¨¨¨°•!¦• خبراتي وخبراتك .. منظفاتي ومنظفاتك* •¦!•°¨¨¨

بسم الله الرحمن الرحيم
ابدأ عروساتي ..
خبرتي بالحياة قليله جدا
ولكن ساكتبها لكم لعلكم تستفيدون منها

المهام اليوميه والاسبوعيه والشهريه ..

عدد افراد اسرتها ..؟عدد اطفالها..؟واعمارهم.؟..
ثلاثه اشخاص .. انا وزوجي وولد واحد عمره سنتين ونصف والثاني بالطريق ان شاء الله

موظفه ام لا ..؟
لا اتمنى الله يكتب اللي فيه الخير يارب

عندها شغاله او لا ..؟

لا
عدد غرفه بيتها .. ؟


3 غرف للضيوف
غرفه المعيشه ..
غرفه للغسيل + كمبيوتر + العاب ولدي ( وراح ان شاء الله بأسسها لأطفالي )
غرفتين نوم ( وحده رئيسيه حقتي .. وحده للضيوف
يعني المجموع 7 غرف
وصاله سيراميك ( متعبتني :()
4 حمامات

جدولي اليومي:
للحين ما حطيت لي جدول امشي عليه
لاني غيرت نظامي وشلت الجدول القديم وباحاول امشي على جدول جديد ولكن لم استقر بعد
لكن بتكلم عن اهم المهام عندي

اصحى على الساعه 9 صباحا ( احيانا قبل بساعه واحيانا اتاخر ساعه حسب :D )

اروح انظف البيت بالريشه ( الله يسعدها ترانيم أقنعتني فيها بعد ما كنت اكرهها )

( غرفه المعيشه و غرفه الالعاب + الصاله لا يغركم انها زي اللوبي ترى مليانه تحف وخرابيط ولسه ودي اخرج طاولة الاكل فيها + المغاسل حقت الحمامات ا كلها برى مافي شي جوات الحمام فانفض الغبار عنها )

وارمي الزباله واكنسهم كلهم بما فيهم غرفه استقبال الرجال ( 3 مرات بالاسبوع )

ولو عندي غسيل حطيته بالغساله ( اغسل 3 ايام او 4 بالاسبوع)

الساعه 11 ادخل غرفتي اصحي ولدي وارتب السرير في نفس الوقت وامر بالريشه على الغرفه ..واكنسها

اغير لولدي وافطره واخلص منه
ادخل للمطبخ على 12 واحيانا بعد,, فأصلي الظهر وادخل اقطع دجاجي ولا لحمتي واجهز للغداء .. واحطهم على النار واحوس لساعه 3 بين غسيل مواعين والتجهيز .
.
احط الغداء على الساعه 3.30 اغسل الصحنين اللي اكلنا فيها وانظف اسطح الدواليب بكذا انتهيت باقي بس اكنسه .. بس ما يكون فيني حيل خلاص

اصلي العصر اخذ ولدي واروح انيمه بالغصب لووووووووووول واريح ظهري شويه( بس احاول ما انام )
اقوم اكمل شغلي ( غسيل + او المطبخ + او ترتيب + كوي )

اخلص شغلي احيانا 7 او 8 مساءا ( احس عمري انهريت شغل )

ما تجي الساعه 12 جسمي مكسر مدخدخه نوم

نتجهز للنوم خلاص ( نلبس البجايم وخلافه)

الساعه 1 او 1.30 لازم نكون على السرير

:
:

زي ما انتم شايفين اني بالجدول ما كتبت عن غسيل الحمامات .. وتنظيف غرف الضيوف .. وتمسيح الغرفه بمنظف الزجاج
لاني للحين ما استقريت على جدول اسبوعي

حمامي اعمله 3 مراتب الاسبوع ( يوم ايه يوم لا لان هو اللي استخدمه يوميا) لكن الكرسي يوميا باعلمكم كيف لاحقا( لما نتكلم عن الحمامات ) .

