نفاسي في شقتي ولا في بيت اهلي ؟؟؟ ساعدوني في الاختيار

كلنا عزيزتي نتنفس في بيوت امهاتنا وبيوت عوايل

ومليانه جهال وازعاج وظروف

لكن هذه العاده اللي تعودناها

عادي ولدي وتنفسي عند امك احسن

وكلها ايام وبتعدي

والضيوف شي طبيعي بيجون

لانك والده

هذي ضريبة الولادة

وعليكم السلام ورحمة الله وبركاته

اختي الله يهونها عليج
وتولدين بالسلامه

اختي في بيتج احسن

اول شي
ريلج بياخذ راحته ويقدر يشوفج بأي وقت على عكس بيت اهلج بيتقيد ولا بيقدر يجي
ولدج مابيتضايق بتغيير المكان واذا بيرقد مع ابوه فالبيت بيفتقدج وايد
اغراضج كلها موجوده فالبيت لو رحتي بيت هلج شكثر بتنقلين اغراض كفايه اغراض المستشفى

وبالنسبه للشغاله
لاتجيبينها
لكن تقدرين تتفقين مع الشركات والمكاتب اللي عندهم ايدي عامله للضيافه تشتغل بالساعه
تقولين لهم يجيبون لج وحده
عالاقل تعرف للضيافه والسنع تسوي شغلها وتروح


اما الطبخ امج او اهل ريلج يطبخون ويدزون لكم الاكل

عادي اصلا لو قعدتي بيت هلج هم اللي بيطبخون لج

وتقدرين تاخذين شغالة هلج تنظف لج البيت ماتوقع بيعارضون
او ريلج يساعدج بعد الدوام

احسن لج عند امج على الاقل بييلسون ويا ولدج شوي اما في الشقه بتجابلين طفلين وفوق هذا شغل البيت صدقيني بتتعبين

حبيبتي انا افضل انها تكون عند اهلك

بغض النظر عن الظروف الصعبه اللي راح تكون موجوده،،، دراسه وامتحانات

بس صدقيني امك مراح يهون عليها انك تكونين في بيتك لحالك

فكري لو تعبتي واحتجتي امك مثلا؟
لو زوجك في العمل وصار شي طارئ لا سمح الله الا بتكوني عند امك..


حبيبتي توكلي على الله وسيري عند اهلك اذا الله سهل عليك

واستشيري امك في الموضوع ومراح ترضى انك ماتكونين عندها


الله يوفقك ويسهل عليك و علي وعلي جميع الحوامل يارب

انا اقول في بيتج اريح واحسن لج

نامي وقعدي وربي لا ازعاج ولاشي ويم زوجج:)

أختي العزيزة أكيد الوحدة ماترتاح الا في بيتها حتى انا قاعده احاتي شلون بهد شقتي وريلي واولد في بيت اهلي بس لازم امي تساعدني لان البيبي صغير واول ياهل لي وبصراحة مفكرة اقعد 20 يوم وارجع شقتي وانتي صعبة عليج تولدين بشقتج ولا عندج احد يساعدج وصدقيني الام الوحيدة اللي قلبها يعورها على بنتها وتساعدها انتي حاولي تتحملين وتقعدين عند أهلج لين تخلصين النفاس والله يسهل عليج وعلي ونولد بالسلامه :) ، وحتى الضيوف لما يزورونج يغيرون من نفسيتج شوي

انا لو كنت بظروفج بقعد بشقتي لانج بتحسين بتأنيب الضمير خاصه انه اخوانج بيكونون في فترة اختبارات هاي من ناحيه والناحيه الثانيه انتي بفترة النفاس بتكونين جدا حساسه وبتتأثرين من اقل شي هذا غير الضيوف اللي رايحين وجايين وامج مسكينه مابين مقابلة الضيوف ومذاكرة اخوانج ومدارتج اقترح عليج تجبين شغاله مؤقته لفترة النفاس وامج اكيد مابتقصر بتمر عليج دام انها موجوده بنفس البلاد مافيها مشكله.

