قولولي وين الغلط .. وشو الصح .. بليييز..؟؟؟

حبيبتي يمكن عليه ضغوطات استحمليه انا بشوف ان المشكلة لانك في بيت اهله يمكن لو انتو ببيت وحدكم يصير افضل بس انتي حاولي تقتربي منه وشوفي ايش فيه شو فيه معصب ليه وربنا يعينك ويوفقك للصح إن شاءلله

لي عودة باذن الله

حاولي تهدين اعصابك بقراءة القران

وقراءة الاذكار

وحاولي تعملي جلسة مصارحة بعيد عن عن دوشة الاطفال مع زوجك وتكنين له الي بصدرك

انتوا عشتوا قصة حب وهالحب مااعتقد ضاع عشان الزواج والعيال

بالعادة الرجال دايما يهرب من مسؤوليته ومن المشاكل الي حوله

لاتفرغين حرة قلبك بااطفالك

لانك بتخلقي لنفسك مشكلة جديدة

تعقدينهم تكرهيم فيك


حاولي تضبطي اعصابك وقت ماتكوني مع اهله

وتبتعدي شوي عنهم

ولاتدققي على المعاملة بينك وبينهم

لانك رح تتعبي

حبيبتي الله يكون بعونج

حاولي تقعدين مع زوجج و تصارحينه

و تقوليله ليش متغير علي و سمعي منه يمكن متضايق من شي او بقلبه شي

و حاولي تغيرين من روتين حياتج يعني سويله بين فتره و فتره قعده رومانسيه و هالسوالف

و عيالج مالهم ذنب ان تضربينهم حرام عليج هم اطفال و اكثري اختي من الدعاء و قراءة القران

و ان شاء الله تفرج

انوار الحب;5197758:
حبيبتي الله يكون بعونج

حاولي تقعدين مع زوجج و تصارحينه

و تقوليله ليش متغير علي و سمعي منه يمكن متضايق من شي او بقلبه شي

و حاولي تغيرين من روتين حياتج يعني سويله بين فتره و فتره قعده رومانسيه و هالسوالف

و عيالج مالهم ذنب ان تضربينهم حرام عليج هم اطفال و اكثري اختي من الدعاء و قراءة القران

و ان شاء الله تفرج

صح لسانج اختي انوار الحب

الله يصلح حالكم ان شا الله

حبيبتي انا من رايي انك تودين اطفالك ليلة عند اهلك

و تسوين جو رومانسي و تتناقشون

لان يمكن ما قالوا البنات زوجك عنده ظروف نفسية خلته يتغير

الله يوفق الجميع

الله يكون في عونك يا bj3a
شوفي يا اختي كل اللي انتي فيه من مشاكل بسبب معامله اهل زوجك لاولادك وتفضيلهم لبنتهم
انتي حلي المشكله الاصليه وان شاءالله راح تنحل باقي المشاكل
حاولي قد ما تقدرين تبعدين اولادك عن بنتهم يعني اطلعي معاهم روحي معهم زيارة لبيت اهلك او لعبيهم برى البيت او تسوقي معاهم بس لا تخلينهم مع البنت لان كل ما يكونون مع بعض تصير المشاكل وتسمعين منهم كلام يسم البدن والا يبينون حبهم لبنتهم وكرهم لاولادك وانتي مالك غير تطلعين حرتك في اولادك وتضربينهم مساكين وتتعب حالتك النفسيه ...
ولو تطلعون في بيت بروحكم يكون احسن ...
الظاهر ان زوجك مل من كثر المشاكل ,, يمكن يروح الشغل ويرجع تعبان يبي يرتاح,, ويشوفك دايماً متكدره ومتضايقه ,, وطبعا هذا الشي غصبا عنك , من جدي تغير عليك وصار جاف معك , بس بعد لازم يتحمل شوي من مسؤولية الاولاد ويمسكهم عنك لما تكونين مشغوله انتي قعدي معاه وتناقشوا بهدوء وان شاءالله يرجع لك مثل قبل و أحسن

وأتمنى من البنات الباقي والي عندهم خبرات يساعدونج

الله يعينج يا بجعة ..