تنظيف غرفه المعيشه وغرفه الالعاب مرتين بالاسبوع أو ثلاث حسب الغبار (أي استخدام بخاخ الزجاج .. وملمع الخشب .. وتلميع جميع الاكسسوارت وكل شي
ومره بالاسبوع انزل الخداديات والمراكي .. والقعدات كلها وانفضه نفض واكنس من تحتها وارجعها للاسف ما اقدر ادف الكنب علشان الحمل )

غرفتي مرتين بالاسبوع ..غير المرور اليومي

غرفه استقبال الرجال 3 مرات بالاسبوع ( السبت انزل كل الكنب والخداديات وانفضها وارجعه ثاني ) الاثنين مرور بالريشه .. الاربعاء تنظيف سريع يعني الخشب اللي تحت الكنب امسحه وامسح الطاولات والتلفزيون واكنس

3 حمامات الضيوف + غرفه الحريم مره بالاسبوع ( الثلاثاء او الاربعاء )

السيراميك ( كنس يومي بس تمسيح بالمطهر يوم ايه ويوم لا ) سبت واثنين واربعاء

غرفه نوم الضيوف مره بالاسبوع

غرفه استقبال ضيوف كل اسبوعين ( ما احد يدخلها نهائي)

المطبخ طبعا يومي

الغغسيل اها منه
غسالتي كبيره تشيل ملابس كثيره بس العيب فيني
ما احب اخلط الملابس لووووووووول .. يعني ملابسي لها يوم لوحده .. وملابس زوجي بيوم .. وملابس ولدي بيوم ..
غسيل مناشف المطبخ بيوم ..
شراشف السرر والبطاطين اخلها بواحد من هاالايام ..
مشكلتي ان التنشيف 50 % والمنشر جوات البيت .. ومع البرد ما تنشف الملابس بسرعه

عاد كله كوم والكوي كوم اكرهههههههههههههههههههههههههههههه وكلمه اكرهه قليله
:
:
بنات بليز اللي بيتها كبير مثل بيتي ابي طريقه سهله في التنظيف والتنظيم
يعني هالاسبوع كرفت عمري السبت والاربعاء 12 ساعه وانا اشتغل وباقيايام الاسبوع الشغل علي اخف شويه
:
:
هذا جدولي بانتظار جداولكم ..

:
:
الاعمال الشهريه او السنويه ..
اخراج الشبابيك ( النوافذ = الطيق) واطلعهم بره وانظفهم وامسحهم وارجعه ..
والمرواح ..
ومراوح شفط الحمامات ..
والمكيفات ..
هذه بشكل عام .. التفصيل في كل جزء ونبدأ بالجزء الاول وابي اشوف تفاعلكم علشان اكمل ..

انتظروا ردي الجاي ..

راح ابدأ بالمطبخ .. مملكه المرأة ..او مرآه ست البيت




قبل كل شي انصحكم تشوفون مواضيع وخبرات ترانيم .. استفدت منها مره كثير .. الله يعطيها العافيه يارب

التظيف اليومي للدواليب(( قبل وبعد واثناء العمل)) على الكاونتر (سطح الدولاب ) باستخدام منظف ترانيم العجيب ( كلوركس + ديتول + فيري)


ونفس المنظف ارشه على لوح تقطيع الخضار والدجاج .. لاني واثقه بالتعقيم ..
قبل كنت اصب كلوركس ويدي تنعدم من الريحه .. بس بمنظف ترانيم لا ريحه ولا شي وتعقيم وتنظيف يا سلام

:
لتنظيف المجلى ( حوض المغسله )بعد الانتهاء من الشغل .. انظفه بمنظف ترانيم
وايضا لا استغنى عن صب الكلوركس بالحوض لانه رخام بيج وما احب اشوف لونه متغير ..




وكل فتره احاول اصب مسحوق تسليك المغاسل ( كل ما شفت ان المويه ما تمشي زين )

بالنسبه لصنبور ( بزبوز المويه) استخدم بام .. وهذا شكله



صراحه فظيع في ازاله الترسبات الكلسيه وبقع الصابون والصدأ وترجع تلمع لمعه فضيعه ( تلق لق :) )


البوتوجاز والفرن وما ادراك ما الفرن:

استخدامك له يومي ودهون بواقي طعام
..

لحل الدهون اليوميه استخدمت بام للدهون


( بتوقازي غاز ولونه ابيض وما احب احط قصدير احس شكله يخرب )

تعقيب ..
( وايضا استخدمت بام في تنظيف الجدار .. عندي لمبه فلونرست البيضاء ما اقفلها نهائي ولها 3 سنين .. ويوم جيت اسوي جو بالبيت سكرتها وفتحت الحمراء وانصدمت من الجدار .. 
شفته مسود حولين اللمبه .. جربت اكثر من شي لتنظيفه ما نفع .. جربت باموالنتيجه 70-90% راح السواد ورجع الجدار ابيض( نوع الصبغه رش )) )


:
:
للدهون العنيده

اذا كانت عندك دهون متراكمه من سنين على الشفاط او الجدران مالك الا موبي .. وفيه مثل علبته اسمه فورس والغطاء اورنج ( برتقالي )
بس نصيحه ترى ريحته مره قويه واللي عندهم حساسيه ما راح يقدرون عليه الا اذا استخدميت كمامه
انا بخيته .. وناديت شغاله اهل زوجي نظفته وصراحه رجع الشفاط وخلف الفرن كانه جديد

