ولدوني و انا بالثامن .. اقروا قصتي و ادعوا لبنتي

مرحبا بنات

انا كنت حامل و بنص الثامن تقريبا بس حركة البيبي حيل كانت ضعيفه فدكتورتي طلبت مني اني اسوي تخطيط

كل ما اسوي التخطيط يطلع مو طبيعي و دخلوني كم مرة المستشفى و كنت اطلع على مسؤوليتي لين يوم الاحد 10-2-2008 دكتورتي دخلتني المستشفى على اساس ان يدخلوني ولادة و يحطون لي طلق صناعي

تخيلوا معاي اللي صار
ركبوا لي التحميلة اول شي الساعه 2 و نص الظهر و بدا الطلق ... بعدين على الساعة 6 تقريبا فتحت الدكتورة الماي و ما تتخيلون اشكثر كانت كمية الماي حتى السستر انصعقت... بدون مبالغة 3 مرات غيرت الفرشه الي تحتي و ماكو فايدة ترد تنترس

بعدين على الساعه 9 فحصتني الدكتورة والا للحين 3 سم مع العلم اني كنت 2 سم اول ما دخلت عندهم و هني عرفت ان رحلة العذاب مستمرة الله لا يواريكم العوار والله اني لو بدعي على عدوتي ما دعيت عليها باللي شفته

و كانوا الدكاترة يحنون علي اني اخذ ابرة الظهر بس انا كنت ارفض لان الي عندهم كلهم دكاترة مو دكتورات و كلش ما حبيت الفكرة قلت اتحمل ميخالف

و استمر الطلق لحد يوم الاثنين الساعه 6 الصبح كنت 8 سم و احس اني بولد خلاص ناديت السستر و على الساعه 6 و ربع ولدت الحمدلله ...

وبعد الولادة زوجي قال لي انه نذر اذا الله قومني بالسلامة يسميها فاطمة الزهراء :)

بس للحين ما خلصنا
البيبي كانت ما تبجي حاولوا فيها و بعدين حطوها بالحضانه و على طول على العنايه المركزة

و كل يوم يقولون لنا كلام
سووا لها رنين مغناطيسي و تخطيط للمخ بس للحين ما رسوا على شي
البيبي للحين حركتها وااااايد ضعيفه و مركبين عليها جهاز التنفس و بايب ثاني يحطون لها فيه مغذي

مرة يقولون ان صار فيها نقص اكسجين خلال الحمل و هذا الي مأثر على المخ و انها ميته دماغيا

و مرة يقولون ان التقارير سليمة 100%

والله ما عرفنا لهم نفسيتي بالحضيض و قلبي على بنتي
ياربي لا تضيع تعبي فيها ولا تكتب عليها الشقا

ادعولها بنات الله يخليكم .. ادعولها انها تقوم بالسلامة

لا يجوز الدعاء والتوسل بغير الله وحده

الرجاء مراجعة القوانين

http://www.3roos.com/forums/t294940.html