جدولي الخاص كما طلبتوه مني

بسم الله الرحمن الرحيم

السلام عليكم ورحمة الله وبركاته

نزولا لطلبات ربات البيوت الي طلبو

جدول الأكل الشهري تبعي من اول يوم بالشهر الى آخر

يوم بالشهر ..

الفكره يا اخواتي كان بموضوعي الأخير تجاربي رقم

خمسه الي ما تعرف عن الجدول ياريت تراجع الموضوع

تجاربي بالبيت رقم 5 ..


بدايتا أحب اني اذكر اني بخلي لكم وجبات الغداء والعشاء فقط

أما الفطور فمعروف انه ممكن يكون منوع وخفيف أوكي …
طيــــــــب

على فكره ما ابي احد يدخل وما يرد (ياويلكم )
لا قاعده امزح على الأقل ادعو لي بالخير لو استفدتو

نبتدي بعون الله …


الاسبوع الأول :::::::::::::::

يوم السبت :

الغداء : كبسة لحم ( أكيد الكل يعرف اشلون يسويها )


العشاء : بيض مفيوح + خيار مقطع + طماطم مقطع + خس + كوب حليب مع شاي
ملاحظه انا احب بالنسبه للعشاء اني اجهزه بالسندويشات
واخليه بالمكينه الخاصه بالسنديشات زي الكفتيريات
وايضا ألفه بأوراق السندويشات

يوم الأحد :

الغذاء : عدس + رز + كريات من اللحم المفروم اضيفها لمرق العدس
الي تحب اعلمها طريقتي ممكن اكتبها بعدين لكم على حسب رغبتكم

العشاء : صينيه بشمل بالفرن

يوم الأثنين :

الغداء : من المطعم لأن اليوم يكون خاص بتنظيف البيت بجدولي الشهري
وبما ان بداية الشهر فممكن ان نطلع نتغدى برااااا يعني الكل بيسمح ظروفه
بهذا الشي او انك تطلبينه دلفري

العشاء : بما ان الغداء كان برااا فالعشاء المفروض يكون معتبر ههههههههه
علشان ما يحسون اني كسلانه ادخل المطبخ فأطبخ لهم طبخه سهله
ولكن كلمة روعه قليله عليها صينية دجاج بالفرن ما عليك الا انك تبهرين
الدجاج وتقطعين كل انواع الخضره عندك وتفرشين القصدير بالبايركس
وتغطينه بالقصدير من كل الجوانب وخليه على الأقل ساعتين بالفرن
اما المقبلات يكون كالآتي روب بالسبانخ تغلين السبانخ وبعدين تصفينه وبعدين
تخلطينه بالروب وايضا الشي الثاني الي اقدمه معاه سلطة الكلوسلو الي يقدمونه
بالكنتاكي وطريقته سهله ولكن سر الطعم في اضافة الملح والسكر مع بعض مع خل ابيض
اما المكونات جز وخس فقط


الثلاثاء :

الغداء : صالونة سمك كنعد + رز شيلاني ( أبيض ) + ما اسوي سلطه لأن السلطه
مو حلوه تقدمينها مع الصالونه فأحب اني اضيف على السفره رويد وبربير يعني أي نوع من الألياف

العشاء : بطاطس + سجق + بريد + خيار مخلل + طماطم مقطعه + خيار مقطع
واسويهم نفس الطريقه بالسندويشات وبعدين احطهم بالمكينه وبعدين الفه بورق السندويشات
اما البطاطس أضيف لكل واحد بصحنه قبل التقديم

الاربعاء :

الغداء: مقلوبة دجاج اما الطريقه فذكرته بقسم الطبخ كلش سهله وعمليه

العشاء : أنا اسوي لي كميات كل شهر من الفلافل واكيسهم واحطهم بالفريزر بأكياس السندويشات
فأطلع الكميه الي يناسبني استخدم آلة الفلافل علشان يطلع شكلهم حلو وقت التحمير بالزيت
اما المقبلات يكون لبنه + طماطم معصور عليها ليمون وفلفل اسود وملح + خبز

الخميس :

الغداء : سمك مقلي ( صافي ) + بطاطس مقلي + اسوي صوص مثل الدقوس واصبه
على السمك وهو حار وينوكل مع خبز

العشاء : فاصوليا + بيض مقلي + جبن كيري + مربى على توت + خبز + حليب مع شاي

الجمعه :

