تجهيزي لحفل عقد قراني وحفل خطوبتي :)

وبما أن هالموضوع مخصوص للسفرة.. فأني راح أبدأ بالسفرة وراح أنتهي بتزيين مجلس بيتنا وتوزيعات الملجة..

كان في بالي تصور معين للسفرة .. وعلى هالأساس طلبت من الوالد العزيز الله يحفظه يوفر لي الأشياء اللي أبغيها

وبدايتها.. طاولات السفرة..

وهني بداية تصنيعهم في البيت ( الوالد سواهم بيده)

رسم على ألواح خشب مدعمة حجم الطاولات وعلى شكل دوائر

إذا بتلاحظون في الصورة فيه قطعة خشب مستقيمة مثبتة في مركز الدائرة المرسومة.. (هذي عملها عمل الفرجار)

قصينا الدوائر المرسومة

وهذي بقايا الخشب المقصص

وهذي وحدة مجكنمة بروحها

وأكو يحطون لها قواعد عشان تحملها

وهكم الطاولات استووا! كل وحدة بإرتفاع مختلف

رجاء ما أمبي أحد يرد لين أكمل الموضوع.. تشكرون

راجعين ليكم بالتكملة!

O

Oriana

تاجرة

03-04-2008 | 01:18 PM

طبعاً ألحين لازم نشتغل مشوار التوزيعات

حلقات ستاير صبغناهم ذهبي...

هذي وحدة بروحها

سوينا بقش صغيرة بالتور وحطينا داخلهم نتفة شبة وشوية نقطة وحرمل وسويدة

وهذي تجربة لتطبيق الفكرة

واصلنا الزحف وحطينا فيهم ورود صغار

شوفوا حلاوتها صغنونة

وركبناهم على الحلقات وحطينا فيهم خيوط حمران للتعليق.. وطبعاً زينا الحلقات بأشكار مختلفة.. بعضهم حطينا فيهم لولو أحمر وبعضهم حطينا فيهم كريستال أحمر

وأضفنا عليهم قطعة شوكولاته بالنعناع

شوفوا...

أضفنا الكروت

وحطيناهم في السلة

بس هذا مو كلهم!!! شلنا بعضهم.. بتعرفون ليش بعدين :wink:

تابعونا...

O

Oriana

تاجرة

03-04-2008 | 01:19 PM

كلكم تبون تعرفون ليش شلنا كمية من حلقات الستاير؟

والجواب هني...

مثل ما تشوفون هذي الشجرة!

طلبتها من البابا وجابها ليي من البر.. اعتقد اسمه عوسج! مو متأكدة

المهم.. جاب ليي البابا كمية منها أذكر اني صورتهم بس ما ادري وين راحت الصورة

عموماً قصصته ورتبته وجمعت الأغصان اللي أمبيها مع بعض

وهني عقب ما شلت السلة والشوك منها بقصاصة أظافر.. نتفت إيدي تنتف هالأشواك!!

هني يبين القلو لأني حاولت اجمع فيها اغصان واسويها شجرة ملبقة

حطيتها في إصيص بمساعدة البابا اللي ترس الأصيص جبس عشان يثبت

وهذي عقب ما رشيناها باللون الذهبي

الإصيص بعد رشيته بقلتر ذهبي (رش جاهز قلتر) بس ما يبين واضح في الصورة

بعدين زينتها ببقايا ورد أحمر كان عندي وحطيت عليها حلقات الستاير عقب ما ربطتهم بخيوط ميدار عشان ما يبينون وهم معلقين.. وعلقت فيها بعد بعض الكور والسلاسل الحمراء تزيين

وهذي توزيعات حلقات الستاير.. وتابعونا مع القادم :)

O

Oriana

تاجرة

03-04-2008 | 01:20 PM

النوع الثاني من التوزيعات كان عدد بسيط من غراش العسل الصغار

وزينتهم بهالطريقة

شلت القرطاس من على غراش العسل

وجبت قطع أورقنزا دوائر يبيعونهم جاهزين في الأنوار وفي محلات الخياطة

وبديت ألفهم وأربضهم بشريطة ذهبية

بعدين فرشت الكركوشة اللي فوق ولصقت في الوسط وردة حمرة (وردة رمان مشترتنهم عبارة عن أغصان ورد من هوم سنتر وهم نفسهم الورد الصغار الفضيل اللي حطيتهم في الشجرة الذهبية)

بعدين لزقنا عليهم البطاقات

تابعونا :)

O

Oriana

تاجرة

03-04-2008 | 01:21 PM

وما خلصت التوزيعات.. لأني سويت نوع آخر بعدد بسيط أيضاً وهو

هذلين السطول المجكنمين اللي انتون تشوفونهم وفطوم بت اخويي تلعب فيهم

هالسطول جايبتنهم أوردر من أمريكا (a)

