السلام عليكم ورحمة الله وبركاته
كيف حالكم يا حبيباتي ,,,
موضوعي اليوم عن الضيوف ...
مين منا ما يستقبل ضيوف ببيته ؟؟
اكيد الكل :wink:
سواء من الأهل او الاصدقاء او الجيران والمعارف ,,,
::::::::
طيب هذي الأفكار الي أطبقها وقت ما استضيف احد عندي
او حتى للزيارات المفاجئه ...
وعلشان ما اقعد افكر شنو اضيفهم ارتب اموري من بداية الشهر ..
::::::::::::
وبما اني عايشه بالبحرين
فمملكة البحرين معروفه بالحلوى الشعبيه الي ما نقدر نستغني عنها
وقت الضيافه ...
وهذي الصوره للحلوى البحرينيه ليلي ما يعرفها
واكيد برضوا عندنا الرهش البحريني او الي يسمونه حلاوه الطحينيه
بس عندي ملاحظه بسيطه عليهم
لما يجوك ضيوف تفتحين العلبه وبعد ما ياكلونه
فشيله انك تقدمينه مره ثانيه العلبه لضيوفك مره ثانيه
خصتا ان العلبه مفتوحه من قبل
وكثير من الضيوف ما يحب هالحركه
ويوسوسون ان في احد ثاني اكله قبلهم
او يمكن انا الوحيده بس عندي هالمشكله ما احب اكل
من علبه عند احد ان كانت مستخدمه وأثر الملاعق فيها
وبما اني ما احب هالشي لنفسي فما احبه لغيري
بالنسبه للحلوى وش اسوي فيه علشان ما احرج ضيوفي وقت ما اقدم لهم الحلوى بكل مره
صرت ما اقدمه بالعلبه ايش اسوي ؟؟
رحت شريت خبز رقاق
وكسرته صغار صغار
ولبست القفازات واخذ كمية صغيره من الحلوى وكميه من خبز الرقاق المكسر
واعمله دوائر واقدمه بأوراق التقديم بكل مره يجوني ضيوف
وبما ان الخبز الرقاق من الاكلات الشعبيه الي ما تخرب لمدة شهرين
ونفس الشي الحلوى ما تخرب
فما يتغير الطعم بس اهم شي اني اخليه بعلبه حافظه مانعه عن الهواء
اما بالنسبه للرهش او حلوى الطحينيه
برضوا اخذ العلبه واقلبه بصحن
وابتدي اقصه بسكين حاد على شكل مربعات مربعات
واحطه بأوراق التقديم الدائريه وارش عليها الفستق المفروم
وصدقوني هذي الطريقه منها انك تبهرين ضيوفك بطريقتك الجذابه بتقديم الحلويات
ومنها انك ما تنحرجين من تقديمك للعلب المستعمله بكل مره ...
وكل ما يجوني ضيوف يقولون ما شاء الله بيتك ما ينخلى من الحلوى والرهش
ودائما يفكرون اني اشتريهم جاهز ما يدرون ان انا الي اسويهم
خصتا لما تقدمينه بالاوراق الخاصه بالتقديم والصواني الحلوه يصير شكل الحلويات واااااو
::::::::
تتذكرون خبز الرقاق ما قلت لكم ان ممكن انك تحتفظين فيه شهرين من غير ما يتغير طعمه
شوفي هالسله التراثيه الحلوه
شريت وحده نفس هذي
وخذيت مسدس الصمغ
وشريت قطعه من القماش الي يجي شكله مكعبات باللون العنابي
وبديت اغطيه من الداخل وصار شكله حلو اني احتفظ فيه اي شي
مثل الخبز وغيره وانا حطيت فيه خبز الرقاق
ووقت ما يجوني ضيوف اجيب السله واقدم لهم الخبز
وعن جد يعجبهم هالطريقه بتقديم حاجه تراثيه وأكله تراثيه بيكون تقديمه اكيد شي غريب
على ضيوفك ....
:::::::::::::::
خلونا نتكلم عن الصواني الفضه
هذي احلى احلى الصواني الي احب اني اقدم فيه الشاي والقهوه
لكن احب اني احافظ عليه بنفس الوقت
وقت ما اقدم الدلال بالصينيه
احب اني ازين الصينيه بالدانتيل المخرم
واصنعها بنفسي
بالبدايه اختار اللون المناسب لصحون تقديمي
وهذي ورق خاص بالدانتيل تلاقونه بأكثر المحلات الخاصه بالهدايا والتغليف
اخذ مقاس يناسب صينيتي
اكثر من وحده واحتفظ فيهم لوقت الحاجه ارسم عليهم اشكال ورود
بعد ما اطويهم اكثر من مره وبعد ما ارسم عليه اقص الفراغات بالموس الخاص بقص الأوراق
وبعدها افتح الدانتيل واشوف ان الرسمه تكررت بأكثر من مكان مثل ما بغيته
وبعدها اكويه علشان تختفي اماكن الطي
واحتفظ فيه بعلب خاصه بالمطبخ علشان كل ما يجيني ضيوف
على طول اسحب ورقه من الدانتيل وافرشها على الصينيه ...
