الحمدلله رب العالمين اللي رزقني الغالية (ميثاء)
يوم السبت .. تاريخ 15/3/2008 ..الساعه 09:07 الصبح
حبيت أكتب لكن قصة ولادتي بأول فرحة لي
وفنفس الوقت .. حبيت أطمنكن .. وأخبركن أنها الولادة تجربة حلوة وراااائعة
أهم شي التوكل على رب العالمين
حبيت أشارككن بقصة ولادتيه عقب ما رجعت البيت على طول
لكن ميثاء فديتها شاغلتنيه طول الوقت .. وأتم أبصبص لها .. فديتها كأنها لعبة
المهم يا خواتي
بتاريخ 13 - 3 - 2008
تعبت وسرت المستشفى وقالت لي الدكتورة 3 سانتي
وقبلها بيومين .. الدكتورة اللي فحصتني قالت لي نص سانتي
فأنا رجعت البيت لأني ما حسيت بالطلق .. اللهم تعب وآلام على فترات متباعدة
اليوم اللي وراه .. سرت مشيت ربع ساعة ويا ريلي وحسيت بتعب
رجعت بيت أهل ريلي .. وتميت آكل رطب وآكل وأنا حاسة بتعب
لكن تميت ألاعب اليهال وأحسس عمريه أنه كل شي طبيعي
على الساعة 1 .. يعني ليلة الجمعة .. تاريخ 14 - 3 - 2008 زاد علي التعب
فطلبت من ريلي وأمه أنهم ايشلونيه المستشفى
ويوم وصلت
فحصتني الدكتورة وقالت 4 سانتي ولازم تترقدين في الدختر
شلوني الجناح الخاص بمرحلة ما قبل الولادة .. وهالغرفة مشتركة (4 أشخاص)
حطولي جهاز التخطيط
وكل ما يت وحدة .. ايكون نازل عندها الماي
إلا أنا .. أحس بقمة المعاناة .. وكل شوي يفحصوني ويقولون 4 سانتي
وأنا قمة الاحباط
وما أحس بالطلق ولا شي
تميت أمشي في الممر وأنا أدعي رب العالمين ايسهل علي وعلى الكل
وكل ما وحدة تصارخ وايودونها الولادة .. أحس بخوف وأتم أدعي وأدعي
والمشكلة أنها أمي اموصية أم ريلي .. أنها لا اتخبرها يوم بيشلونيه الولادة
رغم أنها اتسير ويا الكل
بس اتقول بناتي ما أتحمل أشوفهن وهن يتعذبن
فما خبرتها
يعني اتخيلن .. أول بيبي وأمي ما تدري أنيه على الولادة
دخلنا يوم يديد .. يوم السبت .. 15 - 3 - 2008 .. الساعة 1 (ما بعد منتصف الليل)
ياني ريلي للمستشفى ويايب وياه زيت خروع وعصير
استشرت الدكتورة قالت ما عليه خذيه
رجع ريلي قال لازم أتطمن وأسأل وأتأكد
فسأل دكتورة ثانية .. ويزاها الله خير
قالت له أنا بحط لها محلول بيخليها اتفرغ كل شي فبطنها على طول
وبتبتدي اتحس بالويع شوي فبطنها
حطت لي المحلول .. ودقيقتين إلا وأنا امفرغة كل شي
عقبها تميت أصيح وأقول لريلي برجع وياك للبيت
وهو يمانع وأنا أصيح وأشرح له أنه الفحص ايعذبني
وكل شوي وحدة تصارخ وتتألم وأنا حالتيه النفسية تتعب أكثر وأكثر
ومافيني طلق ولا شي
دخلت الحجرة بلم أغراضي
إلا أشوف الدكتورة من وراي في الظلام اتقول لي .. على وين يا (وذكرت اسميه) وهي تبتسم
تميت أصيح وأقول لها خلاص تعبت
مافيني شي .. وانتن كل شوي تفحصن .. وأنا أتعذب
يوم بحس بالطلق إن شاء الله برجع المستشفى
تمت تترجانيه .. لا ما يصير .. وحالتج ما تسمح لج أنج تطلعين .. وتمت وتمت
وعقب قالت لي بنحطج في غرفة بروحج إذا انتي متأزمة من حالات الحريم اللي يتألمن ويصارخن
وأنا أعاند أقول لها لا أبا أرد البيت
قالت لي أوكي .. بس لازم أفحصج
قلت لها مافي شي .. إلا 4 سانتي
قالت لا .. لازم فحص
فحصتني وقالت لي 5 سانتي .. وعقب فجرت لي كيس الماي على طول
يعني حطتني تحت الأمر الواقع
وقالت لي حالتج ولادة .. وكان لازم أفجر كيس الماي
(يزاها الله كل خير دنيا وآخرة .. لأنها كانت سبب عقب رب العالمين أنها اتعجل لي بالولادة)
طلعت عند ريلي وهو مستانس .. الدكتورة قالت له وشرحت له
فطلبت منه أنه ايرد البيت
واييب أمه وعقب هو ايسير
حطت لي الدكتورة جلوكوز + محلول محرض للطلق .. لأني ما كنت أحس بشي
وعقب عطوني إبرة مسكنة .. عشان أهدى شوي
لكن يوم ابتدى الألم
كنت أحس بالموت .. وأني خلاص ما أروم أتنفس أبداً
واترجيت الممرضات في الغرفة أنهن ايشلن المحلول المحرض على الطلق .. لأني أحس بالموت
