السلام عليكم ورحمة الله وبركاته
كيف حالكم حبيباتي عساكم بخير ,,,
موضوعنا اليوم عن الأسماك ,,,
أسماك الزينه ...
أحب اني اربي أسماك الزينه عندي
حاليا عندي أربع احواض وكل حوض فيه نوعيه معينه من الأسماك
وهذا وعد لوحده عزيزه على قلبي اني انزل موضوع يخص الأسماك ...(انوار الحب )
طيب بعطيكم فكره عن بعض الأسماك الي ممكن تربونها بالبيت
عموما انا حطيت اكثر صور الأسماك الي ممكن تلاقونها بمحلات الأسماك الزينه للبيوت
ولكن بعض النصائح وقت ما تبين تربين الأسماك
أولا :
حجم الحوض المفروض يكون مناسب لعدد الأسماك الي تبين تحطينهم فيه
يعني لو كان الحوض بهذا الحجم ممكن تحطين 8 أنواع من الأسماك ممكن يكون منوع او من نفس النوع
وان كان بهذا الحجم ممكن تحطين بس عدد 2 من الأسماك
ثانيا :
وقت شرائك الأسماك بيحطونه لك بكيس بلاستك
مربوط بلاستيك صح ؟
المفروض انك لما ترجعين البيت
اتحطين الكيس بالحوض علشان ياخذ درجة حرارة الحوض وبعدها بعشر دقائق
فتحي الكيس وخلي الاسماك بالحوض بشويش
ثالثا :
أكثر الأشياء الي ممكن تقتل الأسماك
الأكل الزائد
المفروض لما يكون عندك حوض كبير
انك تفتحين غطاء الحوض وتوقفين اشوي بدون ما تحطين الأكل
علشان يتجمعون كلهم لجهتك
لا تستغربين لو أسماكك ما سواااا المطلوب منهم
لأنهم ما تعودوااا عليك لسه
العمليه هذي جدا مهمه علشان الكل يحصل على حصته من الأكل
حاولي تقليل الكميه يعني كأنك تبهرين السلطه مجرد اشوي
ولا تخافين الكل راح يحصل وجبته اليوميه خصتا ان البقايا راح تنزل بين صخور الزينه
ووقت جوعهم راح تلاحظين انهم يلتصقون بهذي الصخور بحثا عن المزيد ...
طيب أيش رايكم نشوف الصور مع بعض ونتكلم عن بعض الأنواع من الاسماك
وبعدين نخلص النصايح المهمه لتربية الاسماك بالأحواض المنزليه ....
هذي النوعيه
من الأسماك
من أحلى الأسماك الي احبهم ومخصصه لهم حوض كبير عندي
ميزت هذي الأسماك انها تبيض بسرعه
يعني لو تحطين ذكر واحد بين أربع إناث كلها شهرين وراح تلقين حوضك مليان من هالنوعيه
من الاسماك
كيف تعرفين الذكر من الأنثى الانثى يجي ذيلها باللون الأسود
أما الذكر باللون العادي البرتقالي مثل باقي لون جسمه
لاحظوا هالصوره
هذي الصوره للأنثى وشوفوا بطنها كيف تحمل فيه البيض
أكثر من 500 بيضه احيانا
بس هااااا
مو كلهم ممكن يشوفون الحياه
يعني ممكن بعضها ياكلونه :confused:
والبعض منهم يدخل بالفلتر ( المنظف )
خصتا ان احجامهم جدا صغيره ما تقدرين تشوفين الا العين ههههه نقطه
كيف تقدرين تربينهم ؟؟
حتى أم الأسماك الصغيره تكون خطره على اطفالها الصغار :ss:
والحل انك تسوين لهم اعشاش :wink:
كيف ؟؟
شفتي الأعشاب الصناعيه
مثل الحشيش
حطيه بقاع الحوض
وتحت الاعشاب حطي الصخور الخاصه للزينه
وقت تفريخ البيض
راح يتم الاستعانه بهذي الصخور كملاذ لهم عن الاسماك الكبيره
ولما يكبرون اشوي يتجرأون تدريجيا انهم يرتفعون اشوي اشوي ويتأقلمون
مع الأسماك الي احجامها اكبر
واذا طلع واحد منهم شيطان (6) وهو صغير مصيره بيكون وجبه للأسماك الكبيره (6)
طيب قبل ما انسى اقول لكم
أن هالنوعيه ما يحتاج لهم الأكسجين ولكن يحتاج للفلتر المنظف علشان
ما راح تقدرين تنظفين الحوض الا كل اربع الى ستة شهور
والسبب انك ممكن تخسرين البيض وقت التنظيف
فأفضل طريقه انك تشيلين اشوي من الماء الي بأعلى الحوض كل شهر مره وحده
وتحطين ماء جديد بنفس الكميه الي شلتيها ...
