الطريقة في هذا البسكوت يمكن غريبة شوي... و السر هو الزبدة!!!
-مثل ما قريت في كتاب الطبخ- إن أهل قبرص يذوبون الزبدة و يخلونها تحترق شوي، عشان تعطي نكهة قوية في حلوياتهم...
و هذي الطريقة نفسها سويتها الحين و الطعم شي خيال، والبسكوت هش جداً و يذوب بالفم من حلاته...
ما أطول عليكم... بسم الله نبدأ مع المقادير و الطريقة...
أول شي نحمي الفرن على حرارة 350 ْ
نجيب إصبع زبدة أو 100 غ، و نذوبها على نار هادية و نخليها تتحمر شوي، ونشوف في قاع المقلى الرواسب لما تتحمر...
بس ننتبه ما نخليها تحترق بس تتحمر شوي و تطلع ريحة الزبدة المميزة...
نصب الزبدة في زبدية و نخليها تبرد شوي، بعدين ندخلها الفريزر لحد ما تبرد و تصير جامدة مثل أول...بس بدون ما تثلج!!!
نخلطها بالخلاط لحد ما يصير لونها فاتح...
نضيف عليها بالتدريج:
3 ملاعق كبيرة سكر بودرة
صفار بيضة
4/3 كوب طحين
ملعقة صغيرة بيكنج باودر
شوية مسمار (قرنفل) صحيح
وهذا صورته
بعد ما تختلط المقادير مع بعض(ما عدا المسمار)، نعجنها باليد عشان تتماسك...
ناخذ مقدار ملعقة صغيرة من العجينة ونكورها ونصفها متباعده عن بعضها شوي في صينية فرن مدهونة بالزبدة...
بعدين نستخدم الإصبعين السبابة والإبهام و نضغط بإيدينا الثنتين على الكورة عشان نخلي فيهم حفر من أربع جهات و يكون شكله مثل الهرم... و نجيب حبوب المسمار و نغرسها في البسكوت من فوق، في قمة الهرم :)
ندخل الصينية الفرن لحد ما يتحمر البسكوت، تقريباً لمدة ربع ساعة... و نخليه يبرد في الصينية...
بعد ما يبرد نحطه في علبة بلاستيك و نرشه بالسكر البودرة، نغطيه تماماً بالسكر، ونسكر العلبة زين عشان ما يدخل الهوا...
هنا يجي السر الثاني: حلات البسكوت ينوكل ثاني يوم، و كل ما طول في العلبة كل ما صار طعمه أحلى عشان يتشبع بنكهة المسمار و تبين نكهة الزبدة...
و هذا شكله عند التقديم...
أتمنى انه يعجبكم...