الله ييسرلج الامور

ويش اقول انا الي بغربه ومالي الا الله ثم زوجي وماقدرت اهد زوجي وانزل البلد عشان اولد
والحين باقي لي 10 ايام واخلص التاسع ولاحضي هدا اول طفل لي
بس احسن حاجه مافي ضيوف ولا صجة راس ولا شي
يعني بخد راحتي شوي
وشقتي صارت عفسه طفسه العالم الله ماحد يدري لين اقوم بكامل صحتي بجابل الشقه تالي
والله يقومني بسلامه واقولش النفاس بلشقه تعب ولا لا ههههههه

لا موتعب هههه لاني مجربه هالشي يعني اخذي راحه عشر ايام وبعدين عادي تقدرين تجابلين الشقه الله يعينج والله حاسه فيج الله يسهل عليج الولاده وتقومين بالسلامه سوري ايوت رديت <<كنها هي صاحبة الموضوع

قعدي في بيت اهلش 10 ايام احسن وبعدين رجعي الشقه
بترتاحين اكثر

سبحان الله نفس حالتي بالضبط لكن انا ولدي في الروضة

وامي تشتغل يعني اغلب الوقت مابتكون معاي بظل لوحدي على الاقل في بيتي وقت مايجي زوجي من الدوام باخليه يجلس معاي

وقلت اجلس في بيتي اريح لي من زحمة الاغراض لي وللبيبي ولولدي

صحيح بتعب لكن باأجر لي شغالة ساعتين او ثلاث ساعات في اليوم لين اطيب شوي

والله هو المعين

ماايبيلها تفكير الله يخليلناامهاتنا وينفسونا ويريحوناااااااااا ع الاخر انا لوني في ظروفك اولد ببيت اهلي مع امي واخواتي عشان النفسيه تكون حسنه الوحده شينه بس انا راح اجيب شغاله لوني بمحلك عشان اخدمها وأأأمرها ع كيفي والضيوف حياهم الله يونسوني بس امي ماترتبط معي في اول الايام اذاكنت جايبه شغاله حتى لوكانت الي بشهر وممكن تولدين الايام الاولى عندامك والاخيره ببيتك وع فكره النوم والراحه لاحقه عليها اهم شي ترتاحين جسديا وبس

بيت هلك طبعا بدون تفكير

صعبه اختي انك تتنفسين في شقتك وخاصة انو عند طفل غير البيبي الجديد

قسم بالله تعب بايكوون عليكي لان انتي مو عاارفه تقابلين زوجك ولا بيتك ولا اطفالك

عند امك اريح لك وبعدين بتلاقين الف طريقه عشان ماتشغلين اخوانك على المذاكره

فان اقوول عند الماما احسسسسسسسسسسسسسسن لك

انا انصحك جلسي بيت اهلك لو 10 ايام افضل لك انا اخر مره ولدت جلست في بيتي وتعذبت كثير والله
معن عندي اهل لكن وفي وقتها الوالد الله يحفظه منوم في المستشفى ماااحد يفضالي وعانيت الله يعلم اشكثر
جيبي لك شغاله مؤقته لمدة شهر وريحي حالك
وان شاء الله تولدين بالسلامه
مع الف سلامه

أختي أنا اقترح عليج انج تيلسين فبيت أهلج فترة يعني اسبوعين مثلاً وبعدين سيري شقتج واذا ريلج مومقتنع بالشغالة لاتفكرين تييبينها أبداً خصوصاً انج ساكنة في شقة صغيرة نوعاً ما والله يوفقج حبيبتي ولا تحاتين أهلج بيستحملونج وبيستحملون ولدج .. أنا يوم ربيت في ولدي الثاني كنت في نفس حالتج بس الحمد لله كل شي اتسهل ولا تحاتين ........