بس خليني بقولج شي ... انا مرة من المرات مريت باللي انتي تمرين فيه الحين .. واحياناً يكون موجود حتى في هالأوقات يعني مش منقطع نهائي .. وفي الأغلب موجود في كل بيت .. الي هو برود الزوج وعصبيته وخلقه الضيق ..

الي قدرت استنتجه من ريلي .. (من ناحية العصبيه انه يترك البيت ويقول ماحب هالحركات) .. تكون في ضغوطات او مشاكل من صوب اهله .. ما يعرف يفرغ عصبيته وين .. او حتى كيف .. فلما ايي انا واعصب او ازعل .. يعصب علي زياده بدال ما يهديني .. تدرين ليش ؟ ؟

انا او انتي ترانا زوجات .. يعني يقدرون يهاوشونا.. يعصبون علينا.. يطنشونا.. اي شي بيسونه ويانا .. لكن الضغط من صوب الاهل .. لو الام او الأب شو يقدر يقولهم ؟؟ ولا شي يحط بقلبه ويسكت .. فما يكونون ناقصين اي ضغط ثاني ... حتى لو نحن مالنا ذنب ..

فانتي ريلج متضايق اكيد من حركات امه .. بس ما يقولج عشان ما يولعج زود ومايحب يغلط امه دوم حتى لو غلطها مرة او 10.. خلاص بيسكت .. او يشوف تصرفاتهم الغلط وبس ما يعلق ويتم ضاغط على عمره .. لأنه الاحساس الي فيه الحين .. انه المشاكل ما ياته اللا من تزوج او صار عنده عيال ..

صدقيني الازواج مهما كانوا زينين ترا اتيهم فتره من تزعل الحرمة يهدونها ويطلعون .. ويحسون انه زعلها دلع حتى لو يستاهل الموضوع .. بالذات لو كانت كثيرة الزعل..

فتأكدي انه ريلج الي فيه ضغط من جهه ثانية .. سواء اهله او ربعه او دوامه .. فما يتحمل انه انتي تزعلين فيطلع الي يباه فيج من طناش او غيره.. ويزيد الزعل .. وصدقيني انه ريلج فيه شي خارجي يمكن ما تعرفينه او ما تلاحظينه ..

والعيال .. بعد اقولج عادي .. نفس ما يكون الريال يهتم بعياله فترات معينة .. يعني تلاقينهم مرات يسبحون عيالهم..يأكلونهم.. يرقدونهم .. اتيهم فترات يطفرون منهم ويقولون هذي مش شغلتنا.. شوفي حد غيري يساعدج فيهم..

انتي من الضعوطات النفسية الي فيج بحاجة انه ريلج يكون سند لج ويعينج .. لكن في الواقع شكله هو بعد مضغوط وتعبان مب عارف يوفق بينج وبين امه .. من ناحية يرضي منو او يترك منو .. او حتى كيف يوصل لحل يريح الطرفين .. يمكن هو ما يصرح عن هالشي بس هو في داخله ويفكر فيه بروحه لين يوصل لقرار معين ..

بهدوء وحب جربي قولي له انا احسك تعبان ومتضايج .. وانا بديت اتضايج مثلك .. فأحسن اني اريح عند اهلي يومين .. ومنها اوفر لك جو الراحه من العيال والحشرة .. وصدقيني لو رحتي يومين .. بيفكر انه بيته بدا يتأثر من نفسيته فممكن يحاول يعدل من مزاجه

والله يوفقكم ان شالله

مشكورين والله كلامكم يمكن هداني شوي ..

بس بقولكم اليوم العصر ياني وكلمني قالي شو موضوعج قتله انا ما عندي شي انا الي اباك تعرفه اني اخترتك انت من بين كل الرياييل وتحديت الكل عشانك اهلي اخواني وربيعاتي فالنهاية تتصرف وياي وتحسسني باني ولا شي ..

قالي انتي الين الحين فالعين وعلى الراس بس قوليلي انتي شو تبيني اسوي وانا برضيج قتله اباك ترد مثل قبل تخاف علي وعلى مشاعري انت وايد تغيرت .. قالي انامثل ما انا لا شكلي تغير ولا معاملتي تغيرت ..

