الليلة سويت جريمه في ولدي....سامحني

توقعت جريمه صحيح ضربتيه،طاح ،أهملتيغ لاسمح الله

أذا على الفطام كلنا مجرمين

الله يوفقك في فطامه ومن وجهة نظري أتخاذ قرار حاسم أفضل من الترددواالتدرج

هلا حبيبتي
فاهمة شعورج يا الغالية
بس لابد من هاشي

عورتي قلبي >> جذي عاد تسحبينا سحب الى موضوعج ؟!

يالله الله يعطيج الصحة والعافية في فطامه >> واشوي اشوي وان شاء الله راح يعوفه . يبي لج قوة قلب في هالحظات .

موفقة

الله يعينش يا الغاليه

اني ابغي افطم بنتي بعد بس الي يخليني اتردد شلون بتنام في اليل

شهوده
نور الورد
امـ علاوي
جعفريه
am slooh



شكرا حبيباتي

والله أحس أني مسوية جريمه في حق ولدي وماني قادره والله حتى أنام و حتى ولدي مو قادر ينام لأنه متعود ما ينام الا بالرضاعه :confused: ياربي ساعدني و قوي قلبي ..... أحس هالحضات و الله صعبه و خاصه لأني في الغربه و أهلي في البحرين:confused:

الله يعينج ويسهل عليج حبيبتي

قلبي معاج والله

حاااااااااااسه فيج حبيبتي

الله يساعدش اختي نجمة الرضا
كلها فتره بسيطه وبتعدي اتحملي هي صحيح مرحله صعبه بالنسبه للام وللولد بس لابد منها
الله يعينش وتنتهي هالمرحله

خرعتيني عبالي صار فيه شي الولد ..الفطام مرحلة من مراحل حياة الطفل حتى يستقل ويعتمد شوي على حاله ويتعود على الأكل بشكل تام ..وكونج أم مرضع فكانت علاقتج أقوى بإبنج وتحسي انج كنتي تعطيه من خلال الرضاعة كل الحنان والحب وانج لما بتفطميه كأنج بتنفصلي عنه بس هذاا شي ظاهر بالعكس بتزيد علاقتج بيه ولاتحزني حبيبتي ,,واشتري له هدية بمناسبة الفطام وحاولو تطلعوا معاه وتلعبي أكثر معاه خلي البابا يطلع معاه لحالهم واعطيه عصيرات منوعة وشوفيه اي نو ع يحب جربي معاه انواع الحليب بس اهم شي يشرب من المصاص مو من الرضاعة ..وانتي شجعيه واني سبق واني فطمت ولدي وكان عمره سنة و6 شهور وكنت اقرأ عليه بعد ماينام واخلي دايما الماء جنبي في لليل وقت اللي يصحى اشربه شوي لين ماتعود وصار ينام طول الليل و ولدي كان يبكي اول شي بس من التعب ينام واحيانا ينمام على توم & جيري (n)

وبالتوفيق ان شاء الله مع فطام حسوني الله يخليه لج.

الله يساعدش نجمة الرضا انتم السابقون ونحن الاحقون هدي ،،عقبالي انشاء الله مللني ولدي واجد يشرب 24 ساعة ما يهدةعلى قلة الفايدة الكالسيوم ما يمتص جسمه،،حاولت افطمة علشان ياكل حطيت ليه ملح ما فاد شربة ولا يهمة،ورديت حطيت ليه كجب قلت يمكن يخاف منة ادا شافة وشربة اصلا ستانس بطعمه مع الحليب ...بشوف بجرب الومي الاسود يمكن يفيد....الا ما قلتي جم عمر ولدش..

بسم الله الرحمن الرحيم
الحمد الله رب العالمين


بعد ويش بسوين لازم اتسوين جدي حق مصلحته
وامي الله يحفظها اذكر انه خلت حق اخوي المرة اكيد تعرفينها
هذه اساليب اتساعد حبابة وان شاء الله الله ييسر لج الفطام

سلام ..

الله يهديش خوفتيني و بعدين ضحكتيني .. عادي و لا تهتمين .. و عشان ما تحسين بالذنب إتذكري إن رب العالمين حدد مدة الرضاعة بسنتين و بنص مذكور في القرآن بوضوح .. يعني ما فيها وحدة و لا ثنتين .. و يعني أكيد فطام الطفل بعمر سنتين هو الأصلح ليه

بس أني ما أحب طرق الفطام بوضع نكهات منفرة على صدر الأم .. يعجبني أكثر إن تفهمين الطفل و لازم بالتدريج و هي فعلاً يمكن أصعب شي فترة الليل و رضعة ما قبل النوم ...

