مش عايزة حل عايزة حد يسمعني

السلام عليكم ورحمة الله وبركاتة
ازيكم جميعا يا رب تكونوا كويسين ان شاء الله
مشكلتي هي القسوة انا متزوجة من انسان كويس لابعد الحدود في كل شئ الا شئ واحد هو قسوتة معايا قسوة مش ضرب وسباب وكدة القساوة في المعاملة يعني مفيش كلمة حلوة الا لما تطلبيها او تتسوليها ايوة والله بتسول الكلمة الحلوة بتسول كلمة حبيبيتي او كلمة تسلم ايديكي او شكرا او الله يخليكي مع اني والله بعمل كل حاجة كويسة عشان اسعدة
بس لما تكوني بتعملي كل حاجة بس متلاقيش قدامها مقابل كلمة كويسة او تقدير بتحسي انة ملوش لازمة اللي انت بتعملية.
والله انا عارفة اني وجودي زي عدمة في حياة جوزي ولو صحي الصبح ولم يجدني والله ما هتفرق بالنسبة له .
على فكرة هو معيشني في مستوى مادي حلو جدا جدا ومبيرفضش اي طلب (مادي) لية خالص بس نفسي احس ان انا انسانة محبوبة منة او انة بيحس بمشاعر ناحيتي حتى انا لو بادرت وقلت لة كلمة حلوة لازم يصدني ويكسفني واحس ان انا صغيرة اوي في نظرة .
انا بحبة جدا بس خلاص خايفة من تحول حبي لة لروتين يعني اني اتحول لانسانة اتعودت على وجودي معاة ووجودة في حياتي بس
والله قد تبدو ليكم مشكلة تافهة بس لا والله ربنا يبعد عنكم اللي انا بحس بية انك تحبي حد وعايشة معاة تحت سقف واحد بس حاسة ان انت بالنسبة لة لا شئ والله حاجة توجع القلب
والله بشوف ناس ماشاء الله ولا قوة الابالله الراجل بيعامل مراتة بمنتهى الحب تكفي نظرة الحب اللي تبقى مليانة بالحب من الرجل لزوجتة.
حتى دة والله نفسي احس بيها وعلى فكرة انا بقى لي حوالي عامين متزوجة وعندي ولد عندة سنة .
حتى والله الناس بيلاحظوا معاملتة لية اختة واخواتي وبابا وماما بس ميقدروش يتكلموا لاني مبشتكيش من المعاملة.
تعرفوا مرة بقول لاختي الصغيرة جوزي دة حبيبي قالت لي جوزك دة مطنشك اصلا هي كانت بتهرج بس انا حسيت انة والله فعلا هو كدة .
دة غير انة ممكن كتير يكسفني قدام الناس عادي جدا.
وعلى فكرة والله انا جميلة والناس بيقولوا لي اني حلوة كتير جدا الحمد لله يعني مش وحشة او متحبش لا بالعكس انا لي اصحاب وناس كتير بيستريحوا معايا الحمد لله جدا.
هي دة الحكاية انا دلوقتي استريحت لما فضفضت اسفة لازعاجكوا . السلام عليكم ورحمة الله وبركاتة