مشكلتي مالها حل مع امي.. وزوج اختي.. وزوجي.. ساعدوني..

السلام عليكم

انا ع طول بادش في الموضوع لانه طويل

بدايه زواجي انا انخطبت عن طريق زوج اختي يعني زوجي يصير صديق زوج اختي وهو شافني بالمطار وانعجب فيني وخطبني

المهم صارت مشاكل في الخطوبه ع الملكه وين بتكوون وشنو نسوي كل هالامور كان زوج اختي يتحكم فيها من صغيرها لين كبيرها وولا احد من اهلي يقدر يتكلم او يرده حتى مهري والشروط هو الي حددها بدون ما يستشيرني المهم سكت عن الموضوع وقلت ماعليش وفتره خطوبتي كانت 5 شهور

وقبل اسبوع من زواجي صارت مشكله اتفه منها ماشفت دمرت عيشتي شنو صااار؟؟؟ اختي وزوجها ارقامهم متشاببهه واعتقد ان اختي بالغلط اعطت اخت زوجي رقم زوجها او ان اخت زوجي سجلت بالغلط الله اعلم !! المهم قبل اسبوع من زواجي اختي شافت ان اخت زوجي متصله حق زووووجها 5 مرات وقامت اختي وقومت القيامه ياتني سألتي مو هذي رقم اخت زوجج قلت لها اي قالت اانا لازم اتصل لها واسنعها مع ان البنت ماتصلت مره ثانيه ويوم اتصلو لها ماردت يعني ماكلمته كلش المهم قلت لها لا لاتسويين جي عشاني ترى انا بتخترب حياتي وزوجها قالي لا مابخليها عاد وهو نايم راحت ارسلت لها مسج وقالت لها" فلانه انتي ليش متصله ع تلفون زوجي ووش تبين فيه وهذي اخر مره احصل رقمج في جواله" المرسل اخت فلانه >>اناااا وبس البنت اسكتت بس ماقدرت تكتم نفسها اكثر لانها مظلومه وقالت حق امها وامها قالت حق زوجي وهو عصب وجا بيتنا وكلم ابوي واخوي وترى زوجي عصبي وعصب عليهم وقالهم بنتكم غلطت ع اختي وطعنت في شرفها وهو يصارخ ومعصب قام ابوي قال انا مالي دخل كلم زوجها وابوي اتصل له وزوجي كلمه وقال له انت شنو اتظن اختي تلاحقك؟؟ زوج اختي قال اي تلاحقني وهذاك عصب بعد وكل واحد سب الثاني وسكروا الجوال واتصلي زوج اختي سبني وقالي لازم تتطلقين وبعدها اتصل حق ابوي وابوي معاه بعد وكانوا بيطلقونا بدون استشارتي وبعدها امنعوني اكلمه واشوفه وولا احد واقف معاي وانا تعبت نفسيا ومنها مايكلمون بعض زوجي وزوج اختي مع انهم كانو اصدقاء روح بالروووح

وبس ابتدت المشاكل امي كرهت زوجي وماتعامله عدل ولا تحبه وكانوا بيطلقووونه لكن الي منعهم ان زوجي كان داخل علي طبعا في عقد زواج لا يروح مخكم بعيد وانا ماقدرت امنعه من حقه ولما عرفو هذا الشي قالو مافي الا يتزوجج وبعدها يطلقج يبونه يطلقني لانه تهاوش مع ريل اختي

ومع ان بالنسبه لي اختي هي الغلطانه لكن اهلي مايرضوون اقول لهم هالشي وامي هددتني وانا مابجي عرسج واختي قالت انا متبريه منج وانتي مو اختي ولا اعرفج وحصلت كلام جارحني لها اليوم

وبعد ماتزوجنا كانت المشاكل ورانا ورانا وغير كذا مع ان زوجي مو غلطان بس عشاني وعشان هو يحب صديقه ظل يتصل له عشان يعتذر له وذاك مايرد عليه وابو زوجي اتصل له بعد وهو ماقدر ان رجل كبير في السن متصل له عشان يعتذر له هو وولده وولا رد عليهم وزوجي راح له لين مكانه عشان يعتذر له وهو كان يتهرب منه مع العلم ان زوج اختي قطري وعايشين هناك يعني زوجي تعنى من البحرين لين قطر عشان يصلح العلاقات لكن هو ماايبي الخير ابد

