قصة ولادتي بحمودي

السلام عليكم ورحمة الله وبركاته

اللهم صلي على محمد وعلى آل محمد

مسامحة خواتي أدري طولت لكن كله من الإنشغالات والبيبي الجديد الله يحفظه ويخليه

المهم

أني ولدت بتاريخ 22/8/2007 وكتبت موضوع أخبركم فيه عن ولادتي وأشكر كل اللي باركو لي من كل قلبي

ومثل ماوعدتكم اني اخبركم عن تجربتي مع الولادة

أولاً كان آخر اسبوع تجيني آلام يومياً في البطن و الظهر ومثل ما نسميها احنا ريح استقبال وتاخذ فترة بسيطة وتروح

وقبل ما اولد بيوم 21/8 الثلاثاء قعدت من النوم وكنت واعدة زوجي اني اسوي ليه مجبوس (الغدا) وقعدت اشتغل في الغدا وكانت تجيني آلام قوية ومن أحس بها أمشي في الشقة وأشرب الماي ورد والزعفران وكانت تروح وتجي لكن لما جت الظهر تقريباً الساعة 2 مافيني ولاشي وتغديت وريحت وبعد صلاة المغرب وداني زوجي بيت أبوي لأن كان في الفترة الأخيرة ليلياً أروح عشان ما اصير بروحي

وكنت قاعدة وياهم عادي وهم يتكلمون حتى زوجة أخوي تقول لي شكلش بتولدين الليلة قمت أضحك وترد عليها زوجة اخوي الثانية لا أتوقع بعد أسبوع بتولد المهم واني أضحك أقول ان شاء الله أولد وافتك وبعدين اتصلت خالتي وقامت تسألني عن الآلام فشرحتها ليها قالت هذا الطلق جدي بس أشد فعطتني نصايح منها الجماع لأن يساعد على التوسع السريع وتعتبر المنويات كطلق صناعي وبعد الماي ورد والزعفران و أقرأ الآيات والسور وأهف في الماي السور: الزلزلة ويس واذا السماء انشقت وسورة مريم على العموم اني السور ليلياً من دخلت التاسع أقراهم وأهف في الماي
وبعدين مر علي زوجي وأخذني الشقة وما فيني شي

وكنت ذيك الأيام ما أنام أصلي الصبح وأنام المهم ذيك الليلة أصر زوجي ان أنام منوكت تقريباً الساعة 12 هذه منوكت عندي :21_87: المهم حاولت أنام ما قدرت جت الساعة 2 وقمت قلت بطالع التلفزيون لين ما تجيني النومة ولا حزتها أصلا ما في شي التلفزيون فقعدت ألعب بليستيشن <<<<فاضية<<<<<منها ما لعبت<<<<<<<<:21_87:<<<<<<<<

المهم وكانت فيني آلام تروح وتجي وكنت أقول لا هذه نفس كل مرة أذن الصبح الساعة 4 إلا ربع وقمت تسبحت وصليت واني أصلي فيني ألم في الحوض وأسفل الظهر أزيد من كل مرة فقعدت أقرأ في السور

ولما كملت رحت الغرفة وكان يجيني الألم وكنت أتلم بدون صوت لا يحس زوجي لكن لما قعد الصبح الساعة 6 للشغل يقول لي ويش فيش أقول ليه فيني ألم قال ما أروح الشغل قلت ليه لا روح أني تعبانة أمبي انام تصورو ما نمت<<<< جت الساعة سبع وتوها بتغط عيوني إلا الساعة سبع ونص قعدني الألم من شدته قلت لا هذه صدق <<فاتصلت لزوجي وجى لي سريع واتصل لخالتي هي في المستشفى تشتغل فقالت جيبها كانت الآلام تجيني كل خمس دقايق
ورحت السلمانية الساعة 9 الصبح وسوو تخطيط وكان الطلق منتظم ولما فحصتني الدكتورة كنت توني 1 سم
المهم وقعدت أتألم والألم يزيد والكل قام يصيح علي المهم ما أطول أكثر الساعة أربع العصر ودوني جناح الولادة وكنت 4 سم والدكتورة بطت الكيس مال الماي وبعدها حسيت من كثر الألم اني امبي أدفع وهم يقولون لا تدفعين مو زين المهم ضربوني ابراتين عشان انام وارتاح شوي لأن تصورو اني مو نايمة وبعدين الساعة 7 وشوي قعدوني وهم يقولون خلاص قعدي وصلتين 8 سم اذا حسيتين بالم ادفعي وكنت من كثر التعب ادفع بس مو بقوة لأن طاقتي خلصت فشقوني واجد لكن الحمدلله الساعة 8 ألا ربع جبت حبيبي حمودي وهني نسيت الألم والتعب كله لما حطوه على بطني :flower:

وتصورو اخذو تقريبا أكثر من نص ساعة وهم يخيطون مع انه مبنجيني بنج موضعي لكن كنت أحس بالألم وخصوصاً وهم يتأكدون ان ما ي أوساخ ولا شي

وبعدين طلعوني لأهلي والكل كان مستانس وفرحان

عندي البقية بكمل ليكم بعدين عن المستشفى والممرضات وعن استقبال أهلي وصورة حمودي يوم أجيبه براويكم بعدين