الحقواااااااا علي انا بمصيبه!!!!!!! << ظروري الكل يدخل ويساعدني

السلام عليكم ورحمة الله وبركاته


انا ادري اني بعد ما اقول لكم عن مشكلتي او بمعنى الاصح مصيبتي راح اطيح من عينكم
بس مالي احد غيركم اشكيله .. البارحه طول الوقت اصيح وما اقول غير كلمة يارب
الله يخليكم ساعدوني مالي غيركم وانا نفسيتي تعبااااااااااااااانه مو قادره افكر

راح اقول لكم قصتي مختصرة علشان تساعدوني وتشوفون لي حل
من سنتين ونص تقريباً تعرفت على شاب كان ضايفني على المسن وكنت بوقتها ما اعرف
شي بالنت وتوني يديده عليه .. كنت ادخل النت بس علشان بحوث الجامعه والمسن ادخله
بالعطلات علشان اتكلم مع رفيجاتي ونضيع وقت

المهم .. انا بطبيعتي مالي نيه يعني ساذجه وما استوعب الشي من اول ما ينقال
يمكن لان الكلام يكون جديد علي ويمكن بسبب صغر سني (انا عمري الحين 21 سنه)
يعني قبل سنتين ونص كان عمري 18 سنه ونص يعني بالمختصر المفيد ياهل

المهم على كلام هالشاب انه حبني بس انا كنت عاديه ما احس ناحيته باي شعوي
بس كنت اكلمه عادي عالمسن (سوالف عاديه اشلونج شخبارج ويا الجامعه وخلاص نسكت)
لاني اكلم رفيجاتي بنفس الوقت (عالمسن طبعا) المهم بعدها بفتره قالي كلام انصدمت
منه واستغربت .. سألني شنو لابسه وتعالي وما اعرف شنو بس انا كنت اسكت من الصدمه
لين بالاخير لمن افقت منها قلت له انت انسان مريض .. وقتها عصب وقالي ماراح اسامحج
ليوم الدين ومن هالكلام وطلع .. انا من صدمتي ولاني ما عرفت اتصرف كلمت وحده
كانت معاي بمنتدى (اهي اكبر مني بس الله العالم انها كانت تتمنالي الخير واحبها من قلبي)
طرشت لها رساله وعطتني ايميلها وكتبت لها اللي صارلي ودزيته لها بالايميل

بعدها بفتره ولاني ما احب احد يزعل علي ويحط بخاطره ماكنت قادره انسى كلمة انه ماراح
يسامحني مع ان كان المفروض ما افتكر لاني انا الصح .. بس دزيت له رساله واعتذرت منه
وسجلت بمنتداه الخاص وتميت اشارك بس من غير ما اكلمه على المسن

المهم بعد فتره وبطريقته الخاصه واهتمامه الكبير فيني بديت احس بمشاعر ناحيته
ما ادري اذا كانت حب او اني كنت اوهم نفسي بالحب لان في شخص مهتم فيني

اللي صار اني تعلقت فيه وكان يطلب رقم موبايلي بس ما كنت ارضى وكان كل اللي يعرفه
عني اسمي ومن أي دولة (انا من دولة واهو من دولة خليجيه ثانيه)

المهم مع الوقت والاحداث غلطت غلطت عمري .. وعطيته رقم موبايلي بس والله العظيم
احلف لكم بربي ان اللي بينا كان بس مسجات ما كنت ارضى اكلمه عالموبايل
مع انه كان يحاول انه يتصل بس ماكنت ارد عليه وكنت اسكره بويهه او احطه سايلنت
اهي يمكن 3 او 4 مرات اللي كلمته بس كانت لدقايق وما كنت اتكلم بس اهو اللي يتكلم
وانا ارد عليه باي او لا واني ابي اسكر

المهم تميت على هالحالة سنه بالضبط اتواصل معاه عالمسن والمسجات لا اكثر
بس بوطبيع ما ييوز عن طبعه .. كان دائما الخلاف بكل مره اكلمه عالمسن او اتهاوش
معاه بالمسجات اهو الطلب اللي يطلبه مني وكنت دائما ارفضه وافهمه انه يجرحني بهالاسلوب
كان يطلب مني صور لي ويسألني شنو لابسه وغيره

في مره ولاني كنت خايفه من زعله طرشت له صورة صغيره لي بالايميل وخليته يحلف لي انه
مسحها وسوا لها دليت من كمبيوتره وحتى الريسايكل بن اللي بالكمبيوتر

بعد هالسنه صارت علاقتنا فاتره مو مثل قبل بسبب المشاكل اللي تصير من بينا واني ما ارضى
اسايره باللي يطلبه مني .. وبيوم قطعت علاقتي فيه بشكل نهائي .. كنت احس اللي قاعده اسويه غلط
وما ابي استمر فيه .. المنتدى ما عدت ادخله ولا اشارك فيه والمسن سويت لي واحد يديد وصرت ما
اضيف أي احد عليه بس رفيجاتي وبنات خالاتي وما ارد على مسجاته كلش لدرجة انه ساعات
يتصل فيني متواصل ولمدة طويله بس بعد ما كنت ارد عليه ومخليته سايلنت

