كيف اكسب ام زوجي؟

حبيبتي الكلمة الحلوة و الهدايا هم احسن طريق للوصول لقلب ام الزوج دايما بينيلها حبك و انها من مقام امك حتى لو مو صج بس الحريم الكبار يحبون هالسوالف

و بالنسبة لمشكلة الثانية ما ذكرتي شنو نوع التدخل يعني ممكن زوجك معطيها مجال زيادة انتي اهم انك انتي و زوجك متفقين بحياتكم خليها تتدخل بس لحدود ما تخرب حياتك او خلي زوجك يفهمها بطريق غير مباشر دون ما يجرحها

الله يوفقك

مشكورة اخت ابرا الجنة بس انا كنت ازقرها امي مع انها كانت تعاملني على اني غريبة عنهم..

الاسلام عليكم ورحمة الله وبركاته
اولا انا عضوه جديده في المنتدى وابغى اكون وحده منكم ان شاء الله
اختي ام الفلاحي انا راح اتكلم عن تجربتي الخاصه مو من فراغ
ام الزوج لو تولعي اصابعك كلها شمع لا يمكن تكون مثل امك
انا متزوجه من عشر سنوات كنت اعتبر نفسي مثل بنتها
وهي مثل امي وازورهم دايما بحكم اني ساكنه في نفس العماره
لكن لما شفتها تسويلي المشاكل من تحت لتحت وتبان قدام الناس
ضعيفه وعلى نيتها بعدت شوي وقللت الطلعات وخليت بينا حدود
وانصحك حافظي على ها الحدود احسن

خلي فيه حدود للاحترام وان شاء الله تمشي حالكم على خير

بالكلمه الطيبه والدعاء في كل وقت إن الله يكفيكي شرها ويسخرها لك وخلي علاقتك معاها رسميه فمهما سويتي ماراح تكونين لها بنت ولا هي راح تكون لك أم
الله يوفك ويعينك

شوفى اختى الغاليه الانسان يتمنى انه يكون طيب وخلوق وعلاقته جيده بمن حوله وخصوصا ام الزوج كونها ام اقرب الناس لج وجده الاحفاد وبتعيشين معاها العمر كله واسمج خلاص ارتبط باسم عايلتهم ... فلازم تكون العلاقه طيبه وانا مصلج يا اختى متزوجه من سنتين وشهور وكنت اعاملها بكل طيبه واحترام ادش احب الراس واطلع احب الراس واعاملها بكل احترام وما ايى وايدى فاضيه لازم اتنقص بشى بين فتره وفتره وعندى ولد دايما لما ادش اخليه يروح يحب راسها ويعنى عشان علاقتنا تكون طيبه بس انا مثلج استحى اقعد وايد واهم عموما عايله اطباعهم غريبه فكنت اتحاشى الجلوس وايد يعنى قعداتى قليله لكنى ما اقصر .. وبعد مده اكتشفت او بالاصح اهيا اللى قالت لى وبطريقه جدا بايخه بصراخ انى انا مو زينه وانا دوم اضايقها بولدى ؟؟ وانى اخلى ولدى يكرهها وانى اتعمد انى ما اقعد معاهم وانى ما ابيهم وبالضبط نفس الطريقه قايله حق اهلها انى مو زينه معاها ؟؟؟؟ وكلام وايد الله يسامحها والله انه كله ظلم وفعلا انقهرت قهر وحسيت انى مظلومه حبيتها على راسها وقلت لها ما يصير خاطرج الا طيب وصعدت غرفتى بس للاسف سوت فينى جرح كبير وجرح السيف يبرى وجرح الحجى ما يبرى ..... فققرت الاتى : اهيا مره كبيره وما ابى احط حالى حالها راح تصير معاملتى معاها رسميه جدا جدا جدا .... واوضح لها بتصرفاتى ان مو على كيفها تمشينى واللى تبى تقوله خل تقوله .... وانشالله ربى يفرج على واطلع بشقه بروحى وارتاح واكون بعيده وعزيزه وكرامتى محفوظه ومالها حق انها تنطق بكلمه ..... والله يسامح الجميع الواحد يسوى باصله يا اختى واهم شى الدعاء ان ربى يفرج همومنا

عزيزتي عمليها بما يرضي الله
وعمليها كما تحبي ان تعاملك
فانتي سيكون عندك زوجة ابناء انشاء الله
فعامليها مثل ما تحبي ان تعاملي
لا افراط ولا تفريط
وصدقيني محد يقدر يقولك عامليها كذا او كذا
لان اصابع اليد ماهي مثل بعض
يعني::::::::::: انتي مو مثلي ولا ام رجلك ماهي مثل ام رجلي
وعليك بالدعاء والله يكون معاك ويوفقك

ماعليه حبيبتي طولي بالج معاها
حاولي تشلين الخجل لانها حسبة امج وتمي سولفي معاها
قوليلها انتي مضايجه مني في شي .. يعني تفتحين معاها نقاش
وراح تستانس عليج ان شاالله
وعليج بالهدايا لانها تقرب وتزيد الموده

الله يوفقج حبوبه