أنا وزوجي من شهر

السلام عليكم ورحمة الله وبركاته

ابدأ على طول بموضوعي واتمنى مشورتكم
أنا متزوجه من 3 سنوات وعندي ولد وحامل الحين بالسادس ساكنه بشقه كامله في بيت اهل زوجي وهم الحمد لله ناس طيبه

انا زوجي حبيب وحليو
بس
مشكلته عنيد ومشغول
يعني لما يطلع من الشقه خلاص كانه ينساني انا احس بجذيه يعني نادرا ما يدق عليه وهو برى مايرسل لي مسجات ابدا حتى لو ارسل له مسج ما يرد و لما نكون تحت مع اهله يكون جالس في بيت الشعر مع خوانه ما يجي عندنا انا وامه داخل الا نادرا ومرات ما يجي هالشي تغير شوي لما جبت ولدي صار يجي يقعد معانا مرات عشان يالعب معاه واذا ما يالعب ما يتكلم ولا يسولف وحتى لما نروح نجلس معاهم في بيت الشعر ما يتكلم
وحتى لما يجي يجلس معاي بالشقه اول شي هو ما يطول يعني يجي بعد الغدا ومرات يتاخر تحت يجي يقعد شوي ويطلع و بالليل يجي ينام يعني ما بيننا سوالف كثيره ياكثر ما حاولت انا افتح مواضيع تخيلوا بس يسمعني دون اي تعليق ابدا اذا قال كلمه وحده نعمه فاتفشل ولا عاد اكمل لما سالته ليش جذيه قال انا ممله والا شنو مع العلم انا الكل والله العظيم يتمنى الجلسه معاي مرحه واونس تدرون شنو قال ؟؟ قال هذا طبعي موبس معاج شوفيني حتى مع اهلي
هو رجل اعمال يعني صج مشغول دايم بس عاد مو على احسابي
وتصير معانا مشاكل مثل اي زوجين عادي بس للاسف دايم انا اللي اجيه واراضيه والله مرات يكون اكبر الغلط عليه بس همن اقول ماعليه يستاهل مره سالته ليش انت ما تراضيني قال لان السالفه ما تستاهل ولاني خلاص تعودت تزعلين تزعلين وترضين من نفسج




المشكله الكبيره صارت قبل العيد باسبوع





كنت قاعده اقعده من النوم ولا رضى يقعد وهذا طبعه يالله يقوم بس مرات لا شفته بالمره معاند اخليه بس هالمره حرام كنت اقعده يودي اخته لموعد مقابله وظيفه فقعدت ازن عليه لين قعد لما صحى وراح يتريق جيته قلت ما صارت كل يوم جذيه يالله تقوم قال اذا مو عاجبج لا عاد تقعديني
اهنيه عصبت وطلعت من الغرفه ولما طلع ارسلت له رسالة عتاب قلت حرام عليك لا تحس ولا شي تكون غلطان وتزف كاني خدامه وانت ما تراعييني وانا تعباننه من الحمل ومن هالكلام
طبعا ما رد عاده ولا صعد بعد الغدا
لما جاء المغرب كنا بنروح السوق نشتري اغراض العيد دقت عليه عمتي قالت فلان موجود يقول انزلي بتروحون السوق طلعنا تسوقنا طبعا ولا كلمه بيني وبينه لما خلصنا واحنا رادين البيت ما دريت الا غير طريقه ووقف قدام مطعم قال تبين تتعشين قالها وهو يضحك
اهنيه انا خنقتني العبره والله من الفرحه اول مره يراضيني جذيه قلت كيفك تبينا نتعشى والا لا عاد سؤاله قلت كيفك تخيلوا عصب وحرك السساره ورد البيت واحنا بالطريق قلت خلاص بنتعشى ارجع قال ماني سواق عندج قلت عيني ما يحق لي اتغلى عشان تدلعني
ردينا البيت صعدت غرفتي وانا منهاره تعبت لاني حامل دقيت عليه وانا ابكي تعال انا تعبانه تخيلوا ما صعد دقيت مره ثانيه قال انا طلعت
دقيت على عمتي وجتني دقت عليه قالت تعبانه تعال ودها الطبيب تخيلو ساعتين لين جاء رحنا الطبيب في غرفة الفحص قلت له روح انتظار قال مالج شغل فيني قلت اطلع وجودك يتعبني وجودك يزيد حالتي سوء ادري قويه بس كنت صج ما عاد ابي اشوفه قاهرني وتعبانه يعني مو ناقصته وياليته يوم كان عندي يتكلم الا قاعد مطنقر شوي وطلع وقالوا لازم تدخل المستشفى دخلت وطلعت ثاني يوم لان حالتي ما كانت قويه
ورجعت وهو للحين ما يكلمني ولا حتى سالني عن حالتي ارسلت له رساله قلت له كل شي كنت اتوقعه الا انك ما تهتم فيني لهالدرجه ومايهمك الا نفسك ومن هالكلام طبعا لا حياة لمن تنادي
وصار ينام بالغرفه الثانيه ولا يكلمني ولا اكلمه حتى بالعيد ما شفته ولا عايدته ولا عايدته والله هذا حاز بخاطري حيل ثاني يوم العيد سافر طلع للبر 8 ايام ورد امس لما دش قالي السلام رديت عليه شخبارج قلت الحمد لله وعليها
ونام امس همن بالغرفه الثانيه واليوم قعد ولا حتى قام يخليني اسوي له ريقوق ينزل يخلي امه او الخدامه يعطونه

وش رايكم عن جد تعبانه ومحتاره
ما ابي انا اللي اراضيه لاني اشوف هو الغلطان صج اني قويه يوم طردته من غرفت الفحص بس كنت بحاله مايعلم فيها لا الله ولا زم يقدر لوز انه هو ما عصب لنا ما رديت عليه لما كنا عند المطعم بس هو يعني خلاص انا لما اراضيج احمدي ربج ترضين على طول
كم مره شوي واروح اراضيه او ارسله بس اتراجع اقول دايم انا اراضيه وهالمره الموقف قوي خل يعرف اني اراضيه اذا كانشي صغير بس لا زعلت زعلت

تكفون ابي رايكم بس ابيه يكون محايد وواقعي


تحياتي