ومع الفلتر راح تلاقين ان الماء دائما نظيف
مع افضل اني احط نوعيه ثانيه من الاسماك معهم
والسبب اني راح اخسر الأسماك الصغيره ....
طيب شوفوا هالنوعيه من الاسماك
هذي النوعيه الله يسلمكم
أنا اسميهم المبوزين
يعني دائما عاقدين النونه وزعلانين هههههه
هذي النوعيه من الاسماك سريعه ومفترسه نوعا ما
يعني لو حطيتي معهم نوع ثاني من الاسماك الي لها ذنب طويل وحلو
ممكن انهم يفترسونه
وبما انها من النوعيه السريعه فالأفضل انك تحطين معها الانواع السريعه فقط ...
احلى شي في هالاسماك انها ممكن تمرض وتصحصح بسرعه
ما شاء الله قويه مره يعني ما يأثر فيها كثير
عندي وحده انبطت عيونها ومع ذلك مناضله وتحب الحياه ههههه
عاد قصتها قصه
لونها أسود ومزينه بالبرتقالي
وان ركزتي عليها عدل مكتوب عليها مبروك بالعربي
سبحان الله
كل ما يجيني احد يسئلني وش مكتوب عليه ؟؟
في شي مكتوب عليه ؟؟
واخر شي تهاوشوا اثنين مع بعض واخر شي انبطت عينها
بس الحمدلله عايشه ولو انها متشوهه بس احبها كثير (y)
قلت لكم قصتها ونسيت الموضوع
طيب نرجع للموضوع
هذي الاسماك وغيرها من الاسماك اذا طلع عليها نقط بيضاء
يعني انها مرضت بالفطريات ..
الحل انك تحطين دواء الأحواض وراح تلاقين الدواء بمحلات الاسماك
انتي بس قولي دواء للفطريات وبيعطونك اياه
اربع قطرات باليوم ان كان الحوض كبير
وان كان الحوض صغير قطرتين يكفي
يوميا الى اربع خمس ايام تقريبا
طيب بالنسبه لأكلهم يحبون ياكلون الاكل العادي للأسماك ولكن
يحبون الربيان المجفف
حتى الاسماك الصغيره ياكلونه ولو كان حي أفضل لهم
لا تستغربون !!!!
أنا أأكلهم اسماك حيه
واحاول اني انسى الموضوع هههههه
طيب هم ما يحبون ياكلون او يفترسون الاسماك الحيه وانتي موجوده
الي يحصل وقت ما تصكين اللمبه حقت الحوض
راح يشوفون شغلهم مع هالاسماك
اخذ لهم الاسماك الرخيصه الي لا حول لها ولا قوه
عموما هذي سركل الحياه
طيب هالاسماك لازم تعيش على جهاز الاكسجين
والمفروض كمان تحطين لهم الفلتر
والحوض تبعهم ممكن تنظفينه مره كل شهرين كفايه
شوفوا هالنوعيه من الاسماك
تراااا ما فيها بيض هي شكلها حلو كذا
كأنها حامل ...
وذيلها روعه روعه
احلى شي بهذي النوعيه
انها تحب تتمخطر على راحتها
يعني هي من الاسماك البطيئه جدا ما تنفع تحطينها مع الاسماك السريعه والمفترسه
بس عيبها ان اقل شي تموت
يعني يبي لها عنايه فائقه
اعتقد ما عرفت احد عنده هالنوعيه وتم عنده اكثر من اربع شهور
سبحان الله الحلو ما يكمل
طيب هالنوعيه يعيشون بالاكسجين وكمان الفلتر
واحواضهم الأحسن كل ثلاث شهور مره تغسلينه
ما يحتاج اكثر كفايه ان ما عندهم مناعه يعني لمجرد تغير درجة الحراره
ممكن يأدي لموتهم بسرعه ...
خصتا لما تشوفينهم ان ما عندهم توازن بالماء
خلاص اعرفي ان موته قريب لا محاله الا في حالات نادره
طيب هذي النوعيه برضوا
من الانواع البطيئه او احيانا سريعه يعني فيهم حالات نادره انهم يكونون
سريعين ....
هذي ممكن تحطينهم مع الانواع السريعه ولكن الغير مفترسه
وممكن تحطينهم مع الانواع البطيئه وراح تتأقلم معهم
لما تحطينهم مع الانواع السريعه راح تكون سريعه معهم علشان محد يفترس ذيلها
وراح تلاحظين انها لما تخلينها لحالها من صغرها بالحوض مع نوعيتها فقط ان ذيلها يطول ويصير احلى واحلى ...
طبعا هذي النوعيه تعيش عاده سنه الى سنه ونص تقريبا
وهي قويه وتمام احسن من الي قبلها
وفي منها لونين او اكثر بس اكثر شي ممكن تلاقونه اللون الفضي على الابيض
او اللون الأسود على فضي ...