قلتله اوكي انا من اليوم وساير بمشي على نفس الخط وياكم سويتوا الغلط بايدكم فيه سويتوا الصح هم بعد بايدكم فيه .. قالي اباج انتي الاولانيه الي كلمتج تمشي .. قلتله انا ما تغيرت مثل ما انت ما تغيرت .. المهم

طلعني شوي وغداني لاني ما كنت متغديه .. وشرا حق اليهال مريحانه وزحليقه ونقازيه وشوية العاب ورجعنا

الحين بقولكم شو هي المشكله الاساسيه ..

المشكله من البداية الين النهاية هي البنت ..

كلهم حاطين في بالهم اني اكرهها مع اني كل ما شريت شي حق عيالي اسوي حسابها واخذلها لكن هم ان شروا شي حق البنت ما سوو حساب حق عيالي .. كل هذا لانهم طلبوا مني ارضعها يوم كانت صغيره وانا رفضت ..

ثاني شي ان صار شي ولا تهاوشوا على شي يقولون هاي يتيمه حرام .. يعني لازم عيالي يتيتمون عشان يعاملونهم هاي المعاملة .. للعلم ان البنت امها وابوها موجودين ويابوها الين باب بيتنا لانها بنت زواج عرفي او بنت غير شرعيه الله اعلم بس المهم هي بنت من دون زواج اشهار ..

حتى يوم يلعبون اذا البنت بدت فالضرب شي طبيعي اي ياهل بيدافع عن نفسه وخاصتا اذا كان ولد وردلها الضربه يعصبون على حمود .. انزين يعني هي يعورها وهو ما يعورة بغض النظر عن نها يتيمه على قولتهم .. تراها ماخذه الحب والحنان والاولي والتالي ..

ويت فترات صارت بينا ضرابه وطولت لسان وعمتي طردتنا من البيت عشان البنت ...

يا جماعه ان احس ان هاي العايله فيها غموض .. الابو ماخذ سوريه على عمتي من 10 سنوات تقريبا وعنده بنت وولد .. والعلقه بينهم مشتته شوي يعني عمي عايش ويانا وما يقصر ويا عمتي بس عمتي صابره عليه ومستحملتنه عشان يصرف عليها بسس ...طبعا هو في غرفه وهي في غرفه .. للعلم ان البنت الي عمتي تربيها تشبه عمي فترة كانوا شاكين انها بنته ولا في ريال يعامل بنت الناس كانها زجاج وبتنكسر ما يرضى عليها حتى لو سوت الغلط يقول لا تعصبون عليها ولا تضربونها .. اما عيالي ان قالوا كلمة فتن عليهم وعق قلبهم ..

حتى النوم والله ما نقدر ننام البنت تزاعج الين الساعه 3 الفجر وكذا مرة قلنا حق عمتي صوتها عالي واليهال يقومون تسكتها نفس الوقت وثاني يوم تخليها على راحتها تزاعج ..

يعني شو نسوي اقترحت على زوجي نعيش في شقه قالي ما اقدر الشقه مش امان وخاصتا ان هو يداوم شفتات .. يعني ما بيخلينا نبات بروحنا ..

اخخخخخخخخخخ نفسيتي صايره زفت زفت دايما اقول يمكن انا الغلط وهم الصح لكن يوم اراجع الامور اشوف لالالالا انا الصح .. هم الي يبوني اكون لهم غبيه واتبعهم فالغلط والصح ..

والله انا مادري وش اقول
بس الاخت عيون ابوظبي ماقصرت كفت ووفت حتى انا تأثرت بكلامها
وانا اذكر انج كتبتي قبل عن البنت او يمكن وحده ثانيه كتبت الموضوع بس القصه مشابهه
والله يكون بعونج حبيبتي

حرام عليج عيالج مالهم خص
ردي لربج وانشالله ترتاحين

مرحبا بجعه...

قريت مشكلتج وماحبيت اطلع من غير ما ارد ..ومادري اذا ردي بيريج ولا بيضايجج لان نحن يوم نكتب مشاكلنا في هالركن او حتى نتكلم فيها مع حد نبغيه يكون في صفنا و نكون نحن الصح والطرف الثاني غلط...

