صديقاتى والغيرة تصل للحقد

بنات انا عندى مشكلة بدات تتزايد الفترة اللى فاتت حتى وصلت لقطع علاقاتى بكل صديقاتى
انا تزوجت من سنة تقريبا
وقبل الزواج كانت حياتى كلها شغل وخروج مع صديقاتى البنات
وكانت ظروفنا متشابهة كل واحدة فينا بتحلم بالزواج كاى بنت طبيعية
انا كنت مترتبطة بزوجى قبل الزواج تعرفت عليه فى الجامعة وكان بينا قصة حب
والمتعارف عليه فى مجتمعنا الغريب ده ان العلاقات دى غالبا بتنتهى بالفشل
لكن ثقتى فى هذا الشخص وفى تربيته جعلتنى استمر معه حتى تزوجنا
اصبح لصديقاتى نظرة مختلفة تجاهى كلهم بيحسدونى لانى تزوجت رجل احبه
وهما علاقاتهم انتهت بالفشل
وكتير منهم سنهم ما بين 25 الى 30 سنة
عدد صديقاتى 7 بنات منهم 1 متزوجة و1 مطلقة والباقى بنات مش مخطوبين
انا عايشة فى شقة عادية جدا يعنى مش فيلا ولا قصر
زوجى عنده سيارة عادية يعنى مش فخمة بى ام ولا مرسيدس
ومع ذلك صديقاتى بينظرو لى على انى محظوظة
ولما عرفو انى حامل تحولت الغيرة لحقد
وبداو يبعدو عنى
وكأنى شئ بيثير استفزازهم وعصبيتهم
مبقاش فى حد منهم بيكلمنى
وبدات اسمع من زوجى كلام سخيف عنهم دايما يقولى ( اصحابك اندال مش بيعبروكى ولا بيسالو عنك )
وانا كنت ادافع عنهم واقوله انهم مشغولين فى حياتهم الخاصة

وبدات اتصل بيهم
مش بيردو عليا ولا بيزورونى فى البيت
حتى صديقتى المطلقة دايما تقولى يا بختك انتى متجوزة وليكى بيت ومستقرة وانا عايشة مع اهلى وكانى مذلولة
والله بكيت من كلامها
وصديقتى التانية المتزوجة جوزها مسافر امريكا وتحب تخرج للكافيهات كل يوم ومش بترضى تزورنى فى البيت
هى دى اخرة الصداقة اللى دامت سنين
والله حزنت
زوجى دايما فى الشغل او مع اصدقائه
ولو قعد فى البيت بيفضل يعلق على كل تصرفاتى وكل شئ فى البيت ينتقده

الحمل والوحدة تعبونى
ومفيش غيركم ممكن يساعدنى
هل اعاود الاتصال بصديقاتى مرة تانية ؟
للعلم انا بتصل بامى واخواتى كل يوم لكن اكيد انتو عارفين ان كل بنت بتحتا لصديقة وفية تقف معاها وتحس بمشاكلها
وانا حاسة انى عايشة لوحدى
ياريتكم تساعدونى