مشكورين بنات على ردودكم وارائكم المفيدة .. وعندي كم نقطة ما وضحت قبل ...:

النقطة الاولى ...بيت اهلي لان امي الكبيرة في خواتها فدائما يتجمعون عندها نهاية الاسبوع .. ويوم ولدت بولدي كانو على طول يجونا .. هذا غير اولاد وبنات عماتي .. وعماتي و عمومي ونسوانهم ؟؟؟؟ وغير صديقات خواتي واصدقاء اخواني ..
انا بالعكس احب اللي يزورني .. بس والله ما فيني شده وما فيني حيل اقالبلهم وولا اقابل البيبي ..؟ ولا اي دقيقة ينام فيها ابي بسرعه اريح فيها .. ولا اخذ شور دافي ولا حتى امشط شعري خخخخخخخ ..عارفين الوضع وخابرينه .. ههههههههه

النقطة الثانية .. انا اذا فرضنا بنفس في شقتي امي تبعد عني 5 دقائق بالسيارة وتوصل لي .. يعني مو بعيدة عني في نفس المنطقة .. واكيد خالاتي وعماتي بيجوني بس طبعا زيارة وحده ولا زياتين مو اسبوعيا ..

النقطة الثالثة .. امي مصرة اجيب خدامه ومو راضية لاني وااايد تعبانة في الحمل وولدي ما شاء الله عليه حركي واااااااااااايد ما يقعد وعلى طول يوسخ .. وتقول لي ما بتتحملين اثنين بعد الولادة وبتكونين تعبانه .. فأنا مردي بجيب خدامه بعد الولادة فأنا قلت دام اني بجيبها عقب اجيبها قبل احسن عشان تخدمني في حملي في الشهور الاخيرة وفي نفاسي ...

النقطة الرابعة .. زوجي اذا اروح بيت اهلي لان الغرفة اللي انام فيها جنبها كل غرف النوم فصعب جداااااااا عليه انه يجيني كل يوم وفي اي وقت يشوفني ويطمن علينا ..

شوفو هاذي الملاحظات وعطوني رأيكم ... انا تقريبا اللحين اللي رسيت عليه انفس في بيت اهلي 10 ايام ولا اسبوع وارجع شقتي بس طبعا اكون جايبة شغالة لي ... لاني خلاص ما عاد اتحمل شغل دوام بره البيت وارجع واء وويء و رضاعه وتبديل حفاظات وتدريس ولدي وتنظيف الشقة وترتيبها .. وبعدين وين الوقت اللي بهتم فيه بنفسي وبزوجي ما في ؟؟؟؟ وتضيع حياتي ؟؟
اشرايكم ... استسلم واجيب خدامه ؟؟

قلت لك اذا ماتقدرين على الرجه ووجع الراس جيبي لك شغاله وخليك في البيت وفكي نفسك لو مؤقته على الاقل انتي عندك واحد انا كان عندي ماشاء الله خمسه والله عداها على خير
الله يكون في عونك القرار صعب بالنسبه لك الله يفك حيرتك ان شاء الله
مع الف سلامه

أتصدقي أنا هذا الحين ثالث طفل لي وبعد محتارة وين أجلس في بيتي ولا أروح عند أمي ؟؟؟

في أولادي الأثنين رحت عند أمي وجلست في البكر شهر والثاني 3 أسابيع لكن الحين هذا اللي في بطني أشوف صعب نتحول أنا والياهل هناك وبالنسبة للضيوف هذي هي ضريبة الولاده المشكلة مش بالجارات والصديقات لأن هذول ما يجون غير لما يتصلو ويقولو أحنا جايين وخاصة قهوة الوالدة معروفة ودائما اتكون جاهزة لكن المشكلة من الأهل وخاصة أهل الزوج يعني اللي بتجي اتزور بتجي ساحبة كل أولادها يشوفو ولد او بنت عمهم او خالهم وطبعا هذول ما تكفيهم قهوة المربية هذول يجلسو من العصر لحد العشى عشان يتعشو ويروحو وإذا جو الصبح بيجلسو لحد الغدى يعني بصراحة أنا هذا هو اللي امخلني أفكر أني ما أجلس في بيتي وقت الولاده وخاصة أن شغالتي جديدة. لكن يالله الله كريم وكل شئ بوقته حلو

الغاليه يستحسن انج تقعدين عند امج لأنج اول الأيام بتحتاجين لها وايد

على الأقل العشرة أيام الأولى وعقب عادي لو حبيتي تردين الشقه ردي

بتكونين ريحتي شوي