طريقه فتح الشفاط فوق الفرن



في زرين مستطيله ادفعيها للاخل ثم قومي بسحب الشفاط
بخي عليه من البخاخ وانتظري نصف ساعه وبعدها افركيه
واذا ما نظف معاك ممكن تستخدمين ماء دافي لازالته وارجعي بخي من جديد

وخلفه في فلتر .. يمكنك ازاله الفلتر وتنظيفه اسحبي الاعمده 3 وخرجيها بره نظفي الفلتر .. ونشفيه وارجعي ركبيه مكانه ..

يقولون ان الزجاج يطلع بس ما عرفت كيف..
اللي تعرف ياليت تحط لنا الطريقه
:
:
طبعا انزل الشبك الفرن الداخلي برهوافركه بالسلكه ,ايضا اطلع الصينيه اليل تحت وانظفها وانشفها وارجعها
:
:


الثلاجة



نوعها سامسونج .. وماهي عاجبتني .. لانها صغيره بس رفين ودرج
لكن من نايحه التبريد لا والله.. ما شاء الله تبارك الله تبريدها حلو .. و الحمد لله من يوم تزوجت ما خربت
بس صغيره وطفشتني.. ومره حطيت نصف حبحبه ( بطيخ) على الدرج وقام انكسر ( انشطب ) عاد لا تسوون زي بتخرب ثلاجاتكم ( وقد اعذر من نذر :d

وطلبت قطع غيار لي سنه وما جابوا لي للحين .. يقولون عليها طلب كثير .. وطفشت منهم وخلاص ودي ارميها بالشارع

تنظيف الثلاجه ..

الحمد لله ما عمري شميت ريحه من ثلاجتي
لاني دايما احط نصف ليمونه علشان تشفط أي ريحه ..

وقرات من كم يوم ان حطي نصف ليمونه معصورة شوي منها ورشي عليها ملح وجربتها بس لسه النتئج لم توضح بعد :)

تنظيفها من الداخل


استخدمت اله البخار خذتها من ساكو .. اخاف من المنظفات الكيماويه.. فلقيت هذه افضل ..
اما الرفوف اطلعها واغسلها بره وانشفها وارجعها ..
لحفظ التفاح .. الطماطم .. وباقي كرتون البيض
احطهم بتبلويرات ( علب بلاستيكيه .. لان مساحتي مره صغيره والدرج صغير ومكسور ما اقدر احمله اكثر من اللازم .. وعاد المقاضي حقت اسبوع
:
:
ثلاجتي من بره ..
حاطه جدولي اليومي ( طابعته بالكمبيوتر ومثبتته بالمغناطيس عليه ( حاليا شلت الجدول وبادور عن جدول جديد احطه بداله )
حاطه عليها سبورة اقلام صغيره شريتها لولد ي وحسيتها مره صغيره عليه
فاقسمها نصفين نصف ره اكتب عليها الاغراض الناقصه بالبيت ..بدل ما كنت اكتب بورق ..
والنصف الثاني مهامي اليوميه .. او المهام اللي ما سوتيها من الجدول اليومي ..
بالنسبه لتنظيفها كل ما شفت انه يبغالها تنظيف من بره مستحها


سبوره


:
:

تنظيف المايكرويف..

اطلع الصحن بره وانظفه
اما من الداخل جربت افور خل مع الليمون واضعه داخل المكرويف ما حسيته ناسبني وريحه الخل وااااااو مو حلوة
فاستخدمت بعد البخار ..


:
:

تنظيف سيراميك المطبخ

احبه اجليه جلي .. ما بحب استخدم ممسحة الخيوط دائما . الا اذا كنت مستعجله استخدمها
احس المطبخ المفروض يفرك فرك بالفرشاه ..

واستخدم ماء + مطهر جربت عدة مطهرات .. ديتول - داك ( برائحه الزهور - الجريفروت - الفراوله هذا اخر شي جبته ) وكلهم ريحتهم حلوة
بس في منظف جديد اول مره اجيبه اسمه MAS برائحه الياسمين واي ريحه المطبخ خطيره مره
كل شوي رايحه جايه على المطبخ الريحه شي صراحه انصحكم تجربونه
وعلبته تشبه الداك .. اخلطوه مع ماي دافئ وشوفي كيف




افكاري بالترتيب والتنظيم ..

