نفاسي في بيتي بروحي .. ساعدوني معتمده على الله ثم عليكم

بقول لكم عن الاشياء اللي بسويها .. وبجهزها من اللحين ..

بأخذ كيس تمر وبذوب وياه زبدة وحب رشاد على نار خفيفة .. وببدأ اكوره ثم اغلفه بجوز الهند المبشور والسمسم واخليه في حافظة .. وكل وجبة اطلعه اكل منه .. وخصوصا الصبح مع كوب حليب مغلي ..
بعد عندي فكرة اني اخذ لي كريم كراميل ومهلبية وكستر .. واسويها للعصرية .. لانها سهلة وما تأخذ وقت .. وفيها حليب ..
بعد ممكن اسوي لي سمبوسة جبن والفها قبل الولادة وافرزنها في الفريزر ووقت النفاس بس الشغالة تقليها لي اكلها بين الوجبات او للعشاء ..
في شوربات كنور .. سريعة التحضير وطعمها حلو .. ما جربتها بس خالتي تمدحها تقول لذيذة .. لذلك فكرت اخذ لي كمية منها واعلم الشغالة تسويها ..
بعد الفواكه اخليها تقطعهم بكمية اشويه تكفيني ليومين ثلاثة مع العصير .. واتصير سلطة فواكه واخليها بحافظة ووقت اجوع اسكب لي منها ..
وفي الكيكة السريعة التحصير اللي بس تخلطي المكونات وتحطيها بالفرن مثل بيتي كروكر .. لذيذة وممكن تفيد لشاي العصرية ..
واما العشاء اجهز نفسي من الاكل المجمد من دجاج نيكتس وهمبرغر وبطاطا وكفته وفيليه ...بس ياريت اللي تعرف اسماء اطعمة مجمدة زينة تدلني عليها يعني مثل الخزان و التعاون الاسلامي وما ادري وشو ؟؟ ....واعلم الشغالة كيف تقليه عدل ....
وافكر اشتري طنجرة الطبخ بالبخار ما تأخذ وقت وسريعه في التحضير ..

وهذا غير العسل الطبيعي لابد اني اجهزه من اللحين عشان اكل لي ملعقة عسل عند كل وجبة او على الاقل مع اذوبها مع كوب الحليب او عالريق من الصبح ..
وبشتري لي شرابات وجواريب للرجل مع اني ما راح اولد بالبرد .؟.. بس يقولون احسن لابد ادفي نفسي عدل .. وما امشي حافية ..
وبأخذ كريم زبدة الكاكو من بالمرز يفيد للتشققات وكريم للحلمات ..
هذا غير زيت الزيتون الدافي لتدليك الجسم وللشعر وللشفايف يعني ما نستغنى عنه هو مع الفازلين ..

والتشطيف بالماء والملح لكن تنشيف المنطقة الحساسة داااااااااائما بالفوطة او الكلينكس الناعم .. وما نخليها تكون رطبة ابدا .. حتى الفوطة على طول نغيرها كل ساعه حتى لو ما فيها شئ .. وخاطري اجرب اسوي شاي بالزنجبيل ... بس ما اعرف اسويه ولا مرة في حياتي جربت اني اذوقه بس عرفت ان الزنجبيل مفيد للنفاس ونفسي اجربه ..

بعد قالو لي الحلبة زينة وحبة البركة والمرة مفيدة كلها للنفاس بس كيف استخدمها وكيف اسويها ؟؟

وياريت بنات ما تنسون تخبروني عن الاطعمه الجاهزة المجمدة احسن شئ اشتريه .. يعني عطوني اسماء اطعمه جاهزة جربتوها وفادتكم ؟
يالله بنات هذا اللي عندي وهذا اللي اعرفه كله خليته لكم ابغيكم تساعدوني بنصايحكم .. او بالدعاء لي ..

جزاكم الله خيرا وكتبه في ميزان حسناتكم .. ليوم الدين ..

نصيحة حاولى وفت النفاس تبتعدين عن الدهون والوجبات السريعة والحلويات يعني اشياء مسلوقة وخضار افضل لك وربي يسهل عليك

جيبي لك شغااله تككون مشتغله من قبل عند نااس وعاارفه الطبخ وتكوني واثقه منهاا .

انتي من اللحين سووي سمبووسه وبيتزا و كروسوون وحطي في الفريزر سووي كميااات وجيبي لك كم كيلو

بقلاووه وكم كيلوو بيتي فوور وحطي في حاافظاات عشاااان الضيوووف

ترة الوجباات السريعه مرره ماافيه فووائد غذائيه ...