فطوم مو مقصرة لعب فيهم

عبيتهم شوكولاتة الصخور

وهذا شكلهم بعد ما حطيت الكروت

-----

لما رحت مصر.. اشتريت أكياس على شكل أقماع.. هالأكياس دابت رجولي واني ادورهم في البحرين.. من قبل كنت شايفتنهم عند الجزيرة بس يوم رحت له ما حصلته يقول ما يجيب الحين.. ويوم رحت مصر قلت خل ادور.. دورتهم وحصلتهم واشتريت 200 حبة عبيناهم مكسرات... وهذا شكلهم...

نواصل معاكم :)

O

Oriana

تاجرة

03-04-2008 | 01:22 PM

ألحين دور تزيين مكان حفلة الملجة

اللي هو مجلس بيتنا

شلنا منه الكراسي وكل شي وفضيناه

وبما ان الشغل اغلبه كان فيه

فهذي الصور بالعفسة لحد ما رتبنا السناحات والزينة وكل شي :)

الصور تتكلم :D

تابعونا :)

O

Oriana

تاجرة

03-04-2008 | 01:23 PM

بما أن المجلس اكتمل من السناحات! وتعلق الكور وسوالف التزيين والليتات!

صار لازم أحدد المكان اللي بقعد فيه واللي بتكون قباله السفرة ومكانه كرسي العروس

لذلك.. اشتريت أقمشة بالألوان المناسبة.. وبدأت برسم الفكرة في راسي.. وبمساعدة من صديقاتي قدرت أسوي لروحي مسرح حلو...

دخلت فيه 3 ألوان.. وركبت على الدراجة وتعلقت وجم مرة بغيت انشدخ وبالذات حركة التثبيت اللي في السقف كانت تزوبق.. بس لازم اسويها اسويها! :ss:

وأكيد الإضافات كانت الخرز الذهبي والأحمر والكور والنجوم

بعدها حطينا طاولات السفرة بالترتيب اللي ابغيه وفرشت فوقهم قطع القماش بطريقة واحد وترك..

لون احمر - لون ذهبي - لون احمر - لون ذهبي

ألحين صار لازم أبدي اشحن السفرة وارتبها.. وبما أني ناوية أحط فيها بيض.. فسويت لروحي عش

بقوطي بسكوت + قش

هذا القوطي

غلفته بقطعة قماش ذهبية مايلة للبني

لصقت عليه القش

حطينا الأغراض على السفرة ومن ضمنهم الجوز والبيدان اذا تشوفونه.. بعدين براويكم صورة عن قرب..

ما خلصنا....

تابعونا :wink:

O

Oriana

تاجرة

03-04-2008 | 01:24 PM

شحوال :D

يوم ثاني جابوا الكرسي اللي تأجرته.. وحطوه في المكان المزبوط

وكملنا شغل على السفرة

هني مثل ما تشوفون في ستاند أسود جنب السفرة (هذا ستاند توصاية رسمته للبابا وخليته يوديه للحام يسويه ليي حق ينحط فيه صحون)

هني حطينا الصحون وغلفنا الستاند بقماش أحمر مناسب :)

طبعاً بشكل عام بتكلم.. السفرة فيها في أول طاولة المنظرة والشمعدان.. والطاولة الثانية ديزاين جوز وبيدان وشموع .. والطاولة الثالثة خرز ذهبي وحوض سمج .. وآخر طاولة كان فيها عش كبير بتشوفونه عقب فيه بيض.. بالإضافة إلى الستاند

تابعونا.....:o

O

Oriana

تاجرة

03-04-2008 | 01:25 PM

ألحين تناتيش وكل شي انحط على السفرة

وما يحتاج اتكلم وأشرح لأن الصورة تتكلم :o

هذا الجوز اللي صبغناه ذهبي وية البيدان.. ولصقناه على شكل جدار دائري وحطينا داخله البيدان الذهبي.. وزيناه بالورد

تابعونا :)

O

Oriana

تاجرة

03-04-2008 | 01:26 PM

طبعاً ما زلنا في التناتيش

جوانب من المجلس

السفرة

تابعونا

O

Oriana

تاجرة

03-04-2008 | 01:27 PM

بعض الأشياء اللي لازم تنحط في السفرة

الورد اللي تحط العروس فيه رجولها.. وياه فوطة حمرة مبرزة :D حق تمشش الرجايل عقب

جانب الشجرة يبين والتوزيعات معلقة فيها

الجانب الثاني من السفرة والفواكه تبين فوق الستاند

جزء من السفرة يبين فيه حوض السمج والأصيص مال الشجرة ( حاطة داخل الأصيص كريستالات خضران وقلتر احمر وأخضر

السفرة بشكل عام

وتوتة توتة... خلصت الحدوتة... حلوة ولا فتفوتة؟؟

شرايكم؟؟؟ :D

O

Oriana

تاجرة

03-04-2008 | 01:29 PM

أكرر.....

