ساعدوني والله قلبي بيتقطع على اخوي خالد

السلام عليكم و رحمة الله تعالى و بركاته،

الله يهديهم .. في بعض الدكاترة ما أدري شلون يتكلمون و بأي منطق ما يراعون شعور المريض و أهله إطلاقاً .. أنا إللي أعرفه إن التوحد ما عاد مثل قبل يخوف بس بشرط إن المريض يلاقي العناية المناسبة ...

إنتي بس لا تخافين أول شي تاخذونه لعند دكاترة ثانين .. واحد ولا إثنين بس عشان يأكدون لكم الحالة ..

و إذا ثبت إن عنده توحد أنا عن نفسي أنصح بمركز أو مدرسة عالية في البحرين .. الصراحة ممتازين مثل ما قالت لج أم دانة .. أنا أكلمج من واقع تجربة .. ولد خالي عنده حالة توحد و ألحين هو بعمر قريب بيصير 8 سنوات و يتعالج معاهم من حوالي سنتين أو ثلاث بس ألحين يدرس في مدرسة عادية .. هي صج مدرسة خاصة و مو حكومية يعيني من النوع إللي يعطون إهتمام زايد بالطلاب بس هي مخصصة للناس العاديين إللي ماعندهم مشاكل .. يعني يخالط أطفال طبيعيين و يلعب معاهم على قد ما تسمح له حالته .. و مثل بعد ما قالت لج أم دانه جزء كبير من علاجه يكون في نظامه الغذائي و متابعة من قبل أخصائيين ...

إنتو بس لا تخافون و إنسوا كلام الدكتور .. أخوج بشر و عنده مشاعره و أحاسيسه و يمكن يحتاج لإهتمام زايد و تفهم منكم عشان تصير حياته أسهل .. و قولي الحمد لله حتى لو ثبت إن عنده هالمرض ترى مو نهاية العالم .. أنا شفت حلقة لبرنامج أوبرا حطوا طفل عنده توحد عالجوه بنفس النظام إللي قلنا لج عنه لمركز عالية إللي يشوف هالطفل ما يصدق إن عنده توحد يمزح و يتكلم بشكل كلش طبيعي ..

و عن الدكتور .. بقول لج شي أنا ولدي الصغير عنده حول مو طول الوقت لكن بعض الأحيان لما يركز على شي .. قبل فترة كا واصل أخصائي بهالأمراض للبحرين و قلت أشوف رايه .. أول ما دخلت عنده ما أخذ له حتى 5 دقايق إلا قال لي بسوي له عمليه !!! رأساً بالنظر بس و بدون أي فحوص قرر إن حالته ما أعرف شنو إسمها و إن هو لأنه بيكون موجود في البحرين اليوم و باجر بس فممكن يسوي له عمليه و هو بيحاول يدخله بين المرضى و ما أعرف شنو من هالخرابيط .. أنا وقتها ما كنت معترضة على مسألة العملية بس ما عجبني إسلوب العجلة في كلامه و لا عجبني سرعة تشخيصه للحالة.. و كلمت زوجي و تشاورنا و كنا إثنينا متفقين إن لو ثبت إن العلاج فعلاً يحتاج عملية مو مشكلة بنسويها في أي وقت ثاني ليش اليوم بالذات .. و فكرنا نستخير و ما كانت الخيرة مشجعة .. و الحمد لله إني ما سويتها .. راجعت دكتورة ثانية الكل يشيد فيها .. إسلوبها وايد حلو و هادئ .. قالت لي إنتظري عليه .. و إنتظرت و لما إستمرت الحالة فحصت نظره بعدسات مختلفة و طلع إن عنده ضعف نظر غير متساوي و عشان جذي يطالع بعين وحدة أحياناً و الثانية لأنها غير مستخدمة فتنحرف عن موضعها الطبيعي .. و قررت إن نلبسه نظارة .. و حالياً أحس كأن حالته أفضل مع العلم إنها قالت لي يمكن يحتاج لعملية بعد فترة بس بنشوف نتائج النظارة أول .. و بالنسبة للعملية الطفل بعده صغير و عندنا فرصة نسويها إذا لا سمح الله إحتاج لها بعدين .. يعني كلامها وايد هادئ و يطمن .. بس مثل ما قلت لج بعض الدكاترة الله يهداهم و يكافي الناس من شرورهم