اولا..ثقي 1000% انه مافي اي ام في الدنيا تبدي اي طفل على عيال ولدها..يقولون مافي اغلى من الولد الا ولد الولد...ام ريلج تمووووت فيهم بس انتي اللي متحسسه من البنت...هاذي طفله يا بجعه ومالها ذنب في اي شي في هاذي الدنيا ولا تفهم شي...مادري ليش انتي كارهتنها لهالدرجه...بدال ما تكسر خاطرج انها طفله اهلها تخلو عنها و تحاولين تكسبين فيها اجر عند رب العالمين مسويتنها عدوه لج و لعيالج...واكيد هاذا اللي مضايج ام ريلج و اهله...تراهم اكيد ما يبون يحسون ان مرت ولدهم شريره...لين الحين ابا افهم السبب اللي ما رضعتيها عشانه...شو يعني لو كانت بنت زواج عرفي او غير شرعي او غيره!!! اللي غلط بيتحاسب من رب العالمين ..وهي ما بتتعاقب لان مالها اي ذنب
وبالنسبه للضرب وغيره ليش تكبرون المواضيع و تسوون ضرايب عليها!!!؟؟؟ هذي ضرابه اطفال وحتى الاخوان يضاربون...هم لو حسوا انج ما تتحسسين من هالشي و تقولين لهم شو نسوي هذيل يهال اكيد ما كانوا بيكبرون السالفه ...يعني عيال اخوانج او خواتج يوم يضاربون ولدج تزعلين بعد؟؟

نيي لريلج المسكين اللي مثل ما قلتي تغير عليج و يعاملج بجفاف...انتي تقولين انه عشره 9 سنين يعني المفروض انج تعرفينه اكثر منا كلنا...ريلج حاس بالضغط من صوبج ومن صوب اهله..مب عارف يرضي منو...يحبج و يحبهم و ما يبا يزعل حد..وفي نفس الوقت هالضغط معكر له مزاجه و مضايجنه وطبيعي انتي اللي هي اقرب الناس له بتحس بهال تغير من ناحيته لان باله مب صافي...وصدقيني مافي اي ريال في هالدنيا لو كان يموووووووووووت في حرمته بيرضى انها تضارب امه او حتى ترد عليها رد مب حلو....وانتي تقولين تضاربون ضرايب عوده..فكيف تبين ريلج يكون هو نفسه الاولي!!!!!
الحل كله بيادج انتي...غيري من نفسج (ما يغير الله بقوم حتى يغيروا ما بأنفسهم) صفي قلبج من ناحيه هالطفله ..لا تقولين انج مصفيه قلبج..انتي حاطه دوبج من دوبها و كارهتنها و مسويتنها سبب تعاستج في الدنيا!!! فكري فيها..معقوله طفله اكبر عن ولدج بكم شهر تسبب تعاستج...؟؟؟ لا تقولين اييب هدايا ومادري شو..لا كوني بس رحيمه عليها ..عامليها مثل عيالج و ابدا لا تقللين من شأنها حتى لو بينج و بين نفسج و تقولين هاي طفله غير شرعيه ومادر شو...يوم بيلعبون وياها عيالج وبيضاربون كوني حنونه عليها و قولي هاذا طبيعي بين اليهال..وبعدين يا بجعه انتي يامااشتكيتي ان ولج يضرب كل حد...اكيد البنت شبعانه منه ضرب بعد يعني مب بس هيه اللي تضربه...ومسيرهم بيكبرون و بيعقلون...
وعاملي ام ريلج عدل...تراج بتكونين في يوم من الايام مثلها وولدج بييب حرمته..ترضينها تعلي صوتها عليج؟؟؟ عامليها مثل امج و استحمليها و جوفي كيف بتكون وياج وويا عيالج و جوفي كيف ريلج بيحطج عراسه من فوق..

واذكري قبل اي شي...كل هذا بتحصلين عليه اجر وثواب عند رب العالمين...

