ابي نصايحكم لاتبخولون علي

اختي حبيبتي تطمني صديقتج ان شاء الله ما تغيرت عليج
بس تعرفين المسؤليات تكثر وتكثر والداوم ياخذ كثير من مجهود الانسان .. والواحد يقضي نص يومه في الدوام يرجع تعبان وماله خلق

واتكلم لج من تجربه .. لانه تقريبا صار ليي مثل الشي مع خطيبي اول ما اشتغلت
قلت طلعاتنا وشوفاتنا وحتى مكالماتنا

عليج بس تقدرين ظروفها .. ويوم الي يكون عندها اجازة وهي فاضية مري عليها قعدي معاها .. او اطلعي معاها إلى اي مكان تحبوونه

مشكورة عزيزتي على الرد

السلام عليكم

اختي كسر



بتكلم عن تجربتي و يمكن تستفيدين منها مع صديقتج علشان ما تخسرينها مثل ما انا خسرت رفيجتي

انا كان عندي صديقه من 9 سنوات و كنا حيييييييييل مع بعض من ايام الثانويه والجامعه و عقب الجامعه


ليمن اشتغلنا و كل وحده اشتغلت بمكان غير عن الثانية

المهم انا المكان اللي اشتغلت فيه حييييييل متعب بحكم تخصصي و ما اقدر افضى بكل الاوقات

و ما اقدر اكلمها الا برة الدوام من كثر الشغل و خاصة انا كنت موظفه يديده

و فوقها كنت اخذ اضافي بشغلي علشان الحق اخلص الشغل

هي الصراحه ما راعت هالشي

تبيني على طووووووووول معاها بس كنت وايد اتعب و اجهد نفسي بالشغل و فوقها كنت لازم اجابل اهلي

اعطيهم من وقتي
خاصة والدي و خواتي لازم اقعد معاهم اسولف اتناقش
اهي ما راعت هالشي مرة وحده

مع اني والله والله كنت كل يوووووم اكلمها و اسولف معاها بس اهي تبيني طول اليوم فاضية لها

ما اقدر

تخيلي هالشي سببلي احراج مع اهلي

لي درجة اني كنت اخلي موبايلي بغرفتي و السبب اهي


بعدين اهي زعلت و حذفت علي كلام واني ما احبها ولا ابيها و كلام ماله داعي \\خلتني اعصب و اقطعها

فصدقيني راعي ظروفها و اهي صج صديقتج بس كل انسان له مشاعر وله ظروف معينخ تجبره على اللي يسويه

وانشالله قدرت اوصلج هالمعلومة

مشكورة عروس البحر على نصيحة وعلى عرض تجربتج

ماعليه يالغلا اكيد هي تحبك بس تعرفين الدنيا تلاهي وهي الان موظفه ف طبيعي مراح تكون فارغه زي اول انتي خفي عليها شوي بس لا تقطعين مرره كل مااخذتي فتره دقي والله لا يفرقكم ويهنيكم ..

أسئليها وش السبب وصارحيها..

يمكن عندها مبرر

انا اقول ابتعدي عنها شوي امكن تشتاق لك

موفقه

بس هي وايد عنيدة ومزاجية شو رايكم اطرشلها اربيعتي اتقول لها ولا انا اقول لها ؟

اتخيلو وايد احن عليها وهي دوم تتعذرلي وايد اتصل فيها واقولها بمر عليش وهي تقولي بشوف يوم ثاني واقولج يمر اسبوع وثاني ولا ترد لي خبر اتصلت مرة فيهاشو سويت اتصلت فيها ع الدوام ماردت علي قلت ماعليه مشغوله
طرشت لها مسج قلتلها اذا عادي امر عليج اليوم ردي لي خبر عشان ابي اعرف اتخيلو طنشت المسج ومارت ع المسج ا وانا قاعدة انتظرها عشان تعطيني خبر اتصلت فيها المغرب ماردت علي يعني شومعناه خبروني؟ لي حق ازعل عليها ولا لا؟

اخيتي اكيد انت تحبينها كثير ، و لكن يجب على المسلم ان يلتمس لأخيه المسلم العذر أكيد فيه سبب انت احسن حاجة اذا إلتقيت فيها تصارحيها بالامر قولي لها انك لاحظت انها تغيرت من ناحيتك و اسأليها هل صدر منك شي ازعجها لا سمح الله ، افضل ما في الصداقة الصراحة ، و خليها على راحتها لا تتصلي عليها كثير خاصة في الدوام يمكن تتضايق مع كثرة الشغل و لا حاجة ، و حاولي تشغلي نفسك انت باشياء اخرى حتى لا تشعري بالوحدة و الفراغ ، الله يصلح بينكما و ترجع صداقتكما احسن من الاول .

مشكورة