الله يسااعدك ان شاء الله

ياحبيبتي ريحي روحك
أنا بعد نفاسي بقضيه في بيتي
مع زوجي واولادي عشان المدرسه
وفكرت انا وزوجي ان نتعامل مع مطعم او هو يطلع كل يوم ويجيب لنا منه
فيه ببعض المطاعم اكلات شعبيه مثل المرقوق والجريش والمثلوثه
وبعد خبز الخباز حلواذا جاك مسمسم حلووو مرررره وفيه خبز الجباتي الهندي مررره حلو
انتي عنك شغاله انا ماعندي لكن بجيب كل أربعاء شغاله ليوم واحد فقط حتى تكنس وتنظف
وتغسل الملابس وتكويهم
وعشان ثياب المدرسه بعد تغسلهم وتكويهم
انتي علمي شغالتك كيف تصلح ايدامات باللحم واللوبيا الحمراء هذا اهم شئ
وشوفي الصاج مدري وش تسمون انتم لكن حنا نسميه صاج ع كهرب وفيه دوائر لعمل القرصان
اذا عندك واذا ماعندك اشري قيمته حلوه ورخيص مو غالي وعلمي شغالتك كيف تصلح لك قرصان
وكيف تعجن العجينه وتصبه ع الصاج وتقلبه اذا استوى من تحت
وانتي عاد ضيفي له دبس او عسل مع شوي حلبه والحبه السوداء وشوي مردود
اذا تعرفينه واذا ماتعرفينه اسألي العطار عنه وهو يجيبه لك اطحنيه وحطي مع الأكل على شوي
وعلى فكره انا افكر اجهز الدويات الشعبيه في هالأسبوعين ابشريهم كلهم واطحنهم كل نوع بعلبه
وبعدها بخلط اللي يخلط
واطحني كمون لوحده وحطيه في علبه وكل بين وقت ووقت بتشربين شاهي او حليب
حطي شوي من الكمون اللي طحنتي

وفيه دواء للشمم كان تبيني اقولك طريقته حلوووو مره يريح الخياطه ويلينها
الدواء هذا عباره عن (( زيت زيتون + مره + خواجوا )) احطهم في قدر صغير واحطهم ع النار شوي
وبس يتطبخ شوي اطفي عنه واتركه لمن يصير دافئ اصفيه في علبه واقسم منه شوي
في علبه صغيره هذا تاخذين بصبعك شوي وتحطين ع خشمك وتشميه وع خشم الطفل
هذا عن الشمم واللي بالعلبه الثانيه الله يكرمكم كلكم في دورة المياه حتى تحطي ع الخياطه
او تدهني الفوطه ((اللألويز او لوتس او اي نوع )) صدقوني تريح الخياطه انا سويتها كذا مره
وارتاح لمن احطها

وهذا نظام اسمه نظام العامريه اللي باللون الأحمرقريته في احد المنتديات واعجبني قلت خلوني اجربه
شكله حلو وبجربه ان شاءالله
في نفاسي هذا

**جدول النفاس المبسط والنتائج باهره**
بسم الله الرحمن الرحيم
وبه وحده استعين..

تنويه:
راح تستغربون عدم وجود اشياء كثيره
تعودنا عليها كعادات متوارثه من الجدات والمهات..
لالهوم ولابخور ولاغيره..
هذا جدولي الخاص اللي استخدمه ولولا اني اطمع بدعواتكم
الطيبه ..واطمع اني اكون قدمت فائده وتيسير لأخواتي المسلمات
كان والله ماطلع من خزانة اسراري لأي مخلوق..
والله ولي التوفيق والله وحده اسأل ان يجعله في موازين اعمالي الصالحه
يوم لاينفع مال ولابنون..
***
((جدول النفاس))
المواد المطلوبه:
مطحونه____ كامله
1- المطحونه:
حلب -- ماش -- قشر رمان --فلفل اسود
2- الكامله:
رشاد -- قرفه -- كمون -- ورق زعتر -- حبه سوداء--
3- عسل -- تمر -- زنجبيل مبشور
***
بعض التفاصيل المهمه للإعداد:

1- المواد المطحونه
يجب الحرص على شرائها جديده وكامله ثم تنقى وتغسل وتجفف ثم تطحن بعد تجفيفها ثم تحفظ في علب بلاستك محكمة الاغلاق وتكتب عليها اسماء
محتوياتها..
نعم بتتعبين لكن ثمرة هالتعب تستاهل وبتعجبكم بإذن الله..
***
2-المواد الكامله
نحرص على تنقيتها وغسلها وتعريضها للهواء لتجف.
***
3-العسل
لاتشتري الغالي على اعتبار انه الاصلي وفي الغالب للأسف يغشون بغذاء النحله لتنتج لهم بوفره بغض النظر عن جودة الانتاج..
وانا اشتري من مده العسل الالماني langnese
لانه ثبت بشهادة مربي نحل خبير انه الاصلي..