الغداء : بيت أهل زوجي ههههههههههه تصرفو عاد انتو شنو تبون تطبخون في هاليوم

العشاء : اطلع من الفريزر سمبوسه وايضا كبه وهذا دائما انا اسويهم واكيسهم + جباتي جاهز
يبيعونه بالسوبرماركت بأكياس مثلجه + بطاطس مهروسه بشكل دوائر وايضا اسويها مجهزه مسبقا
ومكيسه بالفريزر


الاسبوع الثاني :::::::::::::::::

يوم السبت :

الغداء : معكورنه باللحم بصلصة الصويا صوص

العشاء : همبرجر اسويهم سندويشات اما الأضافات فأسويها نفس الكفتيريا


يوم الأحد :
الغداء : مرق باميه مع الخضروات بدون لحوم + رز ابيض شيلاني

العشاء : لحم بالفرن مع خضروات مشكله ونفس الطريقة الي كتبتها عن الدجاج تقدم مع الخبز والمقبلات


الأثنين :

الغداء: كشري + صوص مثل الدقوس

العشاء : ورق عنب + كوسه محشيه + فتوش


الثلاثاء :

الغداء : كبسة روبيان طازج + سلطة + دقوس

العشاء : باذنجان مقلي + بطاطس مقلي + روب بالخيار + خبز
بسيطه ولكن لذيذه علشان تعرفون اشلون وزني قاعد يزيد


الأربعاء :

الغداء : لحم بطريقة الكاري + رز شيلاني


العشاء : سندويشات جيكن فيلي مع مقبلات الخاصه فيه


الخميس :

الغداء : صالونة دجاج مع الخضروات + رز

العشاء : أسوي بيتزا بالبيت على خضروات أو بيبروني مع جبن


الجمعه :

الغداء : بيت أهل زوجي والله ارتاح هاليوم واصبر روحي طول الاسبوع علشان اريح
بيوم الجمعه بس ههههههههههههه ما عليكم اخر شي انا إلي أغسل الصحون

العشاء : اسوي اندومي ههههههههه
بس طريقتي غير اني احمر البصل بعدين اضيف الملفوف والفلفل البارد الاخضر
ودجاج مقطع بعد ما ينغلي واحط الصويا صوص وبعدين اضيف اخر شي الاندومي
بعد ما خليته يغلي بماء لحاله واقلبهم مع بعض بيطلع نفس اكلات الجاينيز



الأسبوع الثالث :::::::::::::

السبت :

الغداء : برياني لحم + فتوش

العشاء : هذا يوم خاص بالسبانخ ههههه كلنا نحب السبانخ حتى عيالي
آخر شي بنصير باباي هههههههههه ايه اسوي فطاير بالسبانخ يعني لحم بالسبانخ
او لبنه بالسبانخ او جبن مع سبانخ الجبن المستخدم هو فيلادلفيا الخاص بالمعجنات


الأحد :

الغداء : كباب مشوي مع رز ابيض مع طماطم مقلي بالزيت وسلطه

العشاء : جيبو بروستد من براااا ههههههههههههه


الأثنين :

الغداء : هامور بالفرن مع خبز وايضا دقوس

العشاء : باذنجان مع بطاطس مع لحم مفروم بشكل طبقات وآخر طبق للوجه خلطة البشمل يسمونها مصقعه


الثلاثاء :

الغداء : مضروبة دجاج مع الشوفان بدون رز

العشاء : لا تجيبون بروستد ههههههههههه
أنا اخذ لحم مثل الريش وادخله بالفرن
واسوي حمص وتبوله بالبيت مع خبز والله الريش اسوي منه كميات
بس ما شاء الله عيالي يحبون ياكلونه بدون خبز علشان كذا ما يكفي الا اسوي كميه كبيره

الاربعاء :

الغداء : كبسة دجاج + سلطه + دقوس

العشاء : كروسان محشي على حسب الرغبه انا احشيهم باللحم المفروم بعد ما احمصه
بالبصل وآخر شي احط عليه الجبن وقت الحشو نفس الاجبان الي تستخدم للبيتزا


الخميس :
الغداء : رز محمر بالسكر + سمك شعري

العشاء : لزانيا على دجاج


الجمعه :

الغداء : نفس كل جمعيه مرتاحه من الطباخ

العشاء : نطلع بوفيه خلوني ارتاح اليوم كله ما ابي اشوف وجه المطبخ
وانتو بعد طلعو ريحو تستاهلون الراحه واذا ما تقدرون تطلعون عطوهم نواشف احسن


الأسبوع الرابع والأخير :::::::::::::::

السبت :

