إفشاء الاسرار الزوجية ! حلقة للنقاش !

اعتقد ثنتين طرحنا اليوم مواضيع حساسة
في راي ان المراه اللي تتكلم عن زوجها وعن حياتهم الزوجية الخاصة بشكل خاص ما تستحق اني اعطيها بال
و بصراحة أكثر شفت حريم كثير من هذا النوع وموبس كذا فيه وحده تطرق لموضوع وصفت فيه " جسم زوجها " آآآآآآآآسفة على الكلمة بس و الله انا لما قالت كذا راح وجهي ألوان وبصراحة احتقرتها جداً

انا ما احب الزوجة اللي تتكلم كثير عن حياتها الزوجية العادية " اكلنا ,, خرجنا ,, قالي و قلتله ....إلخ " فما بالك اللي تتعمق اكثر

عن نفسي احب يكون اللي بيني و بين زوجي ملك لي حتى لو كان بسيط طالما عرفو الناس او ما عرفو ما راح يستفيدون شي غير اني دخلتهم في تفاصيل حياتي ....


جزااااااااااااااااااك الله خيـــــــــــــــــــــر
تحياااااااااااتي للجميـــــــــــــع

ترانيم ، افكارنا تتشابه !

انا مثلك ، بثيرون غضبي الل يتكلمون عن حياتهم مثل ماذكرتي ( شو قال زوجي و شو قلت له ) ! ..

اعتقد اللي جذي بعضهم يكذبون او يبالغون و يخلقون اشياء ما تصير بحياتهم او يمارسون الرياء على اصوله ! ..

كثير بنات يعتقدون ان الرجال للمفخرة و بس .. و تظل تتكلم لك عنه و عن محاسنه ! ..

طيب انا مالي علاقة ! عندي زوجيو الحمدلله ..

لا وتجيك وحدة بعد كل كلمة و قالت ( زوجي ) .. مثلا اتكلم عن الثياب .. قالت زوجي قال كذا ! ..

هالعدد من الزيارات ! و لا رد ثاني ؟ !!

اذا دل على شي ، بيدل على انه مافيه حد يفشي اسرار بمجتمعاتكم !

الحمدلله !

مرحبا اختي انثى
والله طرحتي موضوع حساس وااايد..الحمدلله ما صرت بهالموقف قبل وما اتمنى اقعد مع ناس واسمع مثل هالكلام

بالعكس انا اشوف اللي تتكلم عن مشاكلها و كل علاقتها بزوجها ما عندها سالفة...ولما تروحين اهني حق ركن قضايا وحلول تلاقين مصايب!!
استغرب شلون الوحدة تفصل حياتها مع زوجها...وين الخصوصية؟؟ حتى لو ناس ما اعرفهم او يعرفوني
الموضوع غلط..ومهما كان لازم اللي يصير بين الزوج و زوجته من حلو او مر يظل بينهم بس
هذا رايي ..

شوق .. اسعدني وجودك الحلو !! ..

ان شاء الله ماتلتقين بمثل الناس اللي التقي فيهم ! ..

الموضوع تم طرحه سابقا
ولكن اشكرج على طرحه مرة اخرى
لان الموضوع وهو افشاء اسرار العلاقة الزوجيه كثر بين البنات والنساء
اولا
شرعا لايجوز وحرام ولعنة من رب العالمين
لاحول ولا قوة الا بالله

ثانيا
هذا زوجي شلون اتكلم عنه بين النساء يمكن تعجب فيه اختي والا صديقتي

والله يهدي الجميع يارب


دمتم سالمين
اختكم شريفة

لاء ما يجوز صراحة وملعونة اللي تقول شنو يصير بالفراش بينها

اما السوالف العادية مثل زفني او وداني او قالي لا تلبسين جذيه اتوقعها عادية هم الوحدة لازم اتقول عيوب زوجها عشان توخر الحسد عنها

وسلامتج

طبعا مااوافق ..او ارفض بشدة .. وبالفعل انحرج بشكل غير طبيعي من للي يتكلمون بأمور الخاصة بين الزوجين..

شوفي على اني متزوجة والحمدلله لكن اذا اجتمعت مع المتزوجات سواء حريم اعمامي او عماتي او بناتهم المتزوجات والله اني احس بنفسي للحين عذراء ..
لاني مستحيل اتكلم مثلهم وبجرائتهم ...

اما السوالف العادية .. اي عادي اتكلم مع الكل مثلا رحنا جينا ذاك اليوم صادنا موقف وزوجي عمل كذا وكذا الاشياء العادية جدا ..
لكن امور الفراش مستحيل مستحيل مستحيل حتى اقولها لأمي اقرب لناس ...


مشكورة عزيزتي

شريفة ،، أسعدني حضورك .. الحمدلله على نعمة الاسلام .. ذكرتي شغلة حلوة ، انه لما تتكلم الزوجة عن زوجها راح تلفت الانظار عليه و ممكن انهم يعجبون فيه ، و كثير مشاكل جذي ، اللي الصديقة تسرق زوج صديقتهها مثلا و العياذ بالله !

توتة ام حمودي ،، حبيبتي الله يكثر من امثالك .. !

حرم السويدي ،، يعجبني رأيك ! ،، و خلك دايما بعيدة عن اللي يتكلمون في أمورهم الخاصة !

و اشكر لكم مروركم !

السلام عليكم....