ان شالله تنحل سالفتج و ترتاحين..واسمحيلي عالاطاله والصراحه...واتمنى ما اقول شي زعلج

طمنينا عليج

انا وايد اضايقت مادري شنو اقولج بس ياريت ماتضايقين من كلامي
الريال مهما يكون يحب مرته عنده كل شي يتعوض الا اهله ولا تخسرين ريلج وعيالج عشان المعامله دربالج عليهم ولاتشكين وايد دام اهو جذي اهتمي بروحج غيري من نفسج واستايلج وتعاملج مع الكل للاحسن واذا على اليهال لعبي معاهم اذا كان موجود لاتسبحين تسبحي وقت مايكونون نايمين خل الباب مفتوح عشان تسمعين صوتهم اذا اقعدوا وتسبحي على السريع صبري يالغالية ان الله مع الصابرين ودايما ادعي لربج ان مسني الضر وانت ارحم الراحمين ( فاستجبنا له وكشفنا مابه من ضر )

السلام عليكم ... الغاليه الحل انكم تطلعون وامنو قال الشقق مب امان ؟؟ الحينه في سكيورتي واغلب العمارات سكانها عوايل ... الشي الثاني قوليله اليوم اللي بتبات فيه فالدوام ببات بيت اهلي وعقب يوم بتتعودين على العمارة بيصير عادي ..او قوليله وحده من خواتي والا اخواني بيبات عندي اذا عندج حد ... او الخدامه ...وبعدين ترا انتي بتقولين يهال بيكبرون وينسون لا ماينسون ... انا اعرف وحده جذه عاشت في بيت في بنت مدلعه تخيلي يوم كبرو اشوي قامو اذا سوت شي يقولون كلهم سوو عشان الكل ينضرب مع انهم ماسوو شي ... اللين يومج عيالها مانسو هالشي وهي ندمانه اتقول اعيالي تعقدو مع انهم كبرو وفي منهم اتزوجو بس الين يومج مانسو
واذكرون امهم الين اليوم باللي استوى ويقولولها احنا مابنعيش عيالنا جيه اول شرط مانسكن مع حد .... الله يحفظ عيالج ... واخليلج ريلج

السلام عليكم

مراحب بجعه

بصراحة انا مع الاخت angel eyes


ليش ها التحامل والغضب على ها البنت حتى بركن الفتاوي قالولك وضعها يألم وتحتاج لرعايه بس انتي حاطه راسك براسها ها المسكينة

حبيبتي اليوم لك بكرا عليك حطيها ببالج

اتقي الله بالبنيه

بصراحه اختي انجيل ايز ردها وايد منطقي

و عقلاني ان شاء الله تستفيدين من اللي قالته

انحل

والله بالعكس انا من ناحية البنت مالي شغل فيها .... اوكي مثل ما قلت انا عن نفسي كل شي اشتريه اخذلها وكنت طبيعيه معاها من البداية بس هم يتحسسون من كل شي اسويه معاها او اقولها عشان جي قررت اني ما اقرب صوبها دام ان عمتي او عمي او اي حد موجود اما اذا كنا رواحنا في الغرفه والله الشاهد اني العب معاها مثل ما العب مع عيالي ..

والله اني ما اكرهها بالعكس .... بس احاول ابتعد للاتفادى المشاكل

يعني انا لو عيالي غلطوا في شي ولا ضربوا احد وخاصتا البنت افتن عليهم عالخفيف لكن اذا البنت غلطت وقلنالها شي يعصبون .. واذا حمود تنفس عصبوا عليه اقول ما عليه غلط لكن البنت اتي وتسوي نفس الحركة ولا كانهم شافوها ...

يعني يا انجل انتي احكمي الحين قبل النوم اكلم ولدي بالي سواه في هاليوم اقوله انت زعلت ماما الحين ماما ما تحبك يقول ما ماما تحبني ما تبوسني كله تبوس فطوم ... ولا يقول ماما قالتلي انا ما احبك احب فطوم بس ... ولا يقولج ماما كله تضربني انا ما تضربفطوم اقوله عشان انت سويت الغلط يقولي انا ما سويت فطوم سوت ماما تقول لا انت ...

واذا انتي يالسه فالغرفه وياج ولدج من برع قلبه مليان من يشوفج يعق عمرة عليج ويصيح يقول ماما وفطومه ضربوني .. اقوله ليش يقولي لاني لعبت بلعبت فطوم وصاحت تباه ضربوني وخذوا اللعبه عني وعطوها...

ولا ازيدج طلعت اللهبه لعبت حمود ..

