ان كشخت حسدوني وان ما كشخت صارت مصيبه

والله حالة غريييييييييييييييييييبة:rolleyes:

الله يعينك اختي

انتي حاولي لما تروحي لعندهم لا تلبسي أشياء جديدة أو شنط جديدة

ولما تشتري شيء جديد خليه للطلعات مع زوجك على شان تكوني مميزة بعينه

وعليكي أختي بالرقية الشرعية من العين ترى العين قاتلة


وطمنينا عليكي

لاتسيىء الظن يمكن يتصرفون كذا بدون وعي او لانهم يحبونك ويحبون ذوقك الحلو بس هما بعد مو نفس اللون والله يصلح حالك ويهديهم

تصدقون عاد جاني مرض الله يشفيني منه ويشفي مرضاكم ومرضى المسلمين امين على سبب عين وانا ما اروح لاحد بس اهلي واهله
هذا غير الكوابيس و الاحلام الغريبه

انا خلااااااااااااااااص تعبت وامي تقولي لعد تلبسين عندهم شي بس زوجي يهاوشني
اذا قلت له ابي السوق يقول انا اشتري وانتي ما تلبسينها بس بالدولاب

واحيانا اروح وانا شكلي عااادي ويفشلني ويقول خواتي كاشخات وانتي لا

والله انا احترت ان لبست تعبت ومرضت وتشوهت وان ما لبست زعل ابو الشباب وووش اسوي

بس بقولكم موقف يضحك
مره وحده جاتنا وقالت لي خلاص فكي التقويم اسنانك زااااااانت والله والله بس ابتسمت وشوي الا التقويم كله متفكك والخيوط تقطعت

شرايكم

وتراني اقراء الاذكاااربعد

السؤاااااااااااااااااااااااااااال هينا يقول

شرايكم وش اسوي يابنات والله تعبت نفسي اللبس واتدلع بدون نكد وتعب

وبدون محد يقلدني
بس ماني عارفه وش اسوي


نسيت اقولكم انه اذا شافوا علي شي حلو قالوا لخوهم عطنا فلوس مش لنا مصروف

وانا مره سالت شيخ عن ذا الموضوع فقالي مدام عندهم ولي امرهم ومدامهم اكلين شاربين اخوهم مش مجبور انه يصرف عليهم انتي اولي بالصرفيه

المشكله انهم يفكروني مفقره بولدهم ما يدرون ان ابوي الله يخليه لي ويطول في عمره ويشفيه قولوا امين يمشي لي مصروف


هاه يااااابنات وش الحل ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

حالتك غريبه ..عيونهم ما صلت على النبي..
انا من راي اختي نبض خبري زوجك بالسالفه قولي له انا ما ابي اتكشخ الا لك
خافي على حالش بعدين ما احد بينفعك منهم..

هلا اختي واضح جدا انها عين بس ربما مجرد غيرة يعني ما يكرهونج لكن عيبهم ما يذكرون الله.. تره اتصير العين حتى من انسان يحبج جدا .. مب الحل انج ما تلبسين بالعكس لبسي لكن ارقي نفسج .. و اقول لكل الخوات لا تقولون ارقه نفسي بس بلا فايده .. ارقوا انفسكم بخشوع و بيقين تام و في كل مرة ان الله سبحانه قادر ان يحميكم من كل شر .. يعني اتوقعين عينهم اقوى من دعائج طبعا لا .. في كل مره اتدشين عليهم قولي (اللهم اكفنيهم بما شئت) (و جعلنا من بين ايديهم سدا و من خلفهم سدا فأغشيناهم فهم لا يبصرون) طبعا غير المعوذات و (بسم الله الذي لا يضر مع اسمه شئ في الأرض و لا في السماء و هو السميع العليم)( 3 مرات)

الله يعينج .. انا مع اخواتي فقراءة الاذكار والبقره.. بس عندي فكره.. شو رايج مدام هم عاجبنهم ذوقج هاتيلهم هدايا من لبس واكسسوار وفهميهم هذا يناسبك ونسقيلهم الالوان وحاولي تساعديهم فالتزيين صدقيني مع الوقت راح تكسبينهم بنفس الوقت تنسقيلهم لبس يناسب شكل جسمهم والالوان مع القصات دايما راح ياخذون رايج قوليلهم كونوا مميزين حاولي تقولين هالكلام وابدي اعجابج بشكلهم دايما بالشكل اليديد..مع الوقت راح تتغير نظرتهم لج.. وراح تتحسن العلاقه صدقيني الهدايا تغير من نفسيات الاخرين.. ومنها راح تاخذين رايج وتلبسين اللي يعجبج من غير ما يقلدج احد..

استخيري و لا تحطي الموضوع على بالك كثير... و أهم شي ارقي نفسك بنفسك و استمري على الأذكار و حفظك الله من شر حاسد اذا حسد...

