قصة ولادتي

وحشتوووووني واليوم جايه لكم بقصة ولادتي ...:21_207:


المفروض اولد بتاريخ 31/10/2007 ، وتاخرت عن موعد الولاده ، وبنفس الفترة زوجي كان لازم يسوي عمليه وأجلها ثلاث مرات ، لأنه كان يخاف يسويها واولد انا بنفس الفترة بس لأنه لا جدوله ولا جدول الطبيب يسمح انهم يأجلون العمليه أكثر ، قرر يسوي العمليه بتاريخ 5/11/2006، الصبح جهزت له شنطته للمستشفى وراح ، وطول الوقت اتصل فيه ابي اتطمن عليه اذا دخل العمليه او لا ، بس تلفونه مسكر، وعرفت انه في العمليه ، دزيت له مسج العصر اساله عن حاله ، ورد عليي بمسج لأنه ماكان يقدر يتكلم ... مرينا عليه المغرب مع عمي وعمتي ( والدين زوجي ) وبنتي واخوه واخته ... وطول فترة الزياره وانا احس بالم يروح ويجي كل 22 دقيقه تقريبا ، قلت هذي ريح استقبال لأنها كانت تجي طول الاسبوع وتروووح ..

المهم طلعنا من عند زوجي ومرينا على حماتي ( اخت زوجي اللي اكبر منه ) قعدنا شوي وطلعنا شرينا عشا وحنا راجعين البيت ... :gum:

كان عندي جم شغله بالبيت قعدت اسويهم ، الثياب طويتها وبنتي جهزتها للنوم وكنت الاحظ الالم لا يزال كل ثلث ساعه تقريبا بس كل ما له يقوى ..

قلت لنفسي، خل اقوم انام احسن لي ولاحقه على الشغل، حطيت راسي على المخده الساعه 12 تقريبا وقعدت الساعه 2ونص من قوة الالم ، قمت اتمشى في الشقة وادلك بطني بشكل دائري ومن يجي الألم اوقف بمكاني واتعصر والمدة بين الألم والثاني كلما لها تقل ..:qaq:

قلت ان شاء الله الحق على اذان الفجر ، اصلي الفجر وبعدين بروح لعمي وعمتي بس من قوة الالم ما كنت اقدر اصبر ، باقي على الاذان 5 دقايق احسهم دهر ، رحت ودقيت على عمي وعمتي الباب ، طلعت لي عمتي وقلت لها ، عمه ابي اروح المستشفى ، ردت علي : الحين !! ، قلت لها أي الحين ، ما اقدر اصبر ... واني اتعصر من الألم ...

المهم ، قعدت عمي ، ولبسوا واني لبست وحملت وياي شنطتي للمستشفى وماي مقري عليه آيات ، وحنا في الطريق للمستشفى و أذان الفجر يأذن الساعه 4:30 فجرا ، الصراحه جو عجييييييييييب بس الألم اللي ماخذني كنت امسك في مسكة الباب واعتصر كلما جى الالم ، فتح لي عمي الدريشه عشان الهوا يبرد علي ويخفف شوي من الألم واني في عالم ثاني بنص الطريق شربت من الماي وقريب نهايته بعد ... لي ما وصلنا المستشفى الساعه 4:55 ، فتحوا لي باب السياره وجابوا لي الكرسي المتحرك Wheelchair بس من الألم مو قادره حتى انزل من السياره..

نزلت واخذوني الممرضات، وسيده فحصوني ، واسمعهم يكلمون بعض ، تقول واصله 6 ، فقالت لي بدلي ثيابش، وسيده على غرفة الولاده ، وهناك قعدوني على سرير الولاده وفحصوا مره ثانيه سمعتهم يقولون 9 واني مو متحمله الألم وحطوا لي السيلان في اليد، كنت اقول لهم احس اني امبي ادفع، فقالت لي ممرضه بحرينية هناك دفعي، هذا كيس الماي يبي ينبط، وبس سويت اممممممممممم وينبط الماي ، وناديتهم ، الماي انبط ( طبعا بالانجليزي لأنهم اجنبيات ) وجت لي دكتورة تقول لي يالله دفعي، اقول لها ما اقدر ما اتحمل الالم وهي تقول لا اكو كلش قريب البيبي بس دفعي، حاولت وحاولت و الالم ذابحني ، قلت لها شقي ( قصي ) لي قالت لا ما تحتاجين شق انتي واصله خلاص ..

وعصرت في عمري ودفعت وحسيت براس البيبي طلع، وضربوني ابره في فخذي اليسار، واستمريت في الدفع ليما شرفت ( ليلى ) وسمعتها تصييييييح واني كنت اصيح واقول لها، ماما تعبتيني ...وكانت الساعه 5:20 صباحا.بتاريخ 6/11/2007..

واخذوها ينظفونها ويسوون لها الفحص الاولي ، وكملوا شغلهم وياي ، سحبوا المشيمه ( وشفتهم وهم يحطونها في كيس ) شوي والا الدكتورة تبي تخيط، اشوف في يدها خيط وابره، سألتها ، انا تشققت ؟؟!! ، قالت أي شوي وكانت بتخيط، طلبت منها تحط مخدر موضعي، ومع انها حطت كميه الا اني كنت احس بالعمليه كلها والاكثر كنت واعيه واشوفها تخيط...

المهم لما خلصت من الخياط خلوني اريح شوي ومن نافذة الغرفه كنت اشوف الدنيا وهي تنور شوي شوي و ودوني غرفة النقاهه، ولما اخذوني بيودوني لسريري ، خلو ليلى في حضني وشافني عمي وعمتي وتحمدوا لي بالسلامه

وتوقعوا من دخل وراهم ؟؟ زوجي ( انا هني ما قدرت امسك نفسي وبكيت ، انو اجا لي من الصبح وهو مسوي عمليه ولازم يرتاح ) على كثر ما تضايقت اني كنت اولد وهو موجنبي على كثر ما فرحت بوجوده معاي في ذيك اللحظه ..

اما عن الخياط تضايقت لما عرفت انه ما كان نفس المكان اللي صار في ولادتي الاولى، غير انه كان على جهتين ، يعني شغله عويصه شوي بس الحمدلله والشكر له انه ما كان يألم في الحركه مثل ولادتي الأولى ...

وللأسف ما لقينا غرفه خاصه ، بس طيبة الممرضات طول فترة رقادي بالمستشفى ( يومين ) هونت كثييييييييير علي وبالعكس حبيتهم :)


وتوته توته خلصت الحدوته