للاسف تفصيل مطبخي ما جاء على كيفي لانه سواه قبل اتزوج وبما انه من كم سنه متزوجه مستحيل يتغير ..ففكرت باشياء بسيطه وسهله تنفع

اولا

فكره لترتيب دولاب المنظفات والمعلبات

والدولاب كان محتاس مره مره العلب فوق بعض لما ابي اوصل للمعلبات حوسه طويله عريضه ..
فحليت المشكله برف توضع عليه الاواني بعد الغسيل يجي حديد ويجي الرف من دورين وبكذا صار دولابي مقسم لاثنين ( هذه للمعلبات)
( استخدمت الحديد علشان يقدر يخدمني اكثر ويستحمل ثقل المعلبات )

اما المنظفات فشريت الرفوف التي توضع عليها البصل .. وتجي بلاستيك ( اربع رفوف ) قسمتها لرفين رفين .. وحطيتها بالدولاب تحت المغسله بكذا اوصل للمنظفات بكل سهوله ويسر
الرفوف تشبه هذه مو مو هيا بالظبط

..

ارفف






الادراج




خذت مثل هالادراج
بدرج حاطه فيه السفر واكياس الزباله اكرمكم الله
والثاني حاطه فيه سفنجات المطبخ .. القصدير .. وغيره من احتياجات المطبخ ..

الثالث مجمعه الاكياس ..
طريقه ترتيبي للاكياس

الفها مثلث مثل السنبوسه
الطريقه
اطوي الكيس بالطول مرتين .. بحيث يصير العرض اصبعين ( ويصير الشكل كانها شريحه سويتيز: ) ثم اطويها كانها سبوسه .. ومسكه الكيس ادخلها بالاخير علشان ما ينفتح معاك )

الدرج الرابع
فارشه جريده من تحت ومخليته لتخزين البطاطس ( بما انها تحتاج للظلام .. )
والبصل والثوم ..
كل وحده احط لها كيس علشان لا يتلخبطوا على بعض .,.(مثل طريقه وضع الخضروات بالسوق الخضار)

ونهاية كل شهر ننظف الدرج

:
:
حفظ السكاكين الكبيره


استخدمت هالتعليقه ( من ايكيا )
بجد كان عندي مشكله في طريقه حفظها
ولدي الله يهديه ويصلحه كان يفتح الدرج ويبي يلعب فيهم فشلتهم ورفعتهم مع الصحون فوق
وحل لهذه المشكله خذنا هالتعليقه
وكمان معلقه عليهم ولاعات النار .. لان ولدي يحب يلعب فيهم فرفعتها عنه وشكله جدا نايس ومرتب:

:
لتعليق المكانس .. والمساحات .. استخدم هذه




بس للاسف تبغى تطيح .. من كثره الاغراض اللي عليها ( لا يغركم الصورة ترى شلت اغلبهم علشان لا تفجعوا حتى الريشه حقت ترانيم مالها مكان فحطيتها من فوق عليها لوووووول)
المهم يا بنوتات اللي تعرف وين تباع بجده اوالرياض تخبرني وين ممكن احصلها ودي بوحده جديده)

:
:
جربت لازاله الدهون بخاخ كلوركس ( هذه صورته )



ازال لي بقع الدهون اللي على المسجل ( حاطته جبن البوتوقاز يسليني بالمطبخ  )
واكيد انعدم .. من طرطشت الزيت ..
جربت عليه كم منظف ما نفع فركته بالسلك ما نفع
لكن يوم استخدمت هذ اواو النتيجة مذهله ..
:
:
تنظيف علب البهار ..


حقتي تشبه هذه تقريبا بس من كل الجهات وحلوة تلف بسرعه يسهل الوصول للي تبغيه
بما انها جنب التوقاز اكيد لحقها دهون
جبت طاسه ( زبديه كبيره ) حطيت ماء حار وعصرت ليمونه كبيره ولا اثنين صغار .. وحطي الليمون بقشره بعد .. وفيري..
حطيت العلب بعد ما فرغتها كلها ونقعتها في هذه المويه وعلشان لاتبرد بسرعه غطيت الطاسه ..
بعد كذا غسلتها بالفيري ووشطفتها بماء دافي نشفتها بالمناديل ورجعت البهارات فيها
واو اللمعه فظيعه والقوارير نظيفه .. ولا بقع ولا شي

:
:
اجهزتي بالمطبخ ..
خبرتي قليل جدا
بس عندي خلاص ملو نيكس زي هذا

( افرم فيه البصل .. والطماطم .. اهم شي ) وشريت علبه جديده من قطع الغيار .. وصرت افرم فيها البسكويت اذا ابي اسوي تشيز كيك .. فاللي عندها خبره بالخلاطات لا تبخل علي وتنصحني في واحد:
:
:


:
:


الصورة مقتبسه من موضوع ترانيم
بالنسبه للمويه عندي براده زي حقت ترانيم بس اخترت القصيره وحطيتها على دولاب المطبخ علشان اللي عنده اطفال ما ينفع لهم بيحسون الدنيا بالمويهرايحين جايين عليها .. ..
بس تعبئتها صعبه .. استنى زوجي يعبيها ليا ..