والله عزيزتي..أنا أحس حالتج نفس حالتي لما كنت بداية زواجي كنت ألبس و أكشخ و اتعدل لأن نحن عندنا العروس لازم تكون متميزه على الأقل لمدة سنه...بس المصيبه أن كل ما لبست شيء قاموا أهل ريلي يبون يعرفون من وين و بكم!!!! و الله أنا أستحي أسأل وحد إذا عجبني شيء عن سعر هذا الشيء و من وين..بس مليت من كثر سؤالهم من وين و بكم..و أخت زوجي كل ما لبست شيء و لا طلعنا نشتري شيء تبي تشتري مثلي مع أنه يكون ما يناسبها لأنه صغيره و يكون للكبار..بس تدرين شو سويت..يبتها لهم بطريقه غير مباشره في الكلام و قتلهم أنا مول ما أحب أقلد حد و لا أحب أشتري شيء كل حد عنده و لا أحيب حد يقلدني..ومن هكي اليوم فهمتها أخت ريلي إني ما أحبها تقلدني فما قامت تقلدني

الله يعطيكم العافيه جميعا على مروركم الكريم وردودكم الحلوه ان شاء الله بلتزم فيها وبطبقها

اقري الاذكار اولا ثانيا البسي مايناسب المناسبه وان اطلبوا شي قولي لاخواتي...
او ماقدر احتاجه

وربي يستر عليك

والحاجه اللي ما يقدرون يشترون مثلها مثلا اكون جايبتها من برا او جايتني هديه ياخذونها منى او يستعملونها

هههههههههههههههه
ماتزعلي اختي مابقصد اتمسخر لكن الحكاية مضحة
كان الله بعونك ومتل مابيقولو الاخوات ماتلبسي شي جديد كلو قديم ومشحتر من شان مايعرفو شو الجديد
بالنسبة للحسد اقرأي اية الكرسي 3 مرات وبسسسسسسس

يازين الجلابيات تراني من اكبر مناصرينه اشتري لك كم جلابيه وبدل عاديه وخليه مخصصه لاهل زوجك وفي بيتك اكشخي زي ماتبين وتحصني قبل ماتروحين لهم وفهمي زوجك انك لما تكشخين تتعبين وقوليله الظاهر صابتني عين علشان كذا بس بكشخ لك

والله يعينك

السلام عليكم

اول شيء اختي الله يعينج

بالنسبه للعين .. صدق عين ما صلت ع النبي

اختي قولي الاذكار ( اذكار الصباح والمساء ) لانها راح تحميج ان شاء الله من العين والحسد

اول اقري سورة القره

ثانيا

والله مادري شو اقول .. صدق مب حلو التقليد وايد

تدرين لا تكشخين وايد بيت اهل رييلج .. اكشخي طبعا لانج عروس بس مب بشكل مبالغ فيه وملفت جدا

واذا شفتي انه اهل رييلج يقلدونج يمكن صدق هم يحبوون ذوقج .. حاولي تعلمينهم كيف يشترون ويختارون يمكن يبوون رايج وذوقج .. مثلا روحي معاهم المول والسوق

بس اذا شفتي انه هالحركه متعمده لازعاجج .. كلميهم عن الموضوع .. ترى التقليد مب حلوو قولي لهم وكلمي رييلج بعد اذا انت وايد متضايقه من الموضوع

حبيبتي انا من رايي كشختي راح يحسجونك على كشختك و اذا تبهذلتي راح يحسدونك على بهذلتك

في ناس جذي اعوذ بالله حتى على المصيبة يحسدون

انا من رايي تكشخي و عوذي روحك قبل لا تطلعين من البيت و خلي لسانك دايما بذكر الله عندهم يعني مثلا اذا قالوا هذا الاسوار حلو قبل لا تردين قولي ما شاء الله تبارك الرحمن من هالحكي

و عن التقليد ليش زعلانة؟؟ انا لو منك افرح اني كشخة و الكل يبي يصير مثلي المهم انه هم يعرفون كلش زين منو الاصل

الله يوفقك و يبعد العيون عنك امين

ها صج نسيت شغلة شنو يعني اذا شي مو موجود بالبلد ياخذونه منك اسمحيلي هذا غلطك اختي و اذا حرجوك قوليلهم هدية ما اقدر اعطيها

انا ما اقولك صيري نحيسة بس ما احب الغصب يعني اذا برضاك كان بها بس غصبا عنك ما يصير صراحة

والله بلوه الله يساعدج ويحفظج من العين

بس إنتي ليه لما يذكرونج في شي ما تقولين لهم صلي على النبي وذكري الله صج هي حركه الناس ينتقدونها بس إنتي منصابه منهم كذا مره يعني لو قلتي لهم راح تخف حركاتهم ويقولون وش فيها هذي عبالها بنحسدها ومع الأيام ماراح يهتمون لبستي لو لا.

بس خلج قويه وقوليها في وجوههم صلو على النبي وتعرفين البخيل اللي لما ينذكر النبي ما يصلي عليه اللهم صلي على محمد وآل محمد.