الغداء : اسياخ من الدجاج المقطع + خبز + حمص + تبوله

العشاء : روبيان مقلي وما اشيل الذيل علشان يطلع شكله مثل المطاعم
ولا تنسين تسوين الخلطه للروبيان من البقسماط والبيض علشان يطلع مقرمش
يقدم مع البطاطس المقلي والخبز و صلصة المايونيز بالثوم

الأحد :

الغداء : طبختي اني اغلي ماء واحط فيه رزمتين من الشبت الطازج او المجفف تقدرين تجففينه نفس ما علمتكم بالخبرات السابقه نفس عملية تجفيف النعناع المهم بعد ما نغلي الماء عدل مدل يعني يطلع فقاعات من الحراره احط فيه الشبت وملح وبعدين بعد خمس دقايق احط فيه الرز المغسول الغير المستوي خلي كمية الماء عادي كأنك بتسوين رز ابيض الشيلاني المهم اخذي علبة فاصوليا السمراء الصغير اكيد فرفتوه الي في بطنه نقطه سوده هههههههههه ضيفيه اخر شي قبل ما تشخلين الرز وبعدين شخليه وبس بعدين حطي عليه الزيت وخليه يستوي على راحه

يقدم مع دجاج مقلي وبطاطس حلقات ....مع العلم ان الرز بيطلع لونه اخضر ولكن طعمه روعه روعه

هذي الاكله ايرانيه ومعروفه بالبحرين يسمونها شبت لوبيا

العشاء : مرتديلا مع سليس مع المقبلات المناسبه له على حسب الرغبه

الأثنين :

الغداء : قوزي لحم أما اللحم فأسويه بالفرن أهم شي بالقوزي هو تزينه بالمكسرات والبصل المحمر
أما الرز ما احط فيه البهارات استغني عنه بماء مرق اللحم الجاهز بالسوبرماركت

العشاء : فطائر الجبن المالح مع زعتر

الثلاثاء :

الغداء : هامور بالفرن محشي بالكزبره والثوم وصلصة طماط + رز أبيض

العشاء : عندي شواية الشاورما فأسوي شاورما وكل ما اسويه ارسل لجارتي
لأن الكمية تكفي لــ 6 اشخاص واحنا بس اربع ممكن تسونها بدون شوايه

الاربعاء :

الغداء : مندي دجاج اسويه بجدر الضغط عجيييييييييييبه

العشاء : أسبجيتي بكرات اللحم المفروم مع صلصة الطماطم



الخميس :

الغداء : شوربة الذرة مع الدجاج
ستيك مشوي مع صلصة المشروم طبعا سر الخلطه القشطه

العشاء : سندويشات جبن سليس مع طماطم وخيار وخس وبس مصخوها مسكين زوجي ما يقول شي بس عيالي احيانا ما يعجبهم يسون اندومي لاااااااا ويكسرون فيه بيض ما ادري
طالعين على من مثل الفلبينين


الجمعه :

الغداء : مرتـــــــــــــــــــــــــــــــاحه

العشاء : فيليه سمك جاهز بالفريزر مع بطاطس ومقبلات على حسب الرغبه

::::::::::::::::::::::::::::::::::::::::::::::::::


ملاحظه : يا اخواتي مو شرط تسوين الجدول كله لمدة شهر
شوفي ايش يعجبك من الجدول وسويه على اسبوعين يعني الطبخه تاكلونه مرتين
بالشهر على الاقل ...

واي استفسار انا حاظره للطيبين
مع العلم ان احيانا اغير اخذ مثلا طبخة يوم الثلاثاء اغيرها بالثلاثاء الي بعده
بس اهم شي ان كل متوفر عندي لأن فكرة شراء المستلزمات كلها لمدة شهر
يرتب امورك بالطبخ وما عليك الا تجيبين الخضروات بشكل اسبوعي طازج
والخبز او السندويشات كل يوم بيومه يكون افضل اما الفتوش او الخبز المستخدم
للسلطات قصيهم بالمقص بشكل مربعات وجمديهم بالفريزر وما عليك الا تقلينهم

خواتي بالنسبه لطبخات السويت او الحلى
لازم ما تقصرين فيه انا اسوي سويت مرتين بالاسبوع يوم الاثنيث والخميس
هههههههههههه مع اني اكون صايمه ولكن اتحمس من الجوع اني اسويهم واتفنن فيهم


وان شاء الله ما قصرت
والكامل الله سبحانه وتعالى
ولكم جزيل الشكر على حسن المتابعه
تــــــــــــرانيم