والله ندمانه شوروا علي

السلام عليكم ورحمة الله وبركاته
هذه أول مره انزل فيها موضوع في المنتدى بس والله ما دخلت ومانزلت المشكله الا لأني عارفه أنكم بتساعدوني وبتلاقولي حل ان شااء الله
السالفه ومافيها أنا مخطوبه لانسان بس أنا من دوله وهو من دوله ثانيه ونحن أهل بعد على فكره .. أنا أدرس وهو يدرس بعد يعني مشوارنا شوي طويل لين ما نتزوج ...
المشكله بدت من يوم ما بدينا دراسه ودواام والله يا بنات كل شي تغير علي حتى هو وحليله قالي ترى الدراسه مارح تخلينا ناخذ راحتنا شرات قبل ... والله كنا في الاجازه طوووول الوقت ويه بعض ونسولف ونسولف لا أنا أحب أطلع من البيت ولا هو بعد يحب يطلع من البيت بس عشان يكلمني على فكره نحن اكثر سوالفنا ع المسن لانه المكالمات دوليه مثل ما قلت لكم يعني نادر اذا بنكلم بعض بالفون ... المهم فيوم كلمني ع المسن ويلسنا نسولف وماحسينا بالوقت وطافتنا صلاة العشا فأنا خبرته أنه نسير نصلي وجي وغير جي أنا لابتوبي بتفضي بطاريته وماعندي جرج فقلت له بعد ساعه بنتجابل قالي أوكي .. والله يا بنات أنا انشغلت وهو ما سأل على التأخير فقلت يمكن هو بعد انشغل وجي وبالليل طرشت له مسج اعتذار حلو ومارد علي سويت طاف وبالباجر أنا تعبت وطحت مريضه وهو والله ما سأل نحن متعودين نسأل على بعض بالمسجات وجي وطاف هاك اليوم وهو أبدا ما سأل فطرشت له مسج أسأل عنه وخبرته اني مريضه ولا اهتم ولا رد علي والله حز في خاطري واايد بس طوفتهاا وبالباجر طرش لي مسج أنه نازل البيت يعني مروح من الجامعه بدون ما يقولي شحالج والا سلاماات والله يا بناات طاحت دمووعي واضايجت وعقب جي دشينا المسن ويلسنا نسولف وهو يعرف اني شاله فخاطري تصوروا انه جلب الموضوع علي وقالي انا وصلت البيت ولا تحمدتيلي بالسلامه والله اضاايجت قلت له انا قلت لك فيني جي وجي ولا عبرت ولا كنت ترد يلس عقب يسب في نفسه ويقول انا حقير وأنا ما أحس وأنا ماأدري شو أنا أسف وجي وعقب قالي بخليج ترتاحين مني للأبد وطلع من المسن بدون ما أقوله .. اتصلت فيه وااايد ولا رد علي والله اني انقهرت ويلست أصيح وعقب من القهر والعصبيه قمت أطرش له مسجات أقوله أنت حقير وأنت جذاب وانت لعاب وجي يعني كلام أنا أعرف أنه هو مب جي بس من القهر طلع مني ووعدني عقب انه ما يتصل فيني ولا ايطرش مسجات انا انهرت وحسيت بغلطتي ... ودقيت له يوم الاثنين وكلمته والله انه صوته كاان تعباان والله انه صاااح يابنات جداامي حسيت عمري حقيره لأني سبيته والله ما أستاهله صج بس والله اعتذرت منه واايد قالي مستحيل تكوني انتي الانسانه الي أحبها وتحبني مستحييييل والله ما أعرف شو أسوي دخيلكم عطوني حل أبيه يرجع لس شراات قبل قالي اسمحيلي اذا تغيرت عليج وقصرت فحقج وااايد أشيااء بتتغير والله اني كارهه نفسي لاني مضايجه فيه والله انه ما يستاهل كل اليانا سويته فيه لانه لو أقووول عنه ملاك شويه فحقه سامحوني طولت عليكم بس دخيلكم عطوني حل .. وأتريا ردودكم حتى لو ع الخاص بس المهم ألقي حل لاني ابيي أفضفض لحد وما محصله حد غيركم هني ما اقدر أقوول لحد هالمشكله لأني بحصل بس اللوم وأنا أبي حل لأني حاسه بغلطتي..