:
:

وخلاط للكيك عادي وجك العصير العادي .. وصانعهكوفي بس ما اعرف استخدمها هههههههاي ( بابا جابها ليا هديه وما عرفت شلون تستخدم.. وعندي توستر

:
:
من واقع خبراتي الصغيره واليوميه


علشان اتفادي الدموع اثناء تقطيع البصل اقشره تحت ماء جاري ثم احطه بخلاطي اللي قلت لكم عليه
.. او ممكن تحطينه بالفريزر شويه .. قبل التقطيه ..


2- عندك توست زياده ..
حمصيه بالتوستر وقطعيه مكبعاتوساتخدميه مع شربه الكريمه او السلطات
اذا ما عندك توستر
ممكن تعملي الخبز المحمص من اي نوع خبز زياده بالبيت ( صامولي .. شامي= مفرود = لبناني)
قطعيه صغار وحطيه بصينيه وادخليه الفرن او على البتوجاز قلبيه لين ينشف
من غير زيت او دهن .. علشان الحميه :d


3- اخرا الحمد لله ريحت زوجي بشو تبغى على الغداء بكره :d
عملت لي منيو شهري على الورود
كل اسبوع خليته بلون ..
وكتبت اسماء الطبخات .. ورقم الصفحه من الكتاب..
واذا اخذت الوصفه من النت اكتبها بالدفتر علشان ارجع لها بعدين



4- افضل طريقه للتخلص من عناء غسيل المواعين اغسلي الصحون والاشياء اللي تستخدميها الو باول وانتي بتطبخي
واذا كنتي حامل وتعبانه ودك تريحي بعد الغذاء
لا تحطي الصحون بس بالمجلي
حاولي تشطفيها بماء فاتر ساخن علشان اي دوهن تروح ويسهل التنظيف

وعني شخصيا احب اغسل كل الصحون بالماء قبل ما استخدم الصابون .. بكمذا وفرت فيري ., والاسفنجه تقعد نظيفه :d
:
:
:

زاوية تساولاتي



السؤال الأول
س1 /شوايه



كيف تنظفي شوايه هذه .؟ بطريقه امنه ..؟
لاني اخاف كل مره من استخدام الكيماويات واغسلها كثير بس الشك ما يروح .. وزوجي ما يحب احط عليها قصدير ..
:
:

السؤال الثاني س2/


ابي طريقه حفظ الطعام بسهوله ويسر ..؟بعباره ادق .. يعني كيف اقدر اختصر من وقت الطبخ .. بتجهيز الاكلات بسرعه ..؟
شو اللي ممكن احضره قبل بيوم .. او قبل باسبوع .. ؟ من غير ما يرخب طعمه أو تقل قيمه الغذائيه.؟
:
:
:

س3/السؤال الثالث :


لما يكون عندي عزومه عشاء صراحه باحتاس .. اهل زوجي ما شاء الله كثار .. وانا لوحدي .. ما بعرف اسوي شي واحتسا من قبلها بيوم .,
اجهز مثلا اللحم المفروم قبله بيوم هذا اللي اسويه .. واسلق الدجاج ..
طيب شو ممكن اعمل ..؟
وشو الحلى اللي ممكن يتفرزن وما يخرب .. علشان لما يجون ناس فجأه اخرجه وابهرهم فيه ..؟
مع العلم اني بطئيه بالشغل وثلاجتي صغيره اضطر احيانا اودي لاهله يحطون بثلاجتهم لثاني يوم .. بس عندي فريزر من الكبيره المستطيله ..

:
:

انتيهت من المطبخ اليوم وبانتظاركن
جداولكن ..وطريقه تنظيف المطبخ ..
والمره الجايه بنمسك زاويه او غرفه ثانيه بالبيت .. فانتظروني ( اذا مافي تفاعل ما راح اكمل :wink::tongue: )

وارجو عند نقل الموضوع ذكر اسمي .. ومنتدى عروس
ولن احلل اي وحده تنقل تعب هالاسبوعين بدقيقه وما تذكر اسمي
مودتي وتحياتي لكم

موضوع جميييل جداً

للأسف خبراتي قلييييلة لأني متزوجة من شهرين فقط ولم يكن لدي سابق خبرة بمنزل الوالدة بس أقول اللي عندي إن شاء الله وأستغل الفرصة علشان أسأل عن اللي عايزة أعرفه.

