في البداية أود أن أتقدم بهذا العمل لمنتديات عروس وذلك للخدمات الجليلة التي إستفدت منها منذ إشتراكي معهم
وأحب أن أبين للعالم جمال ديرتي البحرين وكذلك تعريفهم بالأماكن السياحية والمعالم الأخرى وجزء من تاريخ بحريني الغالية
نبدأ بسم الله الرحمن الرحيم
علم البحرين
ملكنا
نظام الحكم في البحرين ملكي
ويحكمنا صاحب الجلالة الشيخ حمد بن عيسى بن سلمان آل خليفة
خارطة البحرين
العملة
الدينار البحريني وقيمته عشرة ريالات سعودية تقريبا
جسر الملك فهد
اللي بيجينا عن طريق البر بيعبر هالجسر اللي ظل شاهد على المحبة بين شعبين من 1986 وحتى الآن
أو عن طريق مطار البحرين الدولي
باب البحرين
ويقع بداية سوق المنامة القديم تم تحديثه وهو يعتبر بوابة المنامه ولكن بما أنه أول باب أنشأ سمي باب البحرين
مسجد الفاتح
هو مسجد أحمد الفاتح ويعتبر من أكبر المساجد جزء منه الجامع وجزء منه المعهد الديني السني وفيه مكتبة الشيخ عيسى بن سلمان آل خليفة الكبيرة وتحتوي على أكبر مجموعة من الكتب حيث تبرع أهل البحرين بكتب نادره للمكتبة لتكون مرجع لأهل البحرين.
مرفأ البحرين المالي
هو بعده ما إنتهى لكن هذي تصور للجاي بإذن الله
حلبة البحرين الدولية
شجرة الحياة
واللي ظلت شامخة على مدى قرن وسبب تسميتها بشجرة الحياة أنها تعيش على المياه الجوفية البعيدة وجذورها ممتده لمسافات بعيده، يعني أنها كافحت علشان تظل عايشه وخضراء يا سبحان الله.
والحين جولة في متحف البحرين الوطني
السفينة
ومثلكم عارف البحرين تعتبر بلد اللولو والمرجان والغيص معروفين وكانت أشرف مهنة واللي يصير غواص يكون نعم الرجال لأنه يواجه مخاطر في البحر عشان العذارى يتزيون باللولو، ورحلة الغوص تستمر 4 شهور في البحر
اللبس الشعبي
وهو عبارة عن ثوب النشل وكل بحرينية ولحد الحين مازلنا نلبس هالثوب في أفراحنا وخصوصا الجلوات
المطوعه
اللي تعلم الأطفال القرآن وهالشغلة يسوونها النسوان والرجال وبعد ما يختمون القرآن يزينون الولد ويلبسونه السيف أو الخنجر والبشت ويدور به المطوع في الفريج والأطفال معاه، وهو يردد الأنشوده المتوارثه
الحمد لله الذي هدانا .... آمين
للدين والإسلام وإجتبانا ... آمين
بفضله علمنا القرآنا ... آمين
ما من إله غيره سبحانه ... آمين
وكلما يمرون على ناس يرمون عليهم المشموم والحلاوه وطبعا اللي يحفظ القرآن يرفع راس أهله في الفريج
القلاع
(قلعة البحرين وقلعة الرفاع وقلعة عراد)
الصورة لقلعة عراد
مسجد الخميس
كان يعتبر من أوائل الحوزات العلمية، بمثابة الجامعة اللي تخرج شيوخ الدين في البحرين
بس هذي الصوره من المتحف
الخباز
عاد لي ييتي البحرين لازم تضوقين خبز الخباز ما في عليه وخليه يسوي لج خبز بالجبن شي هههههه
عاد تصدقون للحين الخبابيز يلبسون جذي
وفي مثل يقول عط الخباز خبزه لو أكل نصه (يعني لا تسوي روحك تفهم كل شي وكل واحد له صنعه بس إختاروا الخباز لمكانته في المجتمع البحريني)
النافورة