4- التمر
ممكن استخدامه معجون او عدل كله مفيد بس لقيت المعجون
اطعم واشهىللأكل بس اذا كنتي بتلقين شي نظيف ومن ثقه..

5-الحبه السوداء
تخلط سبع حبات مع العسل وتؤكل كل يوم ملعقه
على الريق من يوم الولاده الى 30 يوم..

6-المره
تجهزين علبة مويه صغيره فيها محلول مره تشربين منه وانتي
في طريقك للمستشفى للولاده..واذا ولدتي تشربين منه علشان ريحة
العطور ممكن تسكر الرجم وتتعسر الولاده لاسمح الله والسبب هو الشمم..
وخلي معاك كسره صغيره حلتيته شميها اذا وصلتي المستشفى وادهني خشمك منها
لأنها تساعد بإذن الله في فتح الرحم بسرعه ويسر..
والله الموفق.
***
المشروبات اليوميه في فترة النفاس:
1- الصباح حليب مغلي محلى بعسل ومعاه فلفل اسود < مع الفطور
2-شاي زنجبيل + قرفه < بعد الغداء او بين الوجبتين
3- شاي الزعتر في الليل قبل النوم
4- الرمان المطحون المضاف للعصير او المعمول كشاي تستخدمينه
بعد ماتنشفين من الدم لحد ماتطلعين..
5-قهوه وقت المغرب معها مره كل ثلاث ايام تستخدمين المره واذا كنتي تاخذين
مضاد حيوي ماتستخدمين المره ابدا لأنها تبطل مفعول المضاد..

الوجبات:

1- الفطور: عندي خيارين بالنسبه لي هما:
* سندويشة بيض مقلي مرشوش عليها ملعقه كبيره حلبه مطحونه +فلفل اسود
**خبزه بالمقلاة عباره عن(بر+حلبه+حليب بودره+ملح+سكر+بصله)
تعجن بماء وتدهن بعد ماتجهز بعسل وتؤكل بالعافيه.
***تمر + حليب اللي سبق شرحه.
[glow=339933]مهم[/glow]
آخر عشر ايام من النفاس راح يكون الفطور تمرمقلب بزبده على نار خفيفه
معاه رشاد..
تشربين معاه قهوه او حليب اللي يعجبك..

2- الغداء:
*مرقة لحم مع خضار
**مطازيز
***شوربة كويكر مع قطع لحمه
لما تغرفي الغدا لأكله ضعي عليه ملعقتين ماش مطحون انثريه فوقه
وكليه بالعافيه مع الحرص على اضافة الفلفل الاسود كذلك..

3- العشاء:
1-تمر+حليب
2-اي فاكهه تشتهينها
3-سلطه خضراء او تبوله
4-ممكن وجبة اسماك من اي نوع
تحبينه ..

النظافه الشخصيه:
*الهدوء في الحركه اول اسبوع مهم جدا والحرص على عدم رش
منطقة الخياط بالرشاش..بل رشها باليد من بعيد حتى تسقط الخيوط..
**عدم استخدام المره بتاتا كغسول حتى تسقط الخيوط لأنه يشدها ..
بل تمسح بمحلوله الفوطه كل ماحسيتي بحكه..
***التشطف بماء وملح يوميا بدون المبالغه بكمية الملح .
هذا ماعندي باختصار وبدون تعقيد وعند الالتزام به سترون فائده عظيمه
بإذن الله تعالى..وان شاءالله اكون افدتك بشئ واذا عنك اي سؤال عن اللي انا كتبتهم لك اسألي ياقلبي وان شاءالله
افيدك مع ان انا يجهلني مثلكم بعض الأشياء بس تقريباً تعلمت من امي لمن اكون عندها
وش تسوي لي
وهيك شغلات