ما أحلل أي وحدة تاخذ موضوعي وتنسبه لنفسها أو تنقله أي منتدى ثاني أو حتى مجموعات بريدية من غير ما تاخذ إذن مني وتكتب أسمي Oriana عليه... وراح أكون خصمها يوم القيامة لو تسوي هذا العمل المقيت

ف

فطوم123

عروس جديدة

03-04-2008 | 01:46 PM

السلام عليكم
بسم الله

اللهم صلي على محمد وآل محمد

الله يبارك اليش خيو

اني من زمان اتابع مواضيعكم بس توني مشاركة

وعليش بالعافيه والله يوفق اليش ان شاء الله

ويسعدش ويسهل امورش

والسفرة واجد واجد حلوة

بس وين العسل وباقي الحلقات ؟

هههههههه لان ما اشوفهم في السفرة

تحياتي
فطوم123

b

bent_elemaraat

عروس مشاركة

03-04-2008 | 01:49 PM

ماشاء الله عليج و الله لج طولة بال
الله يوفقج و يرزقج

z

zumerdah

عروس برونزية

03-04-2008 | 01:51 PM

اييييييييييييش هالشغل

ووووووووش هالسفرة

والله والله عن جد وربي يشهد انه سفرتج حلوة ومرتبة واكثر من روعة

وعجبتني وااااااااايد

والاكثر عجبني شغلج ما شاء الله عليج يا اوريانا مخج نظيف وتفكرين وعليج افكار حلوووووة ماتخطر على بال احد

باين عليج فنانة والي عجبني اكثر انه في مساعدات يعني من قبل صديقاتج وابوج الله يخليه ويطول بعمره لج ..

مبرووووك حبيبتي ويعطيج الف عافية على هالشغل

انا من زمان اتابع لج مواضيعج وكل موضوع يعجبني اكثر من الثاني بس الاكثر عجبني شغلج لسفرتج وملجتج ..

وانا خلاص قررت في زواجي راح الجأ اليج واخذ منج افكار وتساعديني وتفيدني اذا ماعندج مانع..

ويالله همتج نبي نشووووف باقي صور الحفلة وشغلج ..

وعقبال مانشوف صور زواجج وشغلج عليه ..

O

Oriana

تاجرة

03-04-2008 | 02:00 PM

فطوم 123... مشكورة خيو تسلمين والله يبارك في حياتش... باقي الحلقات خليتهم في سلة مثل ما شفتون في الصور للتوزيع فقط.. اما السفرة فما حطيت فيها غير الحلقات اللي حطيتهم في الشجرة كديكور.. ما حبيت السفرة يكون فيها توزيعات ويشيلونهم وعقب تصير قرعة! اكي السفرة للحين محطوطة في البيت شحلاوتها كديكور وما تغيرت عقب الحفلة الشي الوحيد اللي انشال الفواكه والبيض... والعسل نفس الشي خليته في سلة بروحه للتوزيع ما حبيته يكون في السفرة عشان ما تصير قرعة لين انشال كل شي... الله يوفقش يا فطوم123

بنت الإمارات.. تسلمين حبيبتي ولا تنسينا من الدعاء.. والله يوفقش

بنت سالمين.. تسلمين يالغالية.. وإن شاء الله الله يوفقش وتتزوجين وأقدر اساعدش بشي تفرحين به.. الله يبارك في حياتش خيو

ي

يتوم

عروس ماسية

03-04-2008 | 02:19 PM

ما شاء الله .. اللهم صلي على محمد وال محمد

طول عمرج مبدعة اوريانا .. ومبرووووووووووووووووك الخطوبة وعقالنا يااارب ..

الصراحة ابداع ماشاء الله ماشاء الله تبارك الرحمن

د

دانة بين البشر

عروس رائعة

03-04-2008 | 02:44 PM

مـــــــــــــــــــــــــــــــــــــــاشاء الله ابداع..

الله يوفقــــــــــــــــــــــك ويتمم لك على خير..

د

دلوعه قطريه

مشرفة سابقة

03-04-2008 | 02:50 PM

woooow

very nice sweety

ن

ندى دبي

عروس ذهبية

03-04-2008 | 03:06 PM

ماشاء الله تبارك الله

رووووووووووووووووعه

ماشاء الله عليج ذوق وترتيب وافكار (عيني عليج بارده)