لي عودة بس أصلي المغرب.

موضوع روعة أكيد لي عودة بخبراتي

ماشاء الله عليك عسوللللللللللللللة مجهودك حلو الله يعينك انتبهي لنفسك وللبيبي


ربي يوفقك ودعواتك لي يكون عندي بيت اهتم فيه مع ابو الشباب خخخخخخخخخخ


امنيه

ما شاء الله عليج..

ماشاء الله
موضوع متكامل
يعطيك العافيه

وعليكم السلام ورحمة الله وبركاته

نور القسم بموضوعك يا لوليتا

ما شاء الله لا لا الموضوع كبير كبير مره تبارك الله

عن جد فيه معلومات كثيره وحلوه والكل بيستفيد من تجاربك وتجارب الاخوات ان شاءالله

وحبيت اشكرك يا عمري على هديتك الحلوه يالغاليه

الله لا يحرمني منك يا اختي

طيب أنا بكتب كل شي عن المنظفات والاشياء الثانيه

وبكره من الصباح ان شاء الله ادخل واجمع الصور وانزل منظفاتي

بصراحه متحمسه حيل حيل حيل

على الموضوع ....

ربي يسعدك ان شاء الله تعبتي على الموضوع

بس روعه عن جد روعه ...

لي رجعـــــــــــــــــــــــه من بدري

ما شاء الله تبارك الرحمن...

أبهرتيني أختي لوليتا...

و الله الواحد صار يشوف المواضيع في هالركن يتعقّد...

الله يبارك لكم يا رب :flower:

مرحبا الموضوع روعة وحبيت اشاركم فية
عدد افراد اسرتها ..؟عدد اطفالها..؟واعمارهم.؟
عددنا ثلاثة أنا وزوجي وولدي الله يحفضهم لي يا رب والرابع جي في الطريق عمر ولدي سنتين ونص ولي اربع سنين متزوجة يعني خبرة نوعا ما بشغل البيت اشتغل في صالون تجميل بس مرتين في الأسبوع أداوم (مريح صح)
ماعندي شغالة المهم كيف مقسمة شغلي بما أني اداوم نهاية الأسبوع فلازم اخلص شغلي يوم الثلاثاء

ومنكـــــــــــــــــم نستفيد :9_28:




الصراحه موضوع اكثر من روعه شامل و يستاهل التميز :sm240:

شخصيا ما عندي اي خبره في المهام اللي ذكرتيها .. لكن ان شا اله استفيد من خبراتكم و معلوماتكم و بطبقها في القريب العاجل اذا الله راد :sa23:

متحوله البيت اليديد من فتره قصيره جدا وحاليا انافي بيت اهلي لاني حامل في الشهر الاخير و بعد الولاده ان شاء الله برجع لبيتوتي


عائلتي : تتكون من زوجي + انا + البيبي اليديد بعد كم اسبوع ان شاء الله :poster_war:



بالنسبه للبيت :

الطابق الارضي :ميلس وحمامه + غرفه الطعام + صاله كبيره مع الحمام و مطبخ تحضيري مفتوح على الصاله وعندي مطبخ داخلي ثاني مع مخزن وغرفه غسيل ..

الطابق الثاني : 3 غرف نوم بحماماتهم + صاله كبيره الحجم بعد ..

ماعندي جدول معين للتنظيف ان شاء الله بسويلي جدول عن قريب .. ومثل ما قتلكم خبرتي في سوالف البيت شبه معدومه ..

ما عندي خدامه ..

وحاليا ربه منزل ما اشتغل ..




الف شكر لطرح موضوع متكامل مفيد منسق مرتب يستحق التميز والتثبيت :up::up:

المهام اليوميه والاسبوعيه والشهريه ..

هذا الرابط فيه كل التفاصيل ...

http://www.3roos.com/forums/t300244.html

عدد افراد اسرتها ..؟عدد اطفالها..؟واعمارهم.؟..

عدد افراد الأسره 4
زوجي وانا
ولدي 9سنوات
بنتي 8 سنوات تقريبا


موظفه ام لا ..؟
ربت منزل

عندها شغاله او لا ..؟

لا


عدد غرفه بيتها .. ؟

عدد غرف النوم 3
عدد المجالس 2
غرفة المكتبه
غرفة الغسيل
غرفة الطعام
قاعتين
مطبخ داخلي وخارجي
ملحق +مخزن
حوش +حديقه
كارجين
7حمامات


المطبخ ....