وفي شغله بعد يسوونها النسوان الكبار أنج تاخذين من ماي الفناجيل وتمسحين على يدج. ناس تقول إن هالحركة جهل أو ماأدري وشو. لكن أقول لج سالفة وبتصدقين مره وحده من أيام المدرسه كانت في حصه الرياضه أسرع وحده في الجري ووحده من البنات قالت لها بل بل سيارة مو آدميه ومنها البنت كل رجولها توجعها وراحت لشيخ وقالت له إن ريلها ما تدري وش سبب وجعها قال لها هذي عين والعين صوابه عشان تروح عنج العين أخذي من ماء الوضوء لهذي البنت وتسبحي به، عاد هي راحت للبنت وقالت لها أنا تصوبت من عينج وقال لي الشيخ كيت وكيت فقالت لها معليش ويابت طشت وتوضأت فيه وقالت لها سامحيني ما قصدت. وعدت السالفة على خير يعني العين تصيب تصيب حتى في مثل يقول ما يحسد المال إلا أصحابه.

أما أنا صار لي موقف مع بنات عمتي هم دايما من يشوفون الوحده تلبس وتكشخ يسألونها بجم ومن وين والله إحراج أنا لو أموت ما أسأل أحد هالسؤال بس أقول لهم حلو وعليج بالعافيه، عاد أنا قويه جان أقول لها محد علمج إن عيب تقولين للناس هذا من وين وبجم، وأنا ما أحب أحد يلبس مثلي واللي أنا ألبسه موجود بالسوق يمكن مريتي عليه وما شفتيه، والشي الحلو علي يمكن ما يصير حلو عليج. يعني لو وحده عاقله كان إتعضت من كلامي لكنها ما زالت تعيد وتكرر هالسالفة من وين وبجم ؟؟؟ ههههههههه حتى آخر مره سألتني عن خاتم كنت لابسته تقول حلو خاتمج من وين؟؟؟؟ خواتي سيده طالعوني لأن يدرون لساني متبري مني ههههههه عاد قلت لها هذي من السوق ههههههههههههه

ا لله يعينج اختي من العين
بصراحه خواتي بارك الله فيهن وفوا وكفوا ,, بس اللي ابى اقوله لج اختي
مادام عيونهم قويه فحذاري منهم ,و مب شرط انج تتكشخين حقهم وانت سايره لهم البيت
البسي عادي من غير مبالغه واذا سايرره لبيتكم واو سايرين تتعشون برا في ديك الساعه
ممكن تتكشخين وتطلعين قمر ,, لانج انت عروس وفي نظر زوجج عروس أميره ,,
هذا كله ع شان تفادين العين الله يكفينا شر العين ,, و اللي ما صلى ع النبي
أنا بعد اختي اذا أسير الدوام البس شي يديد يطالعوني ويقولون وايد حلو من وين وبكم ,,
طبعا العرب اللي معاي يقولون ما شاء الله المشكله ف الاجانب الهنود والفلبينيين ما يقولون شي
فاضطريت اعلمهم كلمة ما شاء الله ,, الحينه اذا يشوفون اي شي حلو هم من تلقاء نفسهم
يقولون لي ما شاء الله والله العظيم .. حتى انوصار لي موقف مره جابوا لنا موظفه جديده
وكنت قاعده أعلمها وقاعدين مع بعض المهم الصبح طبعا افطر واسوي لي ساندويتش ف البيت
واحط فيه جبنه ,, ف كل يوم اتقول لي انت تاكلين جبنه وما تمتنين اقولها لا الحمد لله
واتقول لي لو اكلها كل يوم امتن ,, رديت عليها قلت لها جسمي مو مثل جسمج بس الحمد لله جسمي وايد حلو لا ضعيفه ولا متينه ,, ما امدح في نفسي ,, والله يا خواتي ما تصدقون ان مرضت اسبوع
وانا طايحه في الفراش مب عرفوا شو السبب احس بحراره بجسمي ووجع في بطني كل نصف ساعه
يجي ويروح ,, رحت عند 2 دكاتره ما عرفوا السبب والله العظيم لين ما نزل وزني ما اكل بالمره ,,
بس شو نسوي اختي العين موجوده موجوده بس الواحد
ياخذ حذره ,, وربنا معانا الله يحفظنا من عين بني ادم ويكفينا شرها
بس انت اختي عليج بالرقيه الشرعيه رقي نفسج وان شاء الله ما تخافي

أنا من النوع اذا اصابتني عين أتاوب وايد وايد أو راسي يعورني

الله يكون بعونك يالغلا
شكل هذولاء عيونهم مره حاره
انا ما راح ازيد على كلام البنات وراح اعطيك النقط بشكل موجز زي ما ذكروها
1- الرقيه
2- لا تتكشخين قدامهم
3- حاولي تعلمينهم شو اللي يناسبهم او لا وروحي معهم السوق وخلهم يتشرون على ذوقك
والله يشفينا ويشفيك ويشفي كل مريض بالعين يارب
مودتي