أنا لسى عروس وخاني زوجي

السلام عليكم ورحمة الله وبركاته
كيفك خواتي ايش اخباركم
انا عندي مشكله وابي استشيركم فيها
وما ابغى اطول عليكم فيها
انا وزوجي تزوجنا بطريقه تقليديه امه وخواته شافوني وجوا يخطبوني....
وتزوجنا ...
بقولكم اشياء صغيره عني انا ويشهد الله اني حلوه ولدرجه ان اهله يقولون يا بختك فيها يمكن تقولون مغروره لكن يعلم الله ماهو غرور و ان هذا الصدق وخالته دايم تقول وش تبي عندك المزيونه
المهم
كنت في بدايه زواجنا اشوف لهجه زوجي مهيب زي اخوانه تختلف عنهم يعني لهجته حظريه زي مثلا ييت=جيت.... ريولي=رجولي.... كذا يعني هيب زي لهجتنا استغربت منه وسالته قال انا اصحابي كلهم هرجه كذا فوتها في بدايه عرسنا ما احس انه يتلهف علي زي اي عريس ولا يجلس معاي اربعه وعشرين ساعه وفي اول زواجنا كان كثير يتعذر ويقول بخرج لاخواني وماكنت اشوف في عيونه لهفت العريس قلت يمكن كل المعاريس كذا سالت وحده قريبه لي تزوجت في نفس وقت زواجي كانت تقول ان زوجها كل شوي عندها وما يفارقها ودايم يتغزل فيها
وقارنتها بنفسي ما يتغزل فيني ولا يقولي انتي حلوه او جسمك حلو او شي يرفع معنوياتي وكنت اذا جيت من اهلي ما احس انه يتلهف علي اتصل عليه اقوله فينك يقول انا تحت بالمجلس كنت استغرب منه كثير
شكيت بالموضوع وكنت اكذب نفسي
وبحكم اني مدرسة روضه كنت احب اسوي ابداعات في شقتي
كان دائما يجي لغرفة النوم ينبهر فيها كل يوم شكل جديد وكل يوم تغيير
وقلت لازم اجذبه لي وكنت البس لبس واغير في تسريحه شعري وكنت دايم بخور وعطور ولوشنات واسوي عصير او شاهي واتصل عليه اقوله تعال عندي نبغى نجلس شوي مع بعض ويجي يشرب الشاهي او العصير وكنه على نار وينزل تحت للمجلس لدرجه اني جلست اناظر نفسي بالمرايه اقول ليه وش فيني والله والله والله يا بنات ماهي ثقه على الفاضي اقسم بالله اني اقولكم اللي اسمعه من الناس اني مزيونه وجسمي حلو وبيضاء واحافظ على نظافتي الشخصيه والبس ضيق له واغير كل مره له بالستايل حقي لكن ماني قادره اجذبه كنت احسه شبعان من المناظر هذي كنت احس انه شايب او ان حنا متزوجين لنا سنتين او ثلاث وحنا تونا معاريس والله حتى ما كملنا اربع شهور لكن الرجال كان شبعان وشايف اللبس ذا قبل هالمره
وفي يوم من الايام اخذت جواله ابغى ارسل لاهلي رساله لان جوالي مافيه رصيد طبعا هو نايم
ارسلت الرساله لاهلي وبعدين قلت اقراها مره ثانيه ورحت لصندوق الرسائل المرسله لقيت انه مرسل رساله لبنت يبغى يقابلها وانه على نار يبغى يشوفها جنت جوني ومت قهر بس رميت جواله بجمبه ورحت اتمشى بالصاله لين اهدى شوي واعرف افكر اتصلت على اختي وقلتلها دقي علي بسرعه واتصلت وعطيتها رقم البنت وقلت تاكدي انها بنت واتصلت وطلعت بنت تمالكت اعصابي ورحت وزينت الشقه ورتبتها واخذت ملابسي طبعا موب كلها عشان مايشك ورحت وجلست بجمبه وقعدته من النوم وقلتله يا فلان انا جاك مني غلط قال لا قلت طيب جاك مني قصور قالي لا قلتله انا في يوم من الايام شفتني شينه قال لا قلت شفتني مهمله بنفسي قال لا

قلت طيب تذكر اني في يوم من الايام حبيتك من جد واتصلت على اهلي وجاني السواق
ويوم رحت من شقتي لاهلي ارسلت له رساله وقلتله سلملي على صاحبتك وقلها انك على نار
المهم يا بنات اني زعلت عليه وجلس يدق ويتوسل واعترف ان ذي بنت يعرفها من مده وان يكلمها بس عمره ما خرج معاها وانا ماني مصدقته لانه دايم كان يقولي انه مهوب زي الشباب اللي يخربطون وانه لو يبغى يخربط كان سوى زي الشباب وانه شريف وانه وانه وانه....
المهم
جلس يحلف ويتوسل انه ماعاد يكررها وانه تاب وجلس يسب فيها ويقول انه يتسلى فيها واني انا بكون ام عياله وانه يدق عليها من ورى اهلها وانه اخذني من ابوي واهلي لاني اصيله لكن هي قليلة اصل ويحلف باهله وامه وابوه انه مايكررها وبعدين رجعت له لكن المشكله يا بنات اني ماني قادره انسى خيانته لي وانا عروس ولا قادره اصفي قلبي له وحرام اظلمه هو كويس ويحاول يسعدني ويقدم لي اي حاجه ابيها لكن قلبي ما صفى له واذا خرج او اتصلت عليه اشك فيه
وش الحل يا بنات
وهو كان كويس معاي قبل وبعد خيانته لكن قبل خيانته كنت استمتع اذا خرجنا مع بعض او اخذني من اهلي الان صرت اشك فيه كثير واكذبه اذا قالي انه يحبني
ابي رايكم فيه؟؟؟
وابي رايكم في رجعتي له

وابي رايكم بالقصه كلها
وشكرا