وهن أبد .. لا حياة لمن تنادي .. وأنا مب رايمة أشل راسي بسبب الإبرة المهدئة
يعني شرات المشلول اللي يتألم ومب رايم ايسوي شي
تميت أتعذب وأصيح .. لكن فنفس الوقت أحس براسي ثقيييييل
يعني أسمع كل شي .. لكن ما أروم أرد على حد ولا أروم أسوي شي
ويت الممرضة وقالت لي .. لازم هالألم يا حبيبتي عشان الولادة تتسهل بإذن الله تعالى
وسمعت الدكتورة اتقول لي .. في خاطرج إبرة الظهر عشان لا اتحسين بالألم؟؟
وأنا أأشر لها لا لا
قالت لي عيل اتحملي يا حبيبتي .. وإن شاء الله بتولدين خلال ساعات
عقبها نعست وأنا أتألم
وما حسيت إلا والدكتورة والممرضات عند راسي .. وأسمعهن ايقولن 7 سانتي .. ولادة
ويابن الكرسي المتحرك .. وأنا أقول لأم ريلي اتصلي بريلي بسرعة
وفنفس الوقت .. بعده راسي طايح .. وأحس أني بنااااام .. ومب رايمة أرد على حد
ولساني ثقيييل .. أرمس وأنا أقطع في الرمسة
أقول لأم ريلي اتصلي بسرعة بسرعة .. قولي لولدج خليه يلحق
دخلونيه الولادة
ولحق ريلي ووصل
ويدة ريلي (أم أبوه) بعد لحقت ويت
تمت تتقرا لي قرآن طول الوقت وهي تمسح على راسي
وأنا كل ما أسمع آية أهدأ .. خصوصاً يوم قالت (لا يكلف الله نفساً إلا وسعها)
قلت فخاطريه
فعلاً .. برغم العذاب والألم .. لولا أننا انروم على هالشي .. جان رب العالمين ما كلفنا بهالمهمة
(مهمة الحمل والولادة)
وريلي واقف عند راسي وايحط لي الأكسجين
وعقب هو ظهر
وأمه اتخفف عنيه فديتها وتمسح ع راسي واتشد ع ايديني وأنا أشد
والممرضات كل ما يت طلقة .. ايشجعونيه أشد وأدفع .. وأنا ما أعرف
وهن ايعلمني كيف .. وأنا ماشي .. كل ما يت الطلقة .. أكتم الصرخة وأتم طايحة في مكاني
شافن ماشي فايدة .. سارن وطلبن الدكتورة
وعقب .. غير الممرضات .. دخلن دكتورتين
وهن ايشجعن وايشجعن ويطلبن أني أدفع
والدكتورة مسكت ايدي وخلتني أحس براس البيبي .. قالت لي شوفي .. الراس ظاهر
لكن انتي مب قاعدة تدفعين .. وهالشي خطر على البيبي
يوم سمعتها قالت هالشي
دفعت دفعة قوية (سبحان الله .. حسيت بإحساس الأم وأني ممكن أكون السبب في فقدانها لا سمح الله)
وعلى طول .. طلع الراس وباقي الجسم بسرعة ومن غير لا أحس
ومن كثر ما هي صغيرونة ونعومة فحجمها .. راسها صغير وجسمها ناااعم .. ما تعبتني فديتها
يعني أنا كل الألم والعذاب كان في مرحلة ما قبل الولادة
لكن راس البيبي نفسه .. الحمدلله ما حسيت بالألم شرات ما ايقولن الأمهات
ودخل ريلي وهو مب امصدق
لابس نظارته الشمسية عشان لاحد ايشوف عيونه
وحسيت بأنفاسه تتقطع من زود الفرحة
وهو مب امصدق
وياب الكيمرا وتم ايصور البيبي بالفيديو وايصور كل شي في الغرفة
وظهر على طول واتصل بأمايه وبشرها أنيه ولدت
واستانست فديتها وتمت اتصيح وتحمد رب العالمين
المهم
دخلت دكتورة الخياطة
وسبحان الله .. سمعتها اتقول للممرضة الموجودة في الغرفة (ما شاء الله .. شي بسيط)
وقالت لي .. ما شاء الله .. مافي شي .. يعني خياطة بسيطة جداً لو بغيتي
قلت لها هيه بغيت
فطلبت منيه أتنفس الأكسجين عشان ما أحس بشي
وسبحان الله فعلاً ما حسيت بشي أبداً
يعني الحمدلله رب العالمين .. ولادتي كانت سهلة
وانولدت ميثاء فديتها يوم السبت .. بتاريخ 15 - 3 - 2008 .. الساعة 9 الصبح
قبل تاريخ ميلاد أبوها بيومين .. وأنا اتمنيت هالشي .. عشان اتكون موجودة في يوم ميلاد أبوها
والحلو .. أنه تاريخ ميلاد أبو ريلي 20 - 3
يعني الحفيدة 15 - 3 .. الأبو 17 - 3 .. الجد 20 - 3
وريلي وأبو ريلي وأنا وبنوتتي كلنا نفس البرج .. برج الحوت
والكتكوتة فديتها انولدت عقب 9 شهور من زواجي
رجعت البيت اليوم الثاني .. وأول صبح لميثاء في البيت كان صباح تاريخ ميلاد أبوها
فديتها يا رب .. وعسى الله يحفظها وايخليها لي ولأبوها واتكون من الذرية الصالحة
دعواتكن يالغاليات