هدية الملك لشعبه تقع خلف مسجد الفاتح داخل البحر
الفخار
هذي المهنة اللي تشتهر بها قرية عالي وما زالت موجودة وأبناء المنطقة محافظين على صناعة الفخار، بس دايما يدول ببال الناس هالسؤال اش معنى هالمنطقة دون المناطق الثانية وأجاوبهم بأن هالمنطقة الوحيدة اللي عندها أجود أنواع الطين في البحرين
النسيج
وتشتهر منطقة البديع وبالتحديد قرية بني جمره بصناعة النسيج وفي معمل للحين موجود على مدخل القرية والحجي طول الله بعمره يعلم أولاده هالصنعه اللي ما وده تندثر
والحجية لها دور بعد في النسيج
الحلوى البحرينية
إذا كنتي تزورين البحرين لأول مره لا تنسين تذوقين الحلوى البحرينية ولا تنسين تاخذين منها للأهل ترى أول ما يدرون إنج زرتي البحرين بيسألونج عن الحلوى، واللي تشتهر بها بالخصوص مدينة المحرق يا بعد عمري المحرق
مدينة الذهب
وتقع في سوق المنامة القديم
بيت القرآن
هو عبارة عن متحف متخصص في الإسلام وفيه مكتبة
مركز الجسرة للحرفيين
وهذي المركز يحتوي على جميع الحرف في البحرين
بلاج الجزائر
هذي البلاج موجود في منطقة الصخير خلف جامعة البحرين وفيها عرشان يتم تأجيرها بمبلغ 6 دنانير لليوم الواحد من الصبح للمساء وفيها مرافق دوارات المياه والمصلى
محمية العرين
محمية طبيعية تقع في الصخير بالقرب من بلاج الجزائر
ندخل جولة بسيطة
وهذا السوق تلاقونه على الشارع اللي يوديكم مدينة حمد إلى سوق واقف
وهذا الصندوق المبيت أو المندوس
طبعا الأوليين كانوا يستخدمون هالصندوق يحطون فيه أغراض العروس ويكون في غرفتها وتحتفظ في داخله بثيابها وذهبها وكحلها ودورمتها (هذي الحمره مالت أول) وللحين البيوت البحرينية ما تخلى منه بس صار إستخدامه للمصليات والمشامر (الجلال) وتلاقونه في السوق الشعبي بمدينة عيسى
انيي الحين للمجمعات
طبعا المجمع ذا الشهره العالمية هههههه
مجمع السيف وعندهم سينما 1 و سينما 2 ولهم مدخل خاص ويعرضون جميع الأفلام وأغلبها أجنبي وأسعارهم دينارين ونص للشخص الواحد
مجمع الدانة
وعندهم سينما الدانه وأكثر الأفلام اللي تنعرض عندهم مصري وهندي وأسعارهم دينارين ونص
مجمع العالي
مجمع ستره
مجمع البحرين
الناس تسميه مجمع جيان عشان إسم المحل اللي يطل على الشارع
الحين أكيد يعتوا من الجولة
تفضلوا على الغدا في أحد هالمطاعم المتميزه
مطعم الأبراج وفي منه فروع (البسيتين، المنامه، الرفاع، غير المجمعات)
أحلى أكله في المطعم بالنسبه لي هامور فيليه على الفحم و ستيك اللحم وشيش طاووق على الفحم والفتوش رووعه وحق السويت أحب الكريم كراميل بالخصوص
مطعم مرمريز
ويقدم الاكل الإيراني بالدرجة الأولى يعني أكلهم كله مشويات مع رز أو خبز
مطعم جسميز
مطعم الوجبات السريعة المفضل عندي وأكلهم خفيف
وعلى فكره هو بحريني بحريني بحريني
وفي منه فروع في عراد ومدينة عيسى والمجمعات
وهذي الصورة عشان تعرفون شعار المطعم
وهذي نهاية جولتنا في مملكة البحرين وحياكم الله في ديرتنا