بحط كل الروابط الي تخص المطبخ هنا للمراجعه علشان يسهل للجميع
اخذ الافكار التنظيميه ...

تجاربي رقم 1

http://www.3roos.com/forums/t275969.html

تجاربي 2

http://www.3roos.com/forums/t286968.html

تجاربي 3

http://www.3roos.com/forums/t291445.html


تجاربي 4

http://www.3roos.com/forums/t293380.html

تجاربي 5

http://www.3roos.com/forums/t296780.html

تجاربي 6

http://www.3roos.com/forums/t299072.html

تجاربي 7

http://www.3roos.com/forums/t304212.html


تجاربي 8


http://www.3roos.com/forums/t308053.html


طيب بكتب لكم الآن عن منظفاتي ...

أول منظف مثل ما كتبت عنه بتجاربي رقم 1

هذا ما استغني عنه بتاتا سواء لاحواض المطبخ لأعلى الطاولات لجوات الدواليب
للرخام للبقع للحمام لأي مكان خصتا الاماكن البيضاء ...



ثاني منظف داك لشطف المطبخ برائحة الورد



أخذت صورة لوليتا ههههههه



مزيل الدهون العالقه
روعه روعه روعه

استخدمها للشفاط وغيره او للجدران

للمرايا الخاصه بالمطبخ اكيد استخدم وكمان للزجاج المزين للدواليب



أما الصنابير وغيره

شريت المنتج الي كتبت عنه الأخت الغاليه
أسيرة قلبه

مستر مصل
روعه عن جد يخلي الصنابير كأنها جديده

وبرضوا استخدمته للبانيو روعه دعك بسيط ويرجع كل شي جديد مثل ما قالت

بالنسبه لصابون القدور والطناجر

استخدم فيري بالفراوله او التفاح

http://go.3roos.com/ED5tp44roeL

بالنسبه لصابون غسالة الصحون

أحيانا فنيش خمسه في واحد
أو صابون بودره اسمه كلينك

الفنيش استخدمه ان ما كان فيه صحوني روائح مثل السمك وغيره

أما الصابون كلينك استخدمه للأسماك وهذي الي فيها روائح

جربت اسوي بحث عن صورة كلينك بس ما حصلته

للمواسير المطبخ استخدم

منتج علبته سوده اسم المنتج ( أكيد )

لي رجعه ان شاء الله اكتب المزيد

السلام عليكم ورحمة الله وبركاته،،،


الموضوع أكثر من راااائع أختي لوليتا..

راح أبدأ،،،


عدد أفراد الأسرة 3 =أنا وزوجي وبنتي (10 شهور) الله يحفظها يا رب

ما أشتغل لكني أدرس في الجامعة

البيت:3 غرف =غرفتي +غرفة الحريم (ماهي مفروشة وحاطة فيها كللل قرمبعي الغسيل والكوي وشنط السفر وغيره) +صالون الرجال
ومخزن (أنا خليت المخزن غرفة لبنتي)
وحمامين (الله يكرمكم) حمام حقي شوية كبير وفيه كللل أغراضي
وحمام للرجال صغييييير ياااادوب يكفي الكرسي العربي والمغسلة برا
ومطبخي كبير تقريبا 6×4



ما عندي شغالة

ليا تقريبا سنة ونص متزوجة

1-المهام اليوميه والاسبوعيه والشهريه:
أنا من ناحية أن ليا جدول أمشي عليه والله ما عندي
بس الفكرة مرة عاجبتني وأنا في طريقي اني اكتبلي جدول لأنو أكيييد راح بسهل عليا عملية تنظيف البيت مع دراستي
لأني بصراحة ملخخخخخخخخخخخخخخبطة وما عندي أي طريقة مقننة أمشي عليها
وعلى قد ما أشتغل ما أحس إني سويت شئ