ماشاء الله تبارك الله (y)اخت ريمه 2007 كفيتى ووفيتى من جد ماقرتى الله يوفقك انا نفس حالتك بنفس في بيتى ونسيت بولادتى بولدى كيف البرنامج حتى ولدى تقريبا نفس عمر ولدك يعطيك الف عافيه من جد بحط هالموضوع في المفضله عندى عشان يصير مرجع لى ان شاء الله اذا ولدت بالسلامه
اختى صاحبه الموضوع خذي برنامج ريمه ونصيحه لك حبيبتى ابتعدى عن المقليات والمجمدات لانه ماتصلح لنفاس(n)

والله شجعتيني انزل موضوع فيه
لأن ممكن بعض الأخوات مايدخلون الموضوع هذا بروح انزل الموضوع
ومشكوره ياقلبي rasseess
ع تعليقك الحلوووووووووووووووو
والنظام هذا انا لسا ماجربته لكن بحاول اجربه ان شاءالله احس انه حلووو
ومفيد

مشكورة اختي ريمة و باقي البنات .. ما قصرتو بصراحه ..

اختي ريمه ..
هذا نظام العامرية معرووووف .. وان شاء الله ناوية اجربه للنفاس ..

لان امس سهرانه طول الليل ابحث في هذا الموضوع لقيته ..
ويا محاسن الصدف طلعتي انتي بعد كاتبته لي في هذا الموضوع ..


ان شاء الله اجربه .. لان يمدحونه كثير ..

وراح اضيف لكم اشويه اشياء مو مذكورة عند الاخت ريمه ..

معلومات اضافية من نظام العامرية :

طريقة شاي الزنجبيل :
4 اكواب مويه
3 ملاعق كبيره زنجبيلمبشور
عودين اوثلاثه كبار قرفه..واذا كان مطحون تكفي ملعقه ..
بعد ماتغليالمويه نحط الزنجبيل والقرفه ونخليها تغلي خمس دقايق بس..
ونطفي عنه وممكنتضيفين له سكر حسب الرغبه..


***
طريقة شاي الزعترالورق:
ملعقة زعتر ورق
مع 4 اكواب مويه
بعد مايغلي الماء نصبه على الزعتر الورق بدون طبخ..
نخليه يخمر عشر دقايق..
نضيف له سكر حسب الرغبه


خبزةالبر:
هذي مقادير خبزه وحده بمقلاة كبيره
نصف كاس دقيقبر
ربع كاس مويه
بيضه
ملعقتين كبار حليب بودره
ملعقتين كبارحلب
بصله صغيره << ممكن الاستغناء عنها
رشة ملح
رشة سكر للرغبه ولامستغنين عنه بالعسل..
اللي راح نصبه على الخبزه عند اكلها..
ممكن تخلطين كلهالمقادير بسلطانيه ويكون البصل قطع وممكن انك تحطيها بالخلاط وتخلطيها..
ثميكون المقلاة مذوب فيها زبده او سمنه للفائده.. تصبين الخبزه فيها وتخلينها علىنار هاديه مدة 5-7 دقائق
وتقلبيها وكذلك الجنب الثاني..على الاقل خمس دقايقعلى نار هاديه..
وبعدين تحطينها بصحن ولما تبرد شوي تصبين عليها ملعقة اوملعقتين عسل حسب الرغبه وتاكليها بالعافيه
مع حليب مضاف له فلفل اسود..


ويا رب تستفيدو منها ...

هلا اختي الغاليه
انصحج بالابتعاد عن الدهون و الحلويات
انتي محتاجه الاكل الطازج في النفاس، و الشوربه انصحج تسوين لج شوربة خظار طازجه و تكون ألذ من المعلب

شكلج يوعانه من الحين لووول (( خلج على الخضار و الفاكهه و الاشياء الطازجه عشان تضعفين)) و يشوف فيج زوجك عروس من يديد

و تمنياتي لج بولاده سهله و الله ييسر عليج

B.1

هلا فيج اختي ..

لا بس اتعرفين انا نحييييييييييفه وابي شئ يمتني ويخلي جسمي يزيد وزنه ...

عشان جذي افكر في اشياء ممكن تسمني ؟؟ واكون احبها ؟؟ لاني ما عندي شهية للاكل بتاتا ..