أنا طولت عليج بالكلام سمحي لي .. بس يا ريت تطمنيني عن أخوج لأن الموضوع صار له فترة من إنتي حطيتيه و أنا توني اليوم شايفته .. و ما عليه شر إن شاء الله

الله يشفيه ان شاء الله اختى الغالية انصحك بكثرت الاستعفار والصدقة " داواء مرضاكم بالصدقة " والله عن تجربة ..
ولاتئيسون خلوا أملكم بالله كبير ... تحياتى

اختي العزيزة ...
الله يطمنكم انشا الله..
اذا اخوج ما يتكلم الا كلمات قليلة فهذا لا يعني بالضرورة انه مصاب بالتوحد احتمال يكون اخوج خالد متأخر لغويا
في سمات عامة للطفل المتأخر لغويا :


1_مشكلات اللغة الاستيعابية : وتظهر هذه المشكلات من خلال المؤشرات التالية :
أ_فشل الطفل في فهم الاوامر التي تلقى عليه بواسطة من يكبروه سنا , وعجزه عن التعامل معها , وذلك كأن يطلب من الطفل احضار شئ, فيستجيب بصورة يظهر من خلالها انه لا يفهم ما طلب اليه . ويجب ان يتكرر هذا السلوك حتى يكون مؤشر على التأخر اللغوي .
ب_ظهور الطفل و كأنه غير منتبه , حيث يبدو للاخرين الذين يتحدثون اليه وكأنه لم يسمع ماقالوه , على الرغم من احتمالية سلامة سمعه .
ج_يظهر الطفل صعوبة في فهم الكلمات المجردة .
د-يظهر الطفل خلطا في مفهوم الزمن .كأن يقول اريد ان العب في الامس .
2_ مشكلات في اللغة التعبيرية :
أ- يظهر الطفل مقاومة للمشاركة في الحديث او الاجابة عن الاسئلة , ويرفض الكلام عندما يطلب اليه ذلك .
ب_يظهر الطفل تدني في عدد المفردات التي يستخدمها , ويلاحظبأن اجاباته تقتصر على على عدد معين من الانماط الكلامية .,
ج_يظهر الطفل عدم القدرة على استغلال خبراته السابقة بحيث يظهر كلامه متقطعا .
3_ السمات الاجتماعية والوجدانية :أ_ تظهر لديه مشكلات في التعامل مع اصدقائه , فقد يظهر عدوانيا او منعزلا .
ب_ يميل الى اختيار اصدقائه ممن هم اصغر عمرا منه .
ج_ قد تظهر عليه بعض علامات الضجر والاحباط .


4_ الصفات الجسمية :
أ_ يظهر الطفل المتأخر لغويا بمظهر طبيعي , ولا يختلف عن الاخرين , غير انه قد يعاني من مشكلات في نمو الاسنان , او من انشقاق في الحلق , وقد يعاني من الحساسية المفرطة في الجهاز التنفسي مما قد يعرضه للاصابة بنوبات برد متلاحقة , وقد يعاني من فقدان السمع , او افراز اللعاب .

هذي يا اختي بعض المعلومات اللي انشا الله تستفيدين منها . بس الاحسن تعرضونه على اخصائي احتياجات خاصة .
وبالمناسبة اذا كان الطفل من ذوي الاحتياجات الخاصة فهذا لا يعني انه متخلف او معوق كما يسمونهم البعض , بل هو طفل لا تناسبه البرامج والخطط التعليمية التي تقدم في المدارس العامة العادية بل يحتاج الى برنامج خاص يتناسب مع حالته ويلبي احتياجاته واهتماماته .