المهم
أقوم من النوم قبل ما يجيني السواق يوديني الجامعة (سواق خاص لمشوار الجامعة وإذا احتجته لخارج الجامعة أديه أجرة المشوار) أقوم قبلها بساعة ونص أصلي وألبس وألبّس بنتي وأجهزلها فطورها وأخليها ترضع وأجهزلها أغراض الحضانة وأرتب شنطتي وأجهز نفسي
زوجي يقوم بعدي ويرجع الساعة 1 وينام عشان يقوم للدوام التاني الساعة 4 أو 4ونص
أروح الجامعة وأرجع الساعة 2 ونص أو 3 الظهر
لما أرجع يكون زوجي نايم أروح بسرعة أحط بنتي في السرير وأنام لي ساعة أو ساعة ونص
وأقوم على 4 أصحيه وأسويله قهوته وأودعه ويروح
أول ما يخرج زوجي أرتب شرشف السرير والبطانية ... إلخ وأشيل بقايا المناديل من عند سرير بنتي وأرتب الغرفة بصفة عامة
يعني ما أمسح ولا شئ بس ترتيب
أخرج للصالة أرتبها وأرجع كل شئ مكانه
وأروح للمطبخ برضوا أغسل المواعين حقت العشا وأرتبه
بدون غسيل أرضية ولا شئ

أكنس الصالة بالمكنسة الكهربائية عشان بنتي الله يهديها تخلي المناديل مفتف في كل مكان وكمان البسكوت لالالالالالازم أكنس يوميا
وأجيب مساحة الخيوط بالمطهر أنظف البيت كله الصالة والأسياب >>> ومدخل الرجال ناااادرا ما أنظفه

بسسسس
أطبخ عشا قبل لا زوجي يجي وأبخر البيت


غسيل الملابس: ما أغسل إلا إذا شفت أن زوجي ما بقيله إلا ثوب واحد في الدولاب
أو إذا لقيت سلة الغسيل ما تنقفل..

الكوي: أهم شئ عندي ثياب زوجي وثيابي طززززززز

يعني أغسل كم مرة وثيابي في السلة ماهي مكوية اذا احتجت شئ اخرجه من السلة وأكويه عشان ألبسه >>>>قمة الإهمال


عيوب شغلي في البيت...(للإستفادة للغير وتشجيعا لمعرفة عيوبي وأغيرها)
أحس اني من أقوم العصر لييييييييييين يجي زوجي الساعة 10 ونص وانا واقفة على رجل وأحس اني ما سويت شئ

جهة الرجال فيها سيب وحمام وصالون عااااادي بس مساند وموكيت ما في ولا شئ لا تلفزيون ولا تحف ولا لوحات في الجدر ولا شئ (زي المسجد خخخخخخخخ)
وفي من جهة الرجال مدخل تاني يودي عى الحوش والمدخل ناااادرا ما يدخله أحد وكله غباااااااااااااار
أنا سديت الباب بمنشفة وصرت أنظف من جوا بس
برا ما أمسحه أبدا لأنه ما صار أحد يدخل منه... كله تراااااب

وحمام الرجال زوجي يحب يستخدمه ويدخن في الصالون
عشان كدا أنا بس أمر على المغسلة مرور الكرام وأفضي الطفاية اللي في المجلس
بسسسسسس
واذا تعبت نفسي امسح السيب بممسحة الخيوط بعد ما أمرر عليه المكنسة الكهربائية

نفسي أسوي جدول عشان أخلي تنظيف جهة الرجال بذمة وشئ أساسي ولو مرة في الأسبوع أو حتى الأسبوعين


2- زاويه خبراتي ومنظفاتي ..

مااااا عندي بس أحب المطهرات للأرضية تكون بريحة الصنوبر روووووعة

وأغلب مطهراتي من المنتدى


3-زاوية تساؤلاتي ..
أبغى أعرف الشبابيك كل كم تتنظف؟؟؟
عشان أنا كل ما أهملها ألقاها كلللها ترااااب
أبغى أعرف متى أنظفها عشان ما تتملى غبار ....


طبعا بعد ما حقرأ ردودكم أكيييييييد راح أستفيد في وضع الجدول لتنظيف بيتي الصغنطوووووط


وتسلموووووو جميعا
وجعله الله في ميزان حسناتكم يااااارب

ويجعلنا من يفيد ويستفيد يااااارب
أمانة يا بنات أدعولي بالهداية


ست البنات

هذه عجانة وخفاقة الكيك مرة حلللللوة تنفع في رمضان كينوود ب900 ريال
وهذه صورتها


برادة الموية من دورا جهة بارد وجهة حاااار فاير

وهذه صورتها


ماكرويف كينوود
الصورة


بروان مالتي كويك
ما أستخدمها دايما
الصورة


وعندي خلاط كاسة مع المطحنتين من باناسونك
وفرامة الملوخية من مولينكس >>>استخدمها في فرم البصل والطماطم وغيره...

وآسفة ع الاطالة

موضوع رائع

جزاك الله خير

وان شاءالله استفيد منكم

موضوع متميز جدا جدا وان شاء الله راح اعرض لكم خبراتي عن قريب