يا بنات إلحقوووونى

أولا السلام عليكم و رحمه الله و بركاته شوفوا يا بنات أنا النهارده داخله أقولكم على حاجه غريبه حصلتلى و بعد كده هاخد رأيكم فى حاجه أول حاجه أنا الحمد لله عملت بنصيحتكم و عملت تلقيح صناعى لكن يوم ما رحت أعمل التحليل بتاع المعمل قالى مفيش حمل لأن النتيجه ضعيفه جدا طبعا ما أنكرش زعلت شويه و قضيت اليوم ده كله عياط و حمدت ربنا على كل حال و إتصلت بالدكتور بتاعى فقالى أخد سيكلوبروجينوفا بس البرشام الأبيض بس و قالى ده عشان ينزل الدوره المهم الكلام ده كان 14/1 طبعا قعدت كام يوم كل يوم أصحى من النوم أقول هلاقيها شرفت لكن ماجتش قلت أجيب تحليل الحمل المنزلى مع إنى بتشائم منه لأنه عمره ما إدانى شرطتين بس رحت عملاه و لقيت المفاجأه المره دى طلعلى شرطتين مش قادره أوصفلكم إحساسى إيه ساعتها الحمد لله يا رب على الحمل و يا رب كملى على خير المهم إتصلت بالدكتور عشان أقوله لقيته مش موجود والممرضه هى اللى ردت عليه و سألتها ييجى إمتى قالتلى الأسبوع الجاى فدلوقتى مش عارفه أعمل إيه أفضل أخد البرشام ولا أوقفه ولا أعمل إيه قفلت مفيش غيركم اللى يقدر يساعدنى لأنى مرعوبه و بمنتهى الصراحه خايفه من البرشام ده فأرجوكم تساعدونى فى الموضوع ده و حاجه تانيه أمانه تدعولى إن ربنا يكملى على خير لأنى لحد دلوقتى مش مصدقه و فرحانه بس لسه خايفه فعوزاكم تدعولى إن ربنا يكملى حملى على خير و يا رب يرزقنا جميعا يا رب بالخلف الصالح يا رب و ميحرمش أى واحده من كلمه ماما يا رب