شحالكم حبيباتي ...
يمكن انكم تعرفون اني صار لي مدة احاول اني احمل وخاصة من بعد التسقيط
ولحد الان ما صار لي نصيب
وانا لين الحين ما اضطريت اني استخدم منشطات وغيره
لاني سبق لي الحمل مرتين والحمد لله بشكل طبيعي
بس من بعد الولادة الثانية صارت لي مشاكل صحية تعبتني
وتأخر معاي الحمل لين الله كتب وحملت الحمل الثالث
وصار توقف لنمو الجنين وسقطته على الشهر الثاني من الحمل
ولاني سمعت وايد من البنات ينصحون باستخدام جهاز كشف التبويض
قلت لنفسي ما في الا اني اشتري هالجهاز علشان اتمكن من الحمل
طبعا كل شي بارادة رب العالمين لكن الوحده تتخذ الاسباب
و حبيت انقل لكم تجربتي مع جهز كشف التبويض من clearblue
واشوف رايكم وتجاربكم مع هالجهاز
أول ما جاتني الدورة رحت على الطول الصيدلية وشريت هذا الجهاز clearblue digital ovulation test
حيث يعمل هذا الجهاز على تحديد اوقات الاباضة عن طريق الارتفاع في هرمون الLHوالذي يسبق الاباضة بوقت ادق مابين 12-24ساعة ..ومنه يمكنك تحديد ايام الخصوبة
وهذا هو شكل العلبة
وفيه جهاز الكتروني هذا هو شكله بعد تركيب شريط الاختبار
ومعاه سبع شرايط اختبار
في هالصورة مبين الجهاز بروحه والشريط بروحه
وفي النشرة المرفقة موضحين كل شي متعلق بالاختبار ومعاه بعد جدول يبين لج متى تستخدمين الجهاز اذا كنتي تعرفين طول دورتج واذا كانت الدورة منتظمة
وهذا هو الجدول تشوفين فيه متى تبتدين تسوين الاختبار
ويبين لج هالاختبار متى افضل يومين للحمل
وكاتبين طريقة استخدامه وهي كالتالي :
1- نركب شريط الاختبار في الجهاز ونتاكد من ظهور علامة الاستعداد لبدء الاختبار
2- فتح غطاء شريط الاختبار وتعريضه لمجرى البول ( اعزكم الله ) لمده 5 ثواني أو جمع البول في حاوية نظيفه وغمس الشريط فيها لمدة 15 ثانية
3- نضع الجهاز على سطح مستوي لحين الانتهاء من قراءة الاختبار
4- عند بدء القراءة ستلاحظين ان اشارة الاستعداد ستبدأ بالوميض
5- تستغرق القراءة 3 دقائق وعند الانتهاء من القراءة بنجاح ستظهر أحد هاتين العلامتين
الوجه المبتسم يدل على انج قريبة من يوم التبويض وعليك استغلال اليوم اللي سويتي فيه الاختبار واليوم اللي بعده في حال الرغبة بالانجاب
والوجه الفاضي يدل على عدم وجود تبويض
6- في حالة عدم ظهور أي من الوجهين أو ظهور علامة الكتاب يدل هذا على فشل الاختبار ووجوب تكراره بشريط جديد
هذا هو الاختبار بكل بساطة