**إايــــــكم قصــــة ولادتــــي كمــــا وعدتـكم... ومــن ضمنـــها قصـــة الحمــل**

مرااااااااااااحب بنااااااااااااااااااااات شخباااااااااااااااااااااااركم


كل مرة كنت بكتب لكم وما يمديني اليوم حاولت اني اكتبها لكم ..



**بســـم الله مــــــاشـــــاء الله ....مـــــاشــــاء الله تبـــــارك الرحمــــــــــن**




**اللهــــــــــم صلـــــي على محمــــــد وآال محمـــــــد**




اول شىء قصتي مع الحمل ..




اني طبعا عندي بنوتة عمرها سنتين وثمانية شهور الحين حملت عليها



في الشهر اللي بتكمل فيه سنتين وبصراحة كانت صدمة ومفاجاة بالنسبة



لي حامل على بنتي وابي اكمل دراستي ما احس اني عطيتها



حقها في الرعاية وكنت ادرس قلت بخلي روحي سنتين على الأقل



او سنة ونص بدون حمل لكن شاءت الأقدار والله يفعل ما يريد



والحمدلله رب العالمين ..



المهم اني لما حملت ما حللت ولا شىء عرفت على طول اني حامل في البداية



تضايقت واجد حتى شهيتي قلت وكل تفكير طبعا هذا مبدئيا



واني ماادري شنو بيصير بعدين ..



ومرة من المرات حسيت بآلاااااااااام فظيييييييييعة اسفل الظهر والبطن



وحسيت بثقل شوي مع اني توني شهرين بس




اتفقت مع زوجي اني اروح الطوارىء عقب مااخلص من المعهد



ورحت وسوت لي اشعة قلت خلها بس تطمني على البيبي



ما فيه شىء واشوفهم قاعدين يتكلمون بالانجليزي واني كنت مفهية




وقاعدة افكر فما ركزت على شنو يتكلمون الا اتقول لي انتوا عندكم




توائم في العائلة ؟؟شنو توائم لا ما عندنا ..ويه يعني توأم ؟؟




قالت اي ..قلت في خاطري لا ياربي شلون توأم واني والدة قبل بعملية




يعني خلاص اودع على روحي كل عمليات وقعدت كل تفكير ومحاتاة




وكل اوسوس اسبوع كامل واني في حالة ذهول وصدمة بالغصب اقنعت




روحي بالغصب صدقت ان في حياتي بيجون اثنين اللهم لا اعتراض




بس هذا معناه اني ما اكمل دراستي ...وجت العطلة الصيفية




وقررت انسحب وخصوصا اني بديت اتعب وكانت الشهور تمشي




مثل مشي النملة عندي ما يمر شهر واني مصدقة وخايفة




اولد مبكر وخايفة ايصير فيني شىء ومرت الشهور وما اصعبها




خصوصا الشهر السابع حسيته من اطول الشهور عندي




وبعدها يجي الثامن الحمدلله حسيته بسرعة طاف




...والتاسع فقط ثماااااااااااااانية ايام لك الحمد ياربي ويوم تاسع بالضبط ولدت ..





قصة الولادة ..



قبل لا اكتبها اللي ابيكم تعرفونه ان من اغلى واثمن الايام اللي مرت علي




في حياتي كلها ما في يوم أغلى من هاليوم لحظات من السعادة كانت تغمرني




وخصوصا بعد ما ولدت حسيت روحي كأني في حلم ..وحلم جميل



لك الحمد ياااااااااااربي ..



في تاريخ 18 /12خليت زوجي يوديني الطوارىء لأن كذا يوم ينزل مني



ماي وسكت قلت بنتتظر اذا رد نزل بروح ورحت فحصوني قالت لي



هذا مو ماي البيبي وسوا لي تخطيط ودخلت على الدكتورة



قالت لي انتي عندج تقلصات مظطرة ارقدج ..شنو ترقيد؟؟؟لا بسأل زوجي اول



قالت لي تعالي بسوي لج اشعة وبفحصج اول ..سوت لي وعقب فحصتني



ولا سم مسكر الرحم ..طلعت برة قلت لزوجي تعال لي عند مدخل الطوارىء



وجى قلت له الحق الدكتورة تبي ترقدني قال لي اوكي بس بيخلونج لجم



يوم قلت له ما ادري واني فيني الصيحة واطالع بنتي وهي فاتحة ذراعيها



تبي تحضني وتقول ماما اهني ما قدرت قلت لا يمكن اترقد عنج



وخصوصا اني ما احس بالألام الفعليةة غير آلام مثل الدورة



ورجعت للدكتورة قلت لها اني ما ابي ترقيد قالت لي على مسؤليتج



توقعين اذا صار فيج اي شىء او في البيبيات ولو انفتح الجرح انتي



المسؤلة خذيت القلم ووقعت واني ساكتة وحسيت براحة نفسية



ما حسيت بالندم لخروجي الحمدلله ..



رجعنا البيت اني وزوجي وبنتي بنتي قامت تصيح بتلحق ابوها منعتها لأن



ابوها مشغول بعدهو ما خلص شغله ..



قلت لها بوديج الحديقة اللي صوب بيتنا ..وديتها وطول ما اني امشي



احس بآلام بس بعد نفس الشىء مو قوية لأني اعرف الم الطلق



وخليتها تلعب شوي ورجعنا الشقة ..



ويوم ثاني تاريخ 19/12/2007م هذا تاريخ ولادتي



تعشينا ونمنا وعلى الساعة خمس كنت ابي اقوم من السرير للصلاة



الا احس شىء ينزل ما قدرت اتحكم مسكت روحي واني رايحة الحمام



ابدا مو راضي يوقف شلال توضيت للصلاة بالغصب وصليت بالغصب واني



ماسكة روحي قلت اذا ولدت برد اعيدها وعقب ما خلصت رحت



بسرعة ابي اتسبح واني مو عارفة الماي بيخلص علي بسرعة بسرعة تسبحت



وفركت اسناني ورحت نبهت زوجي قلت له قوم قوم ودني المستشفى مو قادرة



قال لي اشفيج قلت له ماي واجد ينزل بحور خخخخخ واني فيني الم قويييييييي



عرفت ان هذا الطلق ..وكل اشوي ادخل الحمام حطيت لي فوطة اتغرقت



حطيت لي دشداشة شفتها في وجهي وتغرقت في الأخير حطيت كوتكس ومسكت روحي



واني قاعدة ..على الساعة ست وشوي طلعنا من البيت وكنت مو قادرة



من الالم قعدت ادعي واسبح واستغفر وبعدين حطيت بالي للساعة اللي في السيارة



قلت بحسب كم دقيقة طلع كل ثلاث دقايق وصلنا الطوارىء وجابوا لي الكرسي



وفحصتني الممرضة عرفت ان هذا مايي البيبي واني اقول خلاص



جى اليوم اللي راح ارتاح فيه واولد واشوف اولادي ما صدقت اني بولد في نفس اليوم



على فكرة لاحضوا اهني الممرضة فحصتني ما قالت جم سم عشان



على الاقل اتفائل اشوي ..وحطوني في السرير ونقلوني غرفة



الولادة اللي عمري عمري ما بنساها لحظات من الالم والحزن مخلوطة



بذكريات حلوة ومفرحة في نفس الوقت ..



دخلوني الغرفة واني اتنفض من البرودة قلت لهم جيبوا لي برنوص



وجى الدكتور سألني شوي اسئلة ومنها اني حملي طبيعي؟؟ والا منشطات ؟؟



بعدين قلت له طبيعي ومفاجىء ..اني دخلت غرفة الولادة الساعة



7.15 بالضبط وجت الساعة تسع وقبل لا اجي الدكتورة قلت لهم جيبوا لي الدكتورة




بقولها اتسويني عملية واني في بالي رافضة رفضا باتا بس ماادري شلي خلاني



اقول ابي عملية يمكن لأني تعذبت وايد في طلق بنتي وما توسعت غير ثلاثة بس ..



واقول اكيد كل هالالم على واحد بس ويبي ليي اكثر من يوم عشان اتوسع



أكثر هذا اذا توسعت كامل اصلا ..



المهم على التسع بالضبط جت الدكتورة وكانت هندية قلت لها دكتورة



اني ابي عملية قالت صبر ماما بيشوف الكرت شافت كرتي



ومسوين لي بوكيد يعني حجز للعملية بتاريخ 2/1/2008 لأني عملية



من قبل فخايفين اولد طبيعي وهم اثنين مو واحد ..قالت اني



يفحص الحين فحصتني الا اتقول ماما انتي 4 سم اهني بطلت عيوني



اني ما صار لي غير ثلاث ساعات من الطلق و4 سم معجزة عندي بصراحة



فرحت وهونت عن طلبي للعملية اللي مو جادة في الاصل



بعدين جت لي عجمية وقامت تشجعني اتقول لي لا اتقولين تبين عملية



انتي تعرفين ان بنتج مريضة الحين فشلون بتقومين بهم ثلاثتهم



اذا ولدتي بعملية اتشجعي واحنا كلنا معاج ما بنتركج ولا لحظة قلت لها اني خايفة



من الولادة وهذولين اثنين مو واحد قالت لي نفس الشىء بس واحد يطلع



دقيقة وراه الثاني على طول ..اني كنت خايفة من انفصال المشيمة



وخايفة من التفاف الحبل السري والنزيف لأن الدكاترة خوفوني



من جدي ما كنت متشجعة والحمدلله كلامها عطاني دافع واني اتحمل الالم



وكانت كل ما تشوفني أتألم اتقو اخذي نفس عشان لا يتعبون معاج



واني مو قادرة آخذ نفس ..مرت الدقايق والساعات واني عيوني



على الساعة اترقب لحظة الولادة وعطوني ابرة نمت شوي وكل شوي يصحوني



انقلب للجهة المعاكسة عشان التخطيط وبعدين جت نرس بحرينية



من أروع ما ايكون طيبة واخلاق وطولة بال ضلت معاي لآخر لحظة تشجعني



من الولادة وهي اللي اشرفت على خروج البيبيز ..



مع الم الطلق وانتظار مرور الوقت كل ما تفحصني اقولها ها جم اتقول انتي هالقد



اتوسعتي من 6_7 بعدين من 8_9 وبعدها خلاص نسيت سالفة التوسع



وضليت مع الوجع يجيني فترة ورى بعض ويرد ايروح آخر شىء



قلت لها بعدي 8 ؟؟قالت ل ا انتي الحين كااااااااااااامل ما صدقت



هاااااانت قريب بولد ..وقالت لي كلما اتحسين بالألم دفعي عشان



ينزل راس البيبي ويقترب اكثر بعدها ..قالوا لي يالله الحين دفعي عدل



وجت دكتورتين وهذه الممرضة ومعاها ثنتين بعد قالوا لي دفعي دفع طويل



بدون ما تاخذين نفس ودفعت كذا مرة مع تشجيعهم لي وما اشوف الا شىء منزلق



وشرف حبيبي حسن على الدنيا ما اروعه من احساس على طول خلوه على صدري



وبعدها راح الالم وقالوا لي اذا جى دفعي عشان يطلع البيبي الثاني



رجع الألم وما دفعت قالوا لي اذا رجع دفعي بس دفعة واحدة وشرف حبيبي



حسين وكان وايد ضعيف بس ما خذوا مني ...الفرق بينهم ست دقايق ..



بعدين خذاهم طبيب الاطفال يفحصهم ..



آخر مرحلة اللي اخراج المشيمة طلعتها مع كيسين لأنهم في مشيمة



وكل واحد في كيس بروحه وبعدين خيطتني وهي تخيطني قاعدة اسولف معاها



رغم ان فيه الام وهي تخيطني بس الام محتملة ..ومن سوالفي معها



قعدت اسولف معها عن اولادها ما عندها الا ولد واحد بس عمره خمس



قلت لها ليش ما حملتي عليه اتعقدتي من الولادة قالت لا بس لأن



مريض قلت لها الله يشفيه وشكرتها وايد وطلعوني من غرفة



الولادة واني فرحانة اني ولدت خلاص ما احلاها من لحظة عبىء ثقيل



وافتكيت منه ودوني الحجرة وجابوا لي عشى وقعدت آكل اشوي



الا واهلي جايين وفرحانين والكل يبوس فيني ومو مصدقين



اني ولدت وجبت توام ويقولون لي اهلنا ومعارفنا الكل مو مصدق ..



بعدين ودوني الجناح واختي وبنت خالي اشتروا لي عشى وايد



بس اني ما اكلت الا البيتزا لأني كنت تعبانة..



وبعدين زوجي جى لي وكانت الفرحة مو سايعته



وقعدت اسولف معاه واني فيني نومة ابي انام قعدد معاي ساعة



وبعدين راح ..وكانت هذه قصتي ادري طولتها عليكم بس حبيت تعرفونها



واقول للبكريات لا تخافون لحظات الولادة صحيح فيها الام بس



بعد لحظات حلوة والاهم من هذا تنسين التعب كله اذا شفتين البيبي ...




تحيااااااااااااااااتي مع تمنياااااااتي للجميع بولادة سهلة ان شاء الله..