قصة ولادتي بالغالي *سيف*

(f)(f)(f)(f)(f)(f)(f)(f)(f)(f)(f)(f)(f)(f)(f)(f)(f)(f)(f)(f)(f)

بخبركم بقصة ولادتي بولدي سوافي

كان يوم السبت 8\3\2008 من الفجر تقريبا الساعه 4 احس بآلام وضغط قوي على الرحم يروح الألم ويرجع ومب قادره اكمل نومتي احس نفسي تعبانه بس الألم يسرق النوم من عيني ...طبعاً تميت على الحال لحد الساعه 8 ونص الصبح وعقبها قلت خلني أنش واخذ شاور دافي ... كنت اخلي الماي الدافي على ظهري واحس بآلام تي وتروح وحسيت اني بربي في هاليوم وما اعرف ليش ياني شعور بالخوف مره وحده مع اني في اليوم اللي قبله كنت اسولف مع هاله بالمسجات واقولها مليت ابعي اولد خاصه انه فيدباك ربت وزهور بنفسجيه ربت وهم قبلي في اللسته وما بقى شي على الموعد اللي عاطيني اياه في المستشفى واللي كان تاريخ 9\3\2008 وسبحان الله ربيت قبله بيوم ...

المهم نرد لموضوعنا ...طبعا قلت لكم الالم مستمر يروح ويرد وقعدت احسب له كل 8 دقايق لما بديت لحسب ولحد الساعه 1 صار كل 5 دقايق وانا متحمله واقول لريلي ما ابغي اروح المستشفى من اول شي يخلوني اتريا التوسع وغيره ... المهم صبرت لحد الساعه 3 الظهر وطبعا خلاص من الألم ادوخ ما اقدر اتحمل ... مريت على اختي ورحنا المستشفى وصلنا هناك الساعه 4 فحصوني قالو لي التوسع 5 فتحت عيوني هالكثر يعني حتى النيرس استغربت قالت لي هذا حملج الأول وقدرتي تتحملين الألم ... بس سبحان الله من دشيت المستشفى احس الالم كأنه سكين في ظهري ... وبعد شوي فحصتني قالت 6 وعطوني شي خلى الطلق يحمى بسرعه ولما صار التوسع 8 فتحو الكيس وحسيت الماي ينزل مني بقوه وهنا زاد علي التعب وتميت اصيح وحشرتهم اشوف الدنيا ادور حولي من الألم ... لاني بكل بساطه الم الدوره ما كنت اتحمله ...كيف بهذا الألم ... المهم دخلت غرفة الولاده والتوسع الحمدالله صار 9 بس قبلها وقعوني على ورقة القيصري في حال احتجت لها وقلت حق ريلي وقع نحن مب بحاجتها بس كإجراء إحتياطي .. دخلت غرفة الولاده وانا متحمله وماسكه ايد النيرس بقوه زين ما كسرت ايدها ميوده الألم في قلبي وطلع حرتي فيها ليش ما ادري ... يمكن لانه الدكتور ما سمح لإي حد يدش وياي...


المهم انا وصلت لدرجه خلال الولاده قلت لهم الألم ذابحني بموت الله يخليكم ساعدوني عطوني أي شي يخففه .. المهم خذت ابرة الظهر اللي طول عمري كنت ما اشجع حد ياخذها بس الألم كافر طلع روحي ... خذت الأبره والله يوم أتذكر كيف اترجاهم واتذكر حالتي يوم كنت اصيح تصعب علي نفسي ... احس عمري لا حول ولا قوه اتذكر انهم بعد التخدير لانه تخدير نصفي احس باللي حولي طولو ما قدرو يطلعون البيبي أكثر لاني راسه من فوق طالع بس مب قادرين حتى يشفطونه لانه نبضه خف والحبل السري لاف عليه كم مره ... يعني خلاص ما في امل عملية عملية ...راحو سألو ريلي وخبروه بالموضوع طبعاً الريال تروع واختي تقولي كان كله يدعي ويقول الله يسلمها يارب ... طبعا سويت القيصرية وانا طبعا اسمع اصوات الدكاترة والنيرسات بس من التعب مش قادره افتح عيوني ... بس شليت ايد النيرس اللي حاطه الاكسجين على فمي وسألتهم وين البيبي قالو ينظفونه وسمعتها يصيح ونزلت دمعتي وحسيت مثل الرعشة في قلبي...فديته انولد وراسه فيه علامه حمرا مثل الضربة لانه علق ما قدر يطلع وشرب من الماي اللي في بطني شوي.... ومن بعدها اذكر اني فتحت عيوني في الغرفه... واسالهم وينه سيف.. حلو و صغير و اسأله عبيطه واايد تمو يضحكون علي لانه التخدير والمسكنات لاعبه فيني لعب ...بس تدورن شو الصدفه الغريبه في كل الموضوع اني لما كنت اتكلم مع اهلي واخبرهم بمكان الأغراض على أساس يوم الولاده ما يختبصون وينسون اغراضي واغراض البيبي كنت كله اقول يوم العملية عقب ارد اقول بسم الله علي اخاف اولد بعملية من كثر ما اغلط في الكلام.. وسبحان الله ولدت بعملية ولو دريت انه اسهل من الطبيعي من الأول جان اخترتها من البداية وفكيت عمري من التعب .. الدكتور يقولي انتي ست راجل بالمصري اونه لاني تحملت الألم...هذي قصة ولادتي ... والحمدالله كل تعب يهون على شوفة عيالنا ... والله يرزق كل محرومه يارب...

(f)(f)(f)(f)(f)(f)(f)(f)(f)(f)(f)(f)(f)(f)(f)(f)(f)(f)(f)