شكرا على طرح الموضوع لأنه واااااايد حساس....
هالشي مايجوز اصلا الوحدة تتكلم فيها لأي شخص كان لأنها اسرار بينها وبين زوجها ....
صراحه صادفني مثل هالموقف ايام الدراسه في الكليه وحده الله يستر عليها يالسه وصديقاتها وياها وقعد اتقول شو استوى بينها وبين زوجها في ليلة الدخلة ..... كنت في ذيج الوقت بنت ما اعرف بس قلتلها كلمة انه ما يجوز اللي يالسه اتسوينه او اتقوليه عيييييييييييييييب بس هيه قاللتلي انتي بنت رجعيه وما تفهمين شي ....
بس طبعا مايلست وياهم ولا كلمتها مره ثانيه مع انها كانت صديقتي...
استغرب من هالحريم ييلسون ويرمسون ولا جنه شي خاص بينها وبين زوجها جنه يالسه اتسولف سالفه عاديه ولا المشكله الكل آذان صاغيه اللي يقول انها اتقول كلام مفيد......وويضحكون وكانه شي مسلي.....
قهر منهم بس لازم يعرفون بيي يوم حساب..


لأنج طرحتي هالموضوع أنا بقول وفي رجال بعد ييلسون ويتكلمون عن اللي يصير بينه وبين زوجته... ولا ويفصل كل شي.....ويتكلم عن لبسها يوصف جسمها و و و و و و ....... وشو صار في الفراش .....
واللي يتكلم عن ولادة زوجته وعن ما بعد الولادة ....شو صار وشو يستوي....

والله حرااااااااااااااااااااااام مايجوز ولعنة رب العالمين...
حسبي الله ونعم الوكيل .... وين الخوف من الله....
.... وانقرف واحتقر الا يتكلم عن الاسرار الزوجيه سواء امرأة كانت او رجل....

هالموضوع لازم اوريه صاحبتي

يمكن تتوقف عن افشاء كل كبيره وصغيره بينها وبين زوجها


والله حتى واني اقولها عيب ومايجوز والمصيبه هي تعرف هالشي بس طبعها


تتكلم بكل شي .... وأما عن نفسي فالله الحمد ساتره على زوجي كل حسناته وسيئاته

وافعاله ووووالخ


ما عدا الامور العاديه جدا جدا اللي ماتعتبر سر من أسرار حياتنا


تسلمين عالموضوع عزيزتي انثى

فعلا اختي انثى الموضوع حساس جدا لا يجوز الكلام ولا كشف اسرار الزوجين والزوجين اللي ينشرو اسرارهم برا البيت هما من شر الناس عند الله كما قال رسول الله عليه الصلاة والسلام ( إن من شر الناس عند الله منزلة يوم القيامة الرجل يفضي إلى امرأته وتفضي إليه ثم ينشر سرها )رواه مسلم
شكرا على طرحك الموضوع
تحيــــــــــــاتي

أم الحارث .. حبيت وجودك بموضوعي !!

بكلامك لفت نظري رد صديقتك لما قالت انتي رجعية ! ..

انا على ثقة انها بقرارة نفسها تعرف بالخطأ اللي تسويه ! بس هاي نزوة ، الشيطان يمشيها ! و لما قالت لك رجعية ، حتى ما تحرج نفسها معك مالقت غير هالكلمة .. الحمدلله انك نصحتيها ، و الاهم انك ابتعدتي عنها !

و عن الرجال اللي يتكلمون عن حريمهم ، والله انك جبتيها ! .. تصدقين اني اتضايق اكثر لما اسمع ان فلان يتكلم عن زوجته ! .. يمكن لاني أنثى ، فما يرضيني ان الرجال يوصف زوجته ! .. بس من جد يقشعر بدني و اظل افكر لايام باللي سمعته !

سبحان الله ، الله خلقنا اطهار و قلوبنا نظيفة .. تأثر فينا مثل هالقذارات ! ..

واعتقد ان اي رجال او حرمة تتكلم بأسرار بيتها ، مستحيل يكون فيه حب ! .. بين الزوجة و الزوج طبعا ! ..

يارب يبعدنا عن هالمآسي !

بنونة .. تسلمين حبيبتي عالمرور .. و فعلا شوفي صديقتك و عطيها و نصحيها على قد ماتقدرين ، لان المعروف انه بالمسنجر مثلا اسهل من انك تكلميها وجها لوجه ! احيانا تخافين يصير احراج منك او منها ! و راح يكون بميزان حسناتك ! .. وفقك الله اختي !

الاخت yasimine_2007 جزاك الله خير على اضافة الحديث الشريف للنبي ص .. !

يستدل فيه النبي ص على عظمة ذنب افشاء الاسرار الزوجية عند الله ! .. أسفا على اللي يتمازحون و يتسلون بالحديث عن هالامور و هي تغضب الرب اولا و آخرا ! ..

بالانتظار !

انا معكم اسرار الحياة الزوجية ممنوع تخرج بريت البيت لانه ده خطا كبير

لانه يمكن حيكون وراه خراب بيوت. متل فلان ديه تحكي عن الي بصير بينها وبين زوجها

اصلا ديه مش حياة ديه ثرثاره ما بتحفظ شي حتى اسرار بيتها الي متلها ممنوع ينقعد معها ويعطيها سر

اذا سر بيتها كشفته .....كيف حيكون سر غيرها والمقربات منها

المراة الاصيلة: هي بتحفظ وترعى شؤون بيتها واهل زوجها حتى .

والي بصير بينها وبين زوجها حتى لامها ممنوع تشكيه وتفضحه.. مش كده ولا لأ

شكرا على موضوعك المميز وعلى النقاش المهم لكل امراة

مع تحياتي:فاتنة المنتدى

فاتنة المنتدى ، رأيك حلو .. و فعلا ، الحياة الزوجية لها خصوصية كبيرة بحيث انه حتى الام ماتعرف شي !

مرة حضرت محاضرة الى رجل دين ، ينبه فيها البنات من الشكوى على الزوج ! الا في الحالات الاضطرارية جدا ! ..

هذا دليل على خطورة التكلم في الشؤون الزوجية !