خواتي حبااااايبي فيديتكم
والله ماقصرتم والله فيكم الخير
ادري اني مقصره بس سامحوني
اللهم في هذا اليوم الفضيل
كما ساعدنني اخواتي الي ردن على
اللهم اجعل لهم من كل عسر يسرا ومن كل ضيق مخرجا وارزقهن من حيث لايحتسبنا
واحفظ لهم ازوجهم وزوج الي ماهي متزوجه
اللهم ابسط لهن في رزقهن واهدي لهن احباهن وفرج كربهم كما ساعدوني
واشفني واشفي اخي خالد واشفي حميع المسلمين والمسلمات والمومنين والمومنات

عزيزتي الله يشافي اخووك ويصبركم

لو كان عنده توحد مثل ماقال الدكتور كان عرفتو من قبل مو الحين

اخوك مثل ماقلتي عمره6 سنين

التوحد مو بس مايتكلم

ولد اختي عمره الحين 4 سنوات ونص

ومن عمر سنتين عرفنا ان عنده (طيف توحد ) اقل درجات التوحد

في البدايه ودته اختي عند استشاري اذن وحنجره قال سمعه طبيعي

وبعدها عرفنا انه عنده طيف توحد عرضته اختي على دكاتره طب نفسي اطفال

وبعد جلسات اجتمعوا 5 دكاتره وقالوا ان عنده طيف توحد

يعني التشخيص صعب مو سهل من جلسه يعرف الدكتور

عندي لك كذا سؤال

اخوك يوم تكلمينه يتواصل معك بالنظر ؟

عنده مشكله في النوم ؟؟ يسهر كثير ؟

يحب اشياء معينه ؟ مثلا يحب الاشياء المتحركه في التلفزيون مثل sms او يحب يجمع المفاتيح او اقلام او اي شي غريب ؟

يعمل حركات معينه ؟ مثلا ينط كثير يدور يعض اصابعه ؟

يعني التوحد ملاحض خصوصا انه اخوك عايش معاكم مو الدكتور من اول ماشافه يحكم !!!

اما من ناحيه الدكاتره والمراكز هذا اصعب شي مو متوفر عندنا الا قليل وزحمه ولازم انتظار سنه سنتين على حسب !!
ومافيه علاج نهائي مثل ماقالت الاخت

الا المراكز المتخصصه في المدينه ماعرف بصراحه ممكن تسوين بحث عن المراكز الموجوده عندكم

في الرياض تقريبا 3 مراكز

والدكتور ان شاء الله ماعنده سالفه ويكون اخوك طبيعي

وامس شفت في الاخبار طفل عمره 6 سنوات ماتكلم ابدا ويوم جابوا له كلب في المدرسه جلس يتكلم معه

شوفي العجب في امريكا الطفل مايتكلم ابدا وداخل مدارس عاديه ماعزلوه

اختي دخلت ولدها قبل سنه مركز لعب واشتركت معاهم بفلوس الشهر 1200 وطردوا ولد اختي حسبي الله عليهم شوفي الفرق بينا وبين الدول الثانيه

والدكتوريوم يقولكم انه مثل الميت مايحس ولا يعرف ماعنده سالفه

ولد اختي يحب اللعب والملااهي وذكي ماشاء الله بالمره ويحب ياللعب في المكان الي فيه اطفال ويوم يطلعون من اللعبه يطلع !!

انتي حاولي تجلسون معاه وتحظنونه وراسليني على الخاص

الله يشافيه لكم يارب

البنات و الأخت ألينا ما قصروا

الله يشاافيه ويعاافيه ياارب بس لازم تاخذونه لطبيب ثااني افضل الأن كلام دكتور هذا مايطمن مو معقوله من جلسه عرف يشخص حالته والله يشاافيه.ويصبر قلوبكم

انا ماعرف شي اختي الله يشفيه ان شاء الله الله كريم

خواتي حبااااايبي فيديتكم
والله ماقصرتم والله فيكم الخير
ادري اني مقصره بس سامحوني
اللهم في هذا اليوم الفضيل
كما ساعدنني اخواتي الي ردن على
اللهم اجعل لهم من كل عسر يسرا ومن كل ضيق مخرجا وارزقهن من حيث لايحتسبنا
واحفظ لهم ازوجهم وزوج الي ماهي متزوجه
اللهم ابسط لهن في رزقهن واهدي لهن احباهن وفرج كربهم كما ساعدوني
واشفني واشفي اخي خالد واشفي حميع المسلمين والمسلمات والمومنين والمومنات