اللي تحب الأكل المكسيكي أو الصيني راح تحب هالطبق لأنه عن جد لذيذ وصحي وخفيف على المعده وكلما أكلتي ما راح تشبعين.
الطبخة جربتها في مطعم برجرلاند وعجبتني وااااايد وشفتها سهله وقمت وسويتها والكل حبها
والكمية اللي راح أحطها تكفي 8 أشخاص
المقادير
1 ملفوفه صغيره الحجم مقطعه جوانح
1 فلفله خضراء كبيرة مقطعة جوانح
1 فلفله حمراء كبيرة مقطعة جوانح
1 فلفله صفراء كبيرة مقطعة جوانح
1 طماطه كبيره مقطعة مكعبات
1 بصله بيضاء متوسطة الحجم مقطعة جوانح
1 دجاحه متوسطة الحجم مفيوحه ومقطعه جوانح
1 علبه مشروم مقطعه
1 مكعب ماجي
1 فنجان صلصة الصويا
1 كاس ماء
1 فنجان زيت زيتون للقلي
كيسين خبز لبناني يحتوي على 10 خبزات
البهارات: (ملعقة طعام ملح، ملعقة طعام بزار، ملعقة صغيره فلفل أسود مطحون، ملعقة صغيره ليمون أسود مطحون، ملعقة صغيره كركم)
طريقة التحضير:
على النار في مقلاه عميقة (مقلاة الجاينيز) نحط الزيت مع البصل ونقلبه شويه بس يذبل ونحط عليه الطماط ومكعب الماجي.
الحين نجي نحط الخضروات كلها دفعه واحده مع علبة المشروم وصلصة الصويا والماء ونقلبه زين ونغطيه عشان يستوي ببخار الماء
بعد ما شفنا الخضروات بدت تذبل نحط البهارات على طبقنا ونحركة بكل حب هههههه تعرفون سر أطباقي هو الحب مو أي شي ثاني.
ونغطيه عشان يتشرب طعم البهارات ، وبعد 10 دقايق نطفي النار
والحين نجي للتقديم نقطع الخبز اللبناني نصفين ونحشيه بالخلطه وبالهناء والشفاء
جربوها وإدعوا لي
أفكار :
إذا ما حبيتي تسلقين الدجاج تقدرين تستخدمين صحن شوارما دجاج بداله أو بقايا دجاج من الغداء
إذا سلقتي الدجاج لا تحطين لا ماي ولا ماجي في الخلطة وإستخدمي ماء سلق الدجاج بيكون ألذ
تقدرين بدل ما إتعبين روحج في التقطيع تستخدمين القطاعة الكهربائية
لي حسيتي إن الماء زايد على الطبخة وخصوصا أن الخضروات نفسها تطلع ماي حطي ملعقة دقيق وهي راح تمتص الفائض من الماء.