أني توني فاطمة ولدي من حوالي شهرين و الحمد لله .. للحين يحن للرضاعة و ما أعطيه بس ياخذها بمزاح و ضحك

بقول ليكم عن طريقتي .. قبل فترة من الفطام قمت أمنع عنه الرضات النهارية شوي شوي .. أول شي قمت أأخر بينهم شوي و بعدين قمت أكنسل بعضهم و أحاول ألهيه بأي شي .. رضعته إللي أعطيها إياه بعد رجوعي من الدوام تخلصت منها بأن أمي قامت تنيمه قبل لا أرجع البيت .. و شوي شوي لين ما تخلصنا من رضعات النهار .. بس الليل كان مشكلة شوي بس قمت أصر عليه و يبى ليها صبر كبير .. قمت أقول ليه كل ما يقععد طول الليل لا ألحين ليل شوف ما في شمس بره .. في البداية ما كان يفهم بس بعدين تعود إن الكلام إللي قاعدة أقوله معناته إن ويا الظلام مافي حليب .. بقينا على رضعتين وحدة قبل النوم في الليل و وحدة أول ما يقعد من النوم .. و كنت أكثر من الدعاء بأن يعينني الله تعالى على الموضوع .. قمت ألمح ليه يومياً بأنه هو كبر و صار كبير مثل أخوه .. و قمت أقول ليه الكبار ما يشربون حليب .. و من هالكلام لين ما في يوم من الأيام لما صار سنتين قلت ليه إنت صرت كبير مثل سلمان (أخوه) شوف سلمان ما يشرب حليب .. بعدين بنروح فوق بنشرب ماي و بنصك الليت و ماما بتسوي ليك Big Hug (يعني بحضنه) و بنام قول OK قال OK ما صدقت من الفرحة و رحت وياه و سوينا إللي قلته و تميت أهز فيه سنة لين ما نام .. لما قعد الصبح عطيته و في الليل رجعنا كررنا نفس الشي و لين يطلب كنت أقول ليه لا و إنت كبير و هالكلام و بعدين ثاني أو ثالث يوم حتى رضعة الصبح وقفتها .. و طبعاً قام يعترض بس أني ما تراجعت في كلامي .. أذكر تقريباً ثالث يوم قعد من النوم الصبح معصب حده .. و يبكي مثل المجنون إلا يبي حليب .. بس هني كانت اللحظة الحاسمة لو تراجعت فكأني ما سويت شي و بيفهم إن يقدر ينتصر عليي .. فرفضت أعطيه و حملته و نزلت الدور الأول و قمت أمشي في البيت و أهز فيه و هو يبكي لين ما حس إن ما في أمل .. و عدى الموضوع على خير و الحمد لله

الخلاصة برأيي إن تستخدمون إسلوب بالتدريج و تفهمون الطفل ليش بتفطمونه و إنه هو كبير عشان ما يخاف أو يغضب و تكثرون من الدعاءلله تعالى .. وبعد لازم تعوضونه خلال النهار و تحسسونه بمكنته الكبيرة عندكم و تكونون صبورين معاه و تمدحونه عشان يحس إن فعلاً هالشي زين و لأنه كبر و إنه مو عقاب من عندكم .. و الله يعينكم يا رب

السيدة البحرينية;5325327:
الله يساعدش نجمة الرضا انتم السابقون ونحن الاحقون هدي ،،عقبالي انشاء الله مللني ولدي واجد يشرب 24 ساعة ما يهدةعلى قلة الفايدة الكالسيوم ما يمتص جسمه،،حاولت افطمة علشان ياكل حطيت ليه ملح ما فاد شربة ولا يهمة،ورديت حطيت ليه كجب قلت يمكن يخاف منة ادا شافة وشربة اصلا ستانس بطعمه مع الحليب ...بشوف بجرب الومي الاسود يمكن يفيد....الا ما قلتي جم عمر ولدش..

ما شاء الله على إبنك ضحكتيني على سالفة الكتشب .. أيه عليه و الله يحفظه

وي وآنه آقول شنو مسويه أم زنوبة في ولدها الفقير المسكين.. طلعتي فاطمته،، آنه سويتها من قبلج، قطعت راس حلمة الرضاعة وقلت له الفار أكلها، لاعت جبده الولد لأن مايحب شكل الفيران وبس من يومها ماشرب بالرضاعة.... عادي ترانا مثل ماقالوا البنات كلنا مجرمين بس عشان مصلحتهم.....

لا تلومين نفسج..

هذي سنة الله، لازم تقطعين ولدش عن الرضاعة بعمر السنتين!
الله يعطيش الصبر والعافية..

وتوكلي على الله..

أنا أنصحش ما تقطعينه فجأة.. بالتدريج
حتى لا ينصدم الطفل ويأثر بنفسيته..