وبس ومن بعدها بدت المشاكل وزوجي قال ما ابيج تكلمينه وزوج اختي منع اختي تجي بيتي وماعطي امر حق اهلي اذا زوجته موجوده في البحرين لازم زوجي مايدخل بيتنا وهم نفذو له طلبه وانا وزوجي متحملين كل هالظلم والاهانات وغير استقبال اهلي لزوجي كلش مو شي وخصوصا امي لانها كانت تشجع اختي انها تاخذ حقها من اخت زوجي وجات فتره امي طلبت اروح قطر معاها عشان افاجأ اختي بروحتي لها وزوجي رغم جرحه وافق عشان يعدل العلاقات ورحت وانا هناك كنت اكلم زوجي وقالي سلمي ع زوج اختج وقولي له متى بيجينا البحرين تعرفون شنو رد علي؟؟ قالي: قلبو وجوهكم انتي وزوجج انا لا ابيه ولا ابي اجي البحرين مدام فيها هالاشكال امثال زوجج وغيره كلام جرحني وانا نفس الوقت بكيت وكان بكل برود يضحك علي وبعدين امي كلمتني وقلت لها انتي ليش مادافعتي عني قالت لي هو مو غلطان زوجج غلطان ويستاهل قلت لها انا بنتج قالت لي زوج اختج ع راسي وانت وزوجج تحت رجولي ومن القهر قلت لها انا اكرهج تفضلين واحد غريب ع حشاشه يوفج قالت لي واتبرى منج بعد!!!!!!!

وانا بدووون حوااااس قمت اصرخ واصيح واخوي الصغير يضمني ويصيح وانا اضربه بدون احساس ليما اغمى علي.. وبس ومن بعد ماعرف زوجي السالفه قال انا مو مستعد اخسرج عشان انسان مايستاهل تراب رجلج ما ابيج تكلمينه ولا تشوفينه ولا تروحين بيته

وبس ولما امي عرفت هالشي سوت لي مشاكل ليش اني اسمع كلام زوجي وظلت كل مره تجبرني اتصل له واكلمه بدون علم زوجي وهذا الشي يضايقني لكني حاليا ما اجيب حتى طاريه وامي كل ما تشوفني تسب وتلعن في زوجي واذا يزورها تكشر في وججهه وماتكلمه وتقولي انا في كل صلاه ادعي ع زوجج الله لا يوفقه في حياته لانه ظلمنا وظلم اختج ودعوه الام مستجابه وشكثر كلامها يجرحني وتدعي عليه وتسبه قدامي ماتحس انه زوجي عزيز علي وبيكون ابو عيالي يعني لو دعت عليه انا بنتها بتضرر

ولين هاليوم تكرهه واذا زوج اختي يتصل لها تقوله هلا حبيبي هلا وغلا بالغالي من الكلام الحلو واذا زوجي اتصل ترد بكل جفاف .. نعم.. مع العلم زوجي انا مرتاحه معاه ومو مقصر معاي وعلى رغم مضايقاتهم له لكنه يجرب نفسه بس بدوون جدوى

ولما كانوا بيطلقووونا قال كلام مانسيته انا احبج ومستحيل اطلقج لو كلفني هالشي عمري كله ولا اتخيل وحده غيرج زوجه لي وصح قول وفعل ما تنازل ولا تخلى عني واهله وقفو معاي لدرجه وصلو لبيتنا يترجوون اهلي ان مايطلقوني من ولدهم لانهم حبوني مثل بنتهم

شوفو آخر زمن اهل زوجي وقفو معاي واهلي ضدي وغير جذي اختي كانت في عرسي مثل الغريبه وزوجها مانع عيالها يشوفون زوجي وكأنه مجرم اسم الله عليه وصار سنه من زواجي واختي ولا مره زارتني في بيتي وزوجها حتى ما ارسل مسج وقال مبروك.. وامي مافكرت فيني او راحت عدلت شقتي او بخرتها وكل شي ام زوجي سوته لي وبعد ماتزوجت ام زوجي هي الي ودتني اتشرى وعلمتني شاسوي ووما اسوي وامي ما سألت فيني حتى بيتي هي ماتدخله

وانا مو عارفه كيف اراضي امي هي تكرره زوجي كره العالمين لكنها تجاملني وتجامله اذا كنا عندهم وحتى تكرره اهل زوجي وماتحب اتكلم عنهم في شي وانا ام زوجي انسانه مصليه وخايفه ربها وهي مغربيه ومن كره امي لزوجي واهله صارت تكره حتى المغرب الي هي ديره ام زوجي..


بكتب معلومه عن اخت زوجي انها انسانه شريفه ومتربيه وماعندها سوالف شباب وخرابيط والله شاهد ع كلامي

ادري مشكلتي مالها حل وصعبه وانا نفسيا تعبت حلم حياتي الي هو حفله عرسي ماتهنيت فيها وما احب حتى افتح البوم صوري واذا فتحت عيوني ماتوقف من الدموع...:tears:

بكل صراحه ابي كل وحده فيكم تذكر لي بعد ماقرت السالفه منهو الغلطان عشان ما اكون ظالمه احد..

اسفه طولت عليكم
ادعولي الله يرزقني الذريه الصالحه المعافاه.. وجزاكم الله الف خير

تقبلو تحياتي
الحب الكبير