طيفن بعيني طاف .. والناس غرقا

طيفن بعيني طاف .. والناس غرقا
فالنوم . واحرمها الكرا طيف الاحباب
لج الهوى بي .. من جنوب وشرقا
ونشقت عرفن طاب من فوق الاطياب
حبه رقا من ضامري .. كل مرقا
له في سويداء القلب .. قصرن ومرقاب
له وشمتن في لبة القلب ... زرقا
وشم المحبة ينتقض كل ما طاب
كل جروحه تنتداوى وترقا
وأنا على رقيه تزايد ولو طاب
قربه معيش وإن بدا منه فرقا
عفت المنام وطيب عيشي والاشراب
والله لولا الخوف من حضر ورقا
يدرون بأسراري تعاريف الاجناب
لأقحص على طولي على الرجم وأرقا
وأنوح من حبه واجدع للأسلاب
يا رب تجمع بعد بعده بتلقا
وتلمني وياه .... يا رب الأرباب
من صاحب شرواه ما عاد نلقا
فالقوم من كل الطرايف والاصحاب
هو نقوتي من جملة الناس طبقا
لو قيل خذهم وأتركه قلت ما ناب
مانيب من يجزا الحساني إبدرقا
أيضآ ولا ينسى عشيره إليا غاب
حبه صبغ فالقلب طرقن بطرقا
فلو محيته بأزرق الدمع ما ذاب
محبته فالقلب تصعد وترقا
لو غاب له زولن عن العين ما غاب
فإليا طرا لي طيب عيشن وملقا
معه يشيب القلب من غير ما شاب
لعل كل أرضن يطا فيه تسقى
تنبت فيافيها قوارير الأعشاب
خلن وطيب بطيبه ونشقا
من حادث الدنيا إليا ناب له ناب
فأمنن على قلبن ملكته بعتقا
لا ناسين عبدك ولا الغير له جاب
وأعذر وسامحني ترى القلب مشقا
وواصل وصلك الله مع كل الاسباب
وصلاة من يفني الخلايق ويبقى
على رسول الله وآله والأصحاب