اوكي بتقولين بينهم وبين نفسهم تضاربوا عادي عندي والله يشهد اني كل مرة اقول خليهم هذيل يهال شوي واسمع عمتي تلعلع على حمود وتعزأه .. لو انتي مكاني شو بتسوين .. مو من حقي ادافع عن ولدي ..

مب غصبا عنج بتكرهين البنت ..

وعن ليش ما رضعتها .... اولا لانه اهلها موجودين ..

وثانيا .. فالقسم الي قلتيلي عنه كنت ابا اعرف شو بيكون ردهم .. وبس

لاني سالت في الفترة الي قالولي رضعيها كل المفتين جمعوا على اني ما ارضعها دام ان اهلها معروفين وموجودين وحالتهم ميسورة بعد ... يعني من الممكن انها ترجعلهم .. قالولي كفاية انج تحسنين معاملتها .. وين اقدر اكلمها دام انهم يتحسسون من كل كلمه اقولها للبنت .... سواءا كلمة حلوه ولا شينه ..

لكن مثل ما قالوا الخوات ما يحس بالمصيبه الا الي عاشها ويعيشها ..

والله المستعان ..

ونسيت اقولكم بالنسبه لحمود تقولون ان مشبعنها ضرب لا يا اختي لا انا اخليه والخدامة من تفتح البنت عيونها تمشي وراها الين ما تغمض عيونها واذا كانوا عندي عيني عليهم وما اخليه يضرب لا البنت ولا مريومه ... بعدها الرحمه في قلبي ترا ..

وبالنسبة لزوجي كل ما تناقشنا فالموضوع يقولي نفس الكلام ((( اهلي غلطانين وانا روحي متضايق من تصرفاتهم بس ما اقدر اتكلم لاني سواءا تكلمت ولا ما تكلمت نفس الشي اهلي عندهم هم الصح الناس كلها غلط وكلهم يوقفون مع بعض حتى لو الشي الي يسووون 100% غلط بيوقفون ويا بعض .. خذيهم على قد عقلهم ..

هذا وعمتي دارسه باجلر وعمي ثانوية عامة ..

ماشاءلله البنات كفوا ووفوا و عطوا زوجج الف عذر

حبيبتي .. المرأه بطبيعتها حساسه خاصه من ناحية ريلها و اهتمامه فيها ... تتحسس اذا حست انه اهتمامه لها قل ...

و تعابيره لها قلت و تبده تخلط لوراق في بعض .. و تبده تتوهم اشياء و ماتحط لزوجها اي عذر... يعني نفس ماسويتي انتي الحين

تقولين انج تعبانه نفسيا من تعامله معاج .. طيب مافكرتي اهو من شنو تعبان نفسيا؟؟

نفس ماقالوا بعض الاخوات .... يمكن من ضغط الاهل .. او من اشياء ثانيه

المهم انتي دورج كزوجة و ماشاءلله مع هل عشرة الطويلة ... تتقربين منه .. تتفهمين نفسيته ... بس طبعا بسلوب هادي بعيد عن العتب و اللوم و الحساب ...

و ماشاءلله انتي بدورج كمراة رزينه عاقله تقدرين تصبرين على زوجج ... وايد حريم اصبروا على ازواجهم و قدروا يغيرون فيهم بصبرهم و طولت بالهم و ردوا ازواجهم معاهم من احسن مايكون

لا تخلطين اوضاع اهل زوجج و عيالج و البنت و حال زوجج في بعض .. علشان ماتختلط عليج الامور ... انتي ماعليج الحين غير من زوجج و عيالج اما اهله نفس ماقالت وحده من الاخوات ما اعز من الولد الا ولد الولد و اكيد يعزون عيالج و يحبونهم ... و مع الوقت انشاءلله كلشي بيتغير ... انتي بس صبري و استهدي بالله .. و حاولي تكسبينهم صوبج من ناحيتج انتي بالتصفرفات و الامور الباقيه مع الوقت بتتصلح بس اهم شي انتي لا تتحسسين و سوي الي عليج من ناحيتهم و بس ولا تقصرين في حقهم حتى لو اهم قصروا في حقج .. علشان عقب مايكون عندهم شي يلومونج عليه

و الله يكتب الي فيه الخير لج انشاءلله و يحنن قلب ريلج لج