وبعد ما انتهي من العزومه ما انسى اني ازيل الدانتيل وارميه وراح تلاحظين ان لو جت
قطرات من الشاي او القهوه ما راح توسخ الصينيه الفضيه
وبما ان الفضيات تحتاج لعنايه علشان ما يتغير لونه
امسحها بالفوطه واغطيها بالجرايد علشان الحبر الي بالجرايد يمنع الرطوبه ويمنع تغير الفضه
واحتفظ فيه بمكانه الخاص للزيارات القادمه ...
::::::::::::::::::
خلونا نتكلم عن التمر
بما اننا عرب ومعروف عنا اننا مشهورين بتقديم التمر
مع القهوه
بقول لكم عن طريقتي بتقديم التمر
هذي الطريقه حلوه بتقديم التمر
انك تزيدين عليه بعض المكسرات مثل اللوز
او انك تعجنين التمر
وتسوينه بشكل دوائر وبعدها تلفينه بطبقه من جوز الهند او السمسم
أما قهوتي
أحب اني اضيف نص ملعقه صغيره
من حليب نسكافي
وهذي الطريقه يعطي قهوتك نكهه حلوه
ويوم من الايام قالت لي صديقتي والله ان قهوتك قهوة شيوخ هههههه
يا انها تتكلم صدق وعاجبها قهوتي او انها ما قد مره ذاقت قهوة الشيوخ
أما الطريقه الثانيه بعداد القهوه
الطريقه العاديه ولكن اضيف لدلة القهوه ماء ورد نص ملعقه ونص ملعقه ماء الزهر ونص ملعقه ماء الهيل .
هذي الطريقه بعد يعطيها نكهه مميزه
::::::::::
المكسرات
تقديمك للمكسرات مهم جدا لضيوفك
وفي صحون كثيره لتقديم المكسرات
الي تجي مقسمه ولكن دائما اختاري الصحون الخاصه بالمكسرات الي
لها غطاء خاص بالصحن علشان يسهل عليك حفظه وما تحتارين كيف تحفظين مكسراتك من الهواء وبالتالي راح تفقد النكهه ..
::::::::::::
كثير من الحريم يسئلون نفسهم
أيش اقدم اول شي ...
اول شي تقدمين العصير أو الشربت على حسب رغبتك
وبعدها بربع ساعه او 20 دقيقه
قدمي الحلويات مع القهوه
وآخر شي انهيها بالشاي
هذي الطريقه الصحيحه بتقديمك المشروبات او غيره
أما بالنسبه لعزايم العشا او الغدى
تقدمين العشاء قبل ما تختمينه بالشاي
وبالنسبه للغدى تقدمين الفواكه وبعدها تختمينها بالشاي
:::::::::::::
أنا اخترت هذي الحلويات بس
لأنها تقدرين توفرينه عندك على طول
للزيارات المفاجئه اما الزيارات الي عندك خبر عنها
ممكن انك تسوين الحلى الي يعجبك
وما افضل انك تسوين حلى لأول مره تجربينه بضيوفك
دائما اختاري افضل حلى تتقنينه علشان ما تنحرجين من اي خطأ ..
نصيحه : إن كانت وحده من جيرانك او صديقاتك تزورك كثير ما يحتاج
انك تحرجينها بكل هذي الأمور بكل زياره ...
بأعتقادي الخاص بما اني احب اني اسوي الواجب مع جاراتي
ما احب ان يقدمون لي كل هالحلويات بكل زياره
علشان ما احس اني قاعده اكلفهم صحيح اكرام الضيف واجب
ولكن القليل احيانا يكفي ان ما يكون بيننا احراج خصتا اني ارتاح لما احس
ان بيتها مثل بيتي دام العلاقه وطيده بيننا ...
وهذا الي انا اسويه اني اقدم لجاراتي لو كانوا يسئلون عني بشكل يومي
كوفي بكوب عادي مع قطعه من الحلاوه
استمتع معها بقعدتي ونفس الوقت هي ما تحس انها جايه لوحده غريبه ...
:::::::::::::::::::::::::::
هذا موضوعي اليوم
وان شاء الله ما شهيتكم على الحلويات
وهالله هالله بالوزن المثالي :wink:
ودمتم بود
تــــــــــــرانيم