قطعت علاقتي وارتحت بس اللي صار اني بعد مده تقريبا 4 او 5 شهور رجعت دخلت المنتدى
بس علاقتنا كانت فاتره يعني ما يطرش لي مسجات الا بالمناسبات لا اكثر

المهم نجي للمصيبه اللي انا فيها الحين .. اهو من اسبوع توه كان راجع من العمره
تحمدت له بالسلامه بمسج وكان اسلوبي فيه جاف لاني مليت من هالوضع وكنت ابي اقطع كل شي
كنت اتمنى انه يرجع من العمره شخص نظيف ومختلف تماماً عن اللي كان عليه قبل
بتضحكون علي لمن اقول لكم كنت اقول بقلبي اكيد لمن يرجع من العمره راح يتغير وراح
يقطع علاقته فيني لانه توه معتمر ومو معقوله اللي يروح بيت الله يرجع منه ويرجع يسوي
نفس الغلط اللي كان يسوي ويكسب ذنوب لكني انصدمت انه ما اختلف لدرجة
اني اشك انه راح العمره استغفر الله

المهم غير المسج اللي طرشت له اتحمدله بالسلامه ما طرشت غيره
بعدها بيومين طرش لي مسج انه مشتاق لي وانا الهبله قلت له انا بعد مشتاقه لك
قام دز لي مسج وكان كاتب فيه ابي اعرف شنو لابسه اذا ممكن

انا من الصدمه عصبت .. توه راجع من العمره ياناس وللحين يطلب نفس الطلب!!
رديت عليه بمسج وكتبت فيه (بصفتك شنو؟) قام رد علي (انتي مو صاحيه)

طنشته ومارديت عليه لين امس ^_^ اليوم الموعود
دزيت له مسج المغرب اني ابي اكلمه عالمسن علشان اعرف نهاية هالعلاقه
وانهيها لاني تعبت ما ابي اخون ربي واخون ثقة اهلي فيني اكثر من جذي
ابي ارجع بنت مثل ماكنت قبل اضحك واستانس من غير أي مشاكل وهموم

بعد نص ساعه رد على مسجي وكتب فيه (عندنا عشى بالبيت والناس اللي
عازمينهم وصلوا) انا عصبت يمكن لاني كنت ابي اخلص من اللي انا فيه بسرعه
وافتك قمت دزيت له (ماله داعي تجذب واصلا انا عرفت ردك لان صارلك
منطرني نص ساعه علشان ترد علي) رد علي (جذاب حلو احلف لج برب الكون
ان عندنا ناس عالعشى وانتي بنت موصاحيه وانا الغلطان اللي راسل لج)


بعدها بساعتين طرشت له مسج لاني كنت مصممه اني اكلمه وانهي كل شي
وقلت له (ماراح تكلمني على طول؟) رد علي وقالي (لمن تحترميني افكر
مو صاحيه) رديت عليه اني محترمتك وانا اسفه اني قلت جذاب وقلتها
لاني كنت متضايقه ...... نجي للمصيبه
رد علي وقالي انا اصلا مليت من كثر ما اسايرج ولو حابة علاقتنا تستمر
عندي شروط وانتي حره ......... اهني انا انصدمت معقوووله يساوم كنت
ابي اقوله ابركها من ساعه بس يمكن الواحد من الصدمه ساعات ما يقدر يستوعب
يعني شنو (اسايرج) وعندي (شروط)!!!!!!!!! قلت اشوف شنو شروطه
ماكنت قادره اصدق اني شخص عزيز علي يساوم وفوق هذا شروط
قلت له شنو شروطك .. دز لي مسج قريته مره وحده لكني حفظته

(( تعطيني الف دينار وتصورين لي صور دلع لج وتكلميني على الموبايل وانتي حره))

قريتوا المسج شفتوه صدقوني من قريته وانا ارتجف دموووووووووووووع تنزل ابي اوقفها
مو قادره منصدمه وخايفه ومو عارفه شاسوي تعبااااااااااااااااااااااااااانه

اغلقت موبايلي على طول ولحد الحين ما فتحته وما ابي افتحه .. خايفه والله خايفه
وطول الليل اصيح وادعي واستغفر ربي واقول هذا عقاب من ربي اني خنت ثقة اهلي فيني
اغلقت موبايلي بس مو عارفه شاسوي .. ما ابي افتحه اخاف انصدم بمسج ثاني مطرشه او شي

سااااااعدوني مشكلتي ما اقدر اقولها لاحد غيركم الله يخليكم ساعدوني تعباااااااااااااانه
والله تعبااانه واستاهل اللي انا فيه بس اترجاكم تساعدوني

قولو لي شاسوي الله يخليكم