وحتى وزني اللحين وانا حامل ما زاد شئ ؟؟ شئ غير طبيعي فيني ؟؟ على طول وزني معلق في الاربعينات ؟نفسي ومنى عيني يصير في الخمسينات

-



اختي اكل النفاس يعتمد على
البر00يعني

المرقوق 0او0المطازيز 0او0مرقة لحم 000هذا غداك في العصريه او المغرب

الفطور طبعا00مصابيب 00اللي هي مرااصيع بر 00وبيض مسلوق00 وطحينيه0 وحليب ساخن بالزنجبيل

العشاء كاس حليب بالحلبه وسندويش بر مفرود جبن سايل مع طحينيه لادرار الحليب

واهم شي على الريق اللهوووم 00مع 00كاس زنجبيل تبلعين عليه الهوووم

ويختلف اللهوم فيه شي اول النفاس

وفيه شي آخره000اللهوم اللي في الاخير ماافيه حلبه

والقعده كل يوم في طشت حاار فيه غسوول (الرطا) اللي تغلينه وبعدين يبرد شووي تقعدين فييه(هذا يضوق الحرمه)

واختي

ترا الوجبات السريعه والحلى والمعجنات 00تخرب الحرمه من تحت تصير واسعه وبرابييس ومارااح تعجبين زووجك

والخربطه بين الوجباتت والحوامض ممنوووعه والمشروبات الغاازيه والبطيخ والجرو ابتعدي عنهم بتاتا

ووقد اعذر من انذررر

والله يسااعدك ويتمم عليييك

ولاااحقه على زيادة الووزن بعد النفااس00 بس يكفيك الحلبه والمروقوق وكل اللي ذكرت لأن داخل فيهااا الحلبه ضرووري في كل شي

تفي بغرض السمنه بالمرره


-

ما قريت الموضوع لأنو طويل .. لكن اللي أعرفه انو التلبينة مفيدة جدا للحامل في اسابيعها الاخيرة ولأيام النفاس وطريقة عملها سهلة جدا وما تاخذ وقت و مغذية أكثر مما تتصوري اشتري لك 1 او 2 كيلو طحين شعير واحفظيه في الثلاجة عشان ما يخرب

نصيحة ثانية لا تحدثي اي تغيير جذري في أكلك لأنو بيضر البيبي ..

أختي أنا رايي من راي الأخوات إبتعدي عن الحلويات والدهون..
وإذا كان وزنج بالأربعينات هذا يمكن إنتي قصيرة .. وعظامج خفيفة .. طبيعي حبيبتي ..
لا تحاتين خليج رشيقة..
وإخذي بنصيحة الأخت ريم..
واضيف عليها شوربة العدس مع اللحم..او الخضرة..
وعلمي الخدامة الأكلات الخليجية مثل الهريس والفريد والمجابيس .. وها الأكلات الطيبة..بالإضافة لأنواع الكيك والحلويات..للضيوف او ممكن تشتري جاهز بقلاوة وكذا..
وبالسلامة إن شاء الله..

الخوات جزاهم الله الف خير قالو كل شي بس أحب أضيف جيبي حنيني جاهز اسهلك يكون وقت ماتحسين بجوع في نص الليل او اي وقت ......:21_162:

عزيزتي 000

اذا على اللهومات والاعشاب اعرف لك حرمه ثقة

عندها نظام كامل للنفاس

دقي عليها وقولي لها من طرف ام فارس

0531100641

اختي ابتعدي عن الاشياء اللي قلتيها كلها لانهاماتفيدك ونتيجتها عكسيه فيه بالمنتدى نظام فيافي ناقلته واحده من الاخوات اخذيه وطبقيه لان كثير يمدحونه والاكل المفيد هو لحم وصالونه وخضار مثل بطاطس جزر وحليب وبيض ولاتكثرين من الفواكه ابد

مواضيعكم رهيبة

ماشاء الله البنات ما قصرت
و ربي يرزقك بخدامه صالحه و طيبه
و اي خدمه وقت النفاس دشي النت و اكتبيها و بتلاقين الحل المناسب باذن الله

مشكورين اخواتي انا بصراحه نفاسي الاولي كان ببيت زوجي بس عند بيت عمي تحت بيت اهل زوجي و عمتي هي اللي كانت تنام وياي و ترعاني و ترعى ولدي لما يقوم بالليل يصيح تسكته و اذا ما رضى ينام تقومني له و كانت تسوي لي الصبح عصيد و حليب و غيره من الاكلات اللي تقوي الجسم و الصحه و تسوي لي خلطات اعشاب و ادويه عشان اتقوى و الحيج و الحلوه و المرقدوش و غيره من الأعشاب الطبيه و الحمد لله بحملي الثاني محتاره اخذ نفاسي ببيت ابوي او ببيت اهل زوجي ما ادري..


تحياتي
أم محمود