ونفس الشي تحتاج للأكسجين
أممم هالنوعيه من الاسماك
مره عدوانيه ومفترسه
يعني ما يطيقون روحهم مع بعض فما بالكم لو حطيتي معهم نوعيه بطيئه
جدا حلوه وخصتا لما تحطينه بحوض دائري يطلع شكله حلو وكأنه كبير
وذيله الي مقصوص بدقه سبحان الله يعطيه جمال على جمال
لكن جدا مفترسه يعني ما انصح انكم تحطون صبعكم بالحوض
او ان تحطون اثنين بحوض واحد
حتى لو كان ذكر وانثى ما ادري ليه ...
حتى لو تم التزاوج بينهم يتم بشكل مفترس يعني ينتفها تنتف وبعدها ...
وممكن يموتها وما تشوف يوم حلو معه ... ( عالم الحيوان ) ههههه
هذي النوعيه ما تحتاج للأكسجين
وما يحتاج لفلتر
وجدا قوي وعادي لو تنظفينه بالأسبوعين مره واحده ما راح يصيده شي
وممكن اطعمينه الاسماك الرخيصه راح يستانس هههههه
محد يقدر عليه الا هالنوعيه
يعني لما تنقهرين منه قطيه على هذا ويشوف شغله معه ويأدبه ههههههه
ماراح تلاقين اثره اليوم الثاني
خصتا ان هو الي يبتدي العراك واخر شي مسكين يطلع خسران ( مباراه )
طيب نتكلم عن أسماك البلديه
يعني ايش الاسماك البلديه
هذي الاسماك مالها شغله الا انها تلتصق بالحوض وتشتغل ليل نهار نفسي
تنظف + تنظف + تنظف + وبعد تنظف ههههههه
جدا مهمه بالاحواض الكبيره
وما راح تلاقين اثر للبقع داخل الحوض
مهما يكون الفلتر مهم للاحواض هالاسماك برضوا جدا مهمه
مع ان شكلهم قبيح ولكن انتي خليهم بس علشان التنظيفات
انا ما حبيت اشكالهم ولكن
استعنت بأشياء ثانيه ....
مثل الحلزون نفس العمليه
تلتصق بالحوض وتشوف شغلها
للأحواض الكبيره اتركي اربع حلزونات
وللأحواض الصغيره اتركي حلزونتين
أم الربيان ياكلونه
ولكن انا اربيه
بحوض كبير فيه انواع واشكال من أم الربيان
جدا شكلهم كيوت
طيب أكلهم برضوا الاسماك الرخيصه الصغيره او الكبيره ما تفرق
او تعطينه ربيان مجفف او طازج تبع الأكل
كل سنه تقريبا بتلاحظين ان يفصخ ثوبه القديم ويطلع له ثوب جديد
جدا هالعمليه ممتعه انك تلاحظين كيف يغير قشوره
::::::::::::::::::::::::::::
وآخر شي أبي اقوله ...
كيف يتم تنظيف الحوض
أول شي جيبي دلو وحطي فيه ماء ليوم كامل
علشان يموت كل الفطريات الموجوده فيه ويروح منه الكلور
ونفس الوقت ياخذ على درجة حرارة الغرفه
وبعد 24 ساعه
تبتدين تنقلين الأسماك بالدلو او الحوض الثاني
تاخذين الحوض الرئيسي
تغسلينه بالماء وفيري
وتشطفينه عدل مدل
وبعدها تملينه ماء
وتخلينه 24 ساعه قبل ما تنقلين الأسماك مره ثانيه بالحوض
بعد 24 ساعه تبتدين بنقل الاسماك
ولا تنسين الاكسسوارات انك تنظفينهم مثل اهتمامك بالحوض
بالنسبه للفلتر لازم كل اسبوع يشطف بالماء ويعاد بمكانه سريعا خصتا الاكسجين
::::::::::::::::::::::::::
ملاحظه وضع الاكسجين بالحوض الثانوي مهم علشان اسماكك ما تموت
الاسماك الي تحتاج للأكسجين ما تقدر تستغني عنها اكثر من نص ساعه
يعني وقت شرائك اسماك جديده تحتاج للأكسجين
روحي البيت بسرعه قبل ما يموتون
وحبيت اني اضيف حاجه نسيت اني اذكرها بالنسبه لأم الربيان
تراااا ما تقدر تعيش بدون اكسجين ....
::::::::::::::::::::::::::::
تم ولله الحمد اضافة موضوعي اليوم
وان شاء الله استفدتوا من المعلومات الي يخص أسماك الزينه
وأي استفسار أنا حاضره ....
::::::::::::::::::::::::::
تــــــــــــــــــــرانيم