واعرفي ان هالمرحلة صعبة عليكم انتوا الاثنين
الله يكون بالعون

[GRADE="00008B FF6347 008000 4B0082"]الله يعينج ويوفقج في فطاامه وهذا شي لابد منه
وكلنه بنسويه لعيااااانه
خرعتييني الله يهدييج عبالي مسويه شي فيه
وفعلا هالحضات صعبه والله يعيين كل ام[/GRADE]

&& شهوده &&;5324577:
الله يعينش يا الغاليه

اني ابغي افطم بنتي بعد بس الي يخليني اتردد شلون بتنام في اليل

يالغاليه أم شهوده ...نصيحه مني كملي مع بنتش السنتين وبعدين أفطميها (y)

والله بالرغم من أن ولدي باقي على عيد ميلاده الثاني أربعة أيام و أنا حاسه بالذنب:confused:

lovely flower;5325314:
خرعتيني عبالي صار فيه شي الولد ..الفطام مرحلة من مراحل حياة الطفل حتى يستقل ويعتمد شوي على حاله ويتعود على الأكل بشكل تام ..وكونج أم مرضع فكانت علاقتج أقوى بإبنج وتحسي انج كنتي تعطيه من خلال الرضاعة كل الحنان والحب وانج لما بتفطميه كأنج بتنفصلي عنه بس هذاا شي ظاهر بالعكس بتزيد علاقتج بيه ولاتحزني حبيبتي ,,واشتري له هدية بمناسبة الفطام وحاولو تطلعوا معاه وتلعبي أكثر معاه خلي البابا يطلع معاه لحالهم واعطيه عصيرات منوعة وشوفيه اي نو ع يحب جربي معاه انواع الحليب بس اهم شي يشرب من المصاص مو من الرضاعة ..وانتي شجعيه واني سبق واني فطمت ولدي وكان عمره سنة و6 شهور وكنت اقرأ عليه بعد ماينام واخلي دايما الماء جنبي في لليل وقت اللي يصحى اشربه شوي لين ماتعود وصار ينام طول الليل و ولدي كان يبكي اول شي بس من التعب ينام واحيانا ينمام على توم & جيري (n)

وبالتوفيق ان شاء الله مع فطام حسوني الله يخليه لج.

شكرا يالغاليه lovely flower

قلبي يتقطع على ولدي لما أشوفه يصيح:confused: و كأني حارمتنه من حقه...الله يقدرني ويساعدني ....

شكرا على فكرة الهديه ...ترى مجهزه اليه كاسات ملونه و الماصات اليي يشرب بالعود و ماخذه الى بتي علشان لا تغير على أخوها(f) بس أشوفه يدفرها بأيده وما يبغيها و صاير عصبي ...

و أبوه مشغول عنده أمتحانات في الجامعه ....يعني أني الليي أطلع معاه والحمد لله صار بره البيت ما يرضع و ينشغل باللعب:)

عاشقة الاسمراني.... شكرا لدعائش لي ....فعلا هذه اللحضات جدا صعبه و أحس بيصير ولدي بعيد عني:).....

بنت الاصايل....شكرا حبيبتي على النصيحه ...و الله حاولت أتدرج معاه.. وكنت على طول أطلع معاه و أخته الى الحديقه و أي مكان بره البيت علشان ينشغل باللعب ...بس مجرد نرجع البيت يجي يبغي يرضع و أنا أستسلم اليه:( ....قلبي ما يطاوعني أمنعه ....و خاصه لأني الحين بعيده عن أهلي والله جان ساعدوني في فطامه ....وزوجي الله يحفظه مشغووول بدراسته في الجامعه
فاضطريت أقطعه فجأه ...لأنه التدريج معاه مستحيل ....والحين يبغي يرضع و يجي و يصيح و بس يتذكر طعم اللومي الأسود يقول اليي أييييييييع :ss:

أم سلمان الحلو...ما شاء الله عليش جريئه و ياريت ربي يعطيني مثل قوتش في الفطام... والله كل ما يصيح أقول بتنازل و بعطيه ...لكن أفكر في مصلحته قبل أي شي (y)....

ولدي مشكلته ما يحب يتفاهم بس يصيح و ما يعطيني مجال علشان أكلمه و أقول اليه الحين أنت كبرت ما شاء الله عليك ولازم الحين تشرب بالكاس و هذا ما ينفع اليك الحين!!!!



ام عبادي القمر.....شكرا حبيتي ... ترى فكرت في المره ..و أني الحين ساكنه في لندن... ودور زوجي و ما حصل ...قالوا الينه في محلات الأعشاب الصينيه و تصير في وسط لندن و أحنه ساكنين في الشمال و المسافه جدا بعيده ...:ss:

السيده البحرينيه....شكر خاص لكِ من قلبي الله يصبر ولدي على الليي هو فيه الحين
والله يقويني على فطامه...لأن أذا رجعت في قراري أحس بأثر على شخصيته مستقبلا

تمتعي بأحلى اللحضات الليي ترضعين فيها ولدش ...ما حسيت بها الا بعد اللحظه الحاسمه للفطام:confused:...مسكين ولدي مو راضي يسكت و كل شوي اقول برجع في قراري ...(n)

وعمر ولدي الحين سنتين الا أربعة أيام ....6/ مارس/2008 بيكمل السنتين بالضبط(y) عقبال العمر كله يارب و يبغلني يارب....

و يخلي اليش يوسف و و الله يصبرش على لحضات الفطام..


رانيا البحرينيه.... شكرا حبيبتي .... ولا تتوقعين أم زنوب مجرمه حقيقية الا في هالشي والله حسيت روحي فعلا مجرمه و أمنع ولدي من حقه الشرعي في الرضاعه:16: لأنه والله قطع قلبي من صياااحه:confused: