حبيت إني ما أبخل عليكم بوصفتي الخاصة والسرية لتقشير وتغذية وتفتيح الجسم .. وطبعاً اسمحوا لي إني ما أخبركم عن النتيجة لأني أبغيكم انتوا اللي اتجربون وتفيدون غيركم بالنتايج
الوصفة عبارة عن :
سكراب للجسم وأنا شخصياً أحب أستخدم هذا النوع

تقشيره حلو .. وريحته مثل ريحة التوت البري وما في مانع تستخدمين أي نوع ثاني بس يا ريت لو يكون بنكهات الفواكه عشان تستمتعين بالروائح المنعشة والفواحة
وأضيف القليل من حليب الأطفال .. ممكن اتحطين أي نوع متوفر عندج

أنا شخصياً أستخدم مسحوق حليب السيميلاك المخصص للرضع اللي من عمر ست شهور وفوق لاحتواءه على 32 مادة مغذية من معادت وفيتامينات مثل الكالسيوم والمغنيزيوم والزنك والنحاس والحديد وفيتامينات أ،د،ه،ك1،ج،ب2،ب12،حمض الفوليك واليود الكلوريد وغيره وغيره
وأيضاً يحتوي على زيوت ترطيبية مثل زيت دوار الشمس وزيت جوز الهند وزيت فول الصويا.
تاخذين 3 ملاعق السكراب وتضيفين عليهم ملعقتين من مسحوق الحليب وتخلطينهم .. وترى الكمية مب مهمة ولا المقدار .. المهم يكون خليط من الاثنين وبالمقدار اللي يحتاجه الجسم.
وعقب الاستحمام بماء ساخن اتحطين الخلطة على جسمج وتبتدين بالفرك في جميع المناطق وبالأخص المناطق الداكنة مع تجنب المناطق الحساسة.
راح اتحسين كأنج حاطة آيسكريم توت ذايب على جسمج وتبين تاكلينه من حلاوة الريحة .. وكل ما طولت الخلطة على الجسم كل ما تغذى الجسم واستفاد من المعادن والفيتامينات الموجودة في الخلطة.
عقب اتنشفين جسج بشكل عادي .. وممكن تمسحينه برشات من ماي الزهر أو ماي الورد.
الوصفة سهلة وعملية .. ويا ريت اتخلونها وصفتكم مدى الحياة وأوعدكم ما راح تندمون :)
...
وبخصوص الوجه .. أنا أفور الحلبة وآخذ ملعقتين من مغلي الحلبة بعد ما يبرد .. وأضيف عليهم ملعقة صغيرة من حليب سيميلاك وملعقة روب ونصف ملعقة صغيرة عسل طبيعي .. وأستخدم هالماسك على ويهي لمدة ساعة تقريباً وعقب أغسله وأفرك عليه مكعب من ماء الورد اللي تم تثليجه من قبل .. القناع هذا مفيد جداً للشد والتغذية وطبعاً التفتيح في نفس الوقت.
أتمنى اتجربون وتخبروني بالنتايج :wink:
مع خالص تحياتي : اختكم ترف







