الله يا اختي.. حتى انتِ صابتك بلوة مع الخادمة!

السلام عليكم ورحمة الله وبركاته

صراحة انا ماحب هالركن لأنه يجيب الهم والغم .. ولا احب المشاركة فيه الا للضرورة ، اقصد للرد فقط، واما طرح مشاكل فلااااا والف لا
..

بسس اللي صاب اختي مب مشكلة ... الا مصيبة وبلوة طاحت على راسها..

خـــــــــــادمتها حـــــــــامل !

احنا ما عندنا خدم .. والحمدلله والشكر الكثير له، ومتحملين ضغط البيت على بلاويهم..
بس اختي ونظراً لتوسعة منزلها، صار كبير جداً.. وصار لازم احد يساعدها فيه..


المهم واستقدموا لهم اثيوبية..
وكانت اول ما وصلت متمسكنة وكله دااالعة رقبتها على جنب.. صغيرونة في الحجم ووجهها استغفر الله مش حلو..
وكنا كلنا متخوفين ومومهتمين بمظهرها الخارجي من كثير ما نشوف ونسمع بلاوي الخدم..
وعاملتها اختي بمنتهى الادمية والاحترام.. وبحذر ايضاً.. ما تخليها لوحدها تعمل اي شيء..


وكانت لما تشوف زوج اختي او ولدها الكبير تدور بوجهها جهة الجدار وتتغطى ..
احنا كنا نقول اكيد المكتب موصينها تسوي هاللون.. مب منها يعني..

وكنا كله تطلب الاتصال بأهلها اول ما وصلت.. وكانت تتصل مرتين.. مرة برقم ثابت الى بيت اهلها والمرة الثانية الى هاتف متنقل الى اخوها موسى..

المهم كانت الخادمة شاغولة من الزين، وتكرف كرف اليهد... واختي ما شافت منها ما يعيب بتاتاً ..
وكانت اختي كله تقول اخاف احسد روحي على اول تجربة لي مع الخدم ناجحة و بعدين تعوي ذيلها ..

المهم كانت مثل ما قلت لكم كله دالعة راسها على جنب، وساعات كله تيود الكلينكس على بوزها ..
واكيد لما وصلت البحرين ودوها المركز الصحي عشان الفحص الطبي الضروري، وعطوها حبوب وخرابيط منها مضاد للسل ...
ولما رجعوا البيت قالت لها اختي خلي الحبوب عندي وانا راح اعطيك كل جرعة بوقتها..
كانت تاخذ الحبوب وتقول بتروح فوق غرفتها وبتشربهم.. بس اختي شكت انها ما تشربهم وسكتت عنها ..
المهم
اختي كانت كله تقول لنا انها ما تييها الدورة !
قلت لها يمكن عندها اضطرابات ترا يصير..
اختي خافت وفكرت بعد انها ماخذة ابر في بلدها ولا شيء يمنع الدورة انها تنزل..
بس بعد مرور شهرين والشهر الثالث والدورة ما يتها... اختي شكت وبقوة
امس كانت بتعطيها الجرعة المعتادة حبوب السل.. الا تقول لها لا ماما هذي حبوب مو زين..
قالت لها ليش مو زين .. عوجت رقبتها وهي تقول مابي ماما موزين مو زين..
المهم الحت اختي عليها .. والا تقول.. لأن الحبوب هذي تطلع لي حليب من صدري !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!:rolleyes: :eek:

بعد هذي ما يبيلها حجي ولا شك...
قالت لها اختي فلانة فيه بيبي ؟؟؟؟
الا قاعدة تصيح وتمسح ببطنها لا لا ماما مافي بيبي مافي بيبي..

المهم اختي خلاص تيقنت منها انها اكيد حامل.. بعد انقطاع دورة والحين الحليب .. اصلا الحليب ما يطلع الا بعد مرور شهور من الحمل يعني في الشهور الوسطى !
وشالتها المستشفى وهناك الطبيبة بحرينية تعاونت معاها وحللت وصج طلعت حامل!!
اختي كانت تقول ما احتجت اشوف النتيجة كنت متأكدة 100 % انها حامل..
بس اهي شكلها بجر وما تدري انه يطلع حليب ولا كانت ما راح تخبر اختي بهالشيء..

وموسى الا كانت كله تتصل له باستمرار طلع انه البوي فرند مالها...

الشيء الاكيد انها حملت من اثيوبيا مب من البحرين، لأنها مووول ما صارت بروحها من يت عندنه..
يا مع اختي بالبيت او اذا بتطلع يكون تنزلها بيت عمها ولا بيت اهلي..
وبعد تأكدت اختي انها لها وايد بالحمل لأنه نزل لها الحليب.. واهي توها مكملة عندنا 3 شهور بس..
فيعني ما يصير تبلغ الشرطة بأمرها لأن مب من البحرين حامل ولا عندها رفيج !

سود الله وييها سواد ما يبيض..
هذا وكلنا كنا متعاطفين معاها وتكسر خاطرنا متمسكنة
واختي مراعيتها من الزين وتعاملها بكل احترام وانسانية..
وحتى طلعاتهم وعشياتهم بالمجمعات والمطاعم كانت معاهم..
..


المصيبة الحين انه اكتشفنا الامر يوم الخميس الليل..
والجمعة والسبت اجازة رسمية عندنا..
والمكتب صاك..
اتصلوا بصاحب المكتب تهّرب منها وما بغى ياخذها الا يوم الاحد..
واختي وزوجها خايفين وايد..
اختي اصلا مب طايقة تطالع وييها..
ومن اكتشفوا امرها صارت تنظف البيت كللللللله.. الظاهر تبي تسقط روحها او شيء..
واختي وبيتهم خايفين منها تسوي شيء بروحها تنتحر تحذف عمرها من الدريشة ولا تشرب كلوركس ولا اي بلوى تسوي بعمرها..

يابو شغالة رفيج زوج اختي.. من جنسيتها وتعرف عربي زين.. وتفاهمت معاها الا تقول انها خلال رحلتها من اثيوبيا لي اهني اغتصبها واحد..
الحين اهي ياية مع 3 شغالات حق بيت عمي ورفيج ريل اختي الثاني... هدوهم كلهم وما اغتصبوج الا انتي ست الحسن والجمال...

شوروا علينا .. شنو تسوي اختي مع هالبلوة اللي عندها لي يوم